29
1 Iyyobi kaallidi haysada yaagis;
2 Ha77i ta de7iya duussay,
Xoossay beni tana naagida wodiyatho gideerenne!
3 He wode iya xompey ta bolla poo7ees;
iya poo7uwan dhumaa kanthada bayis.
4 He wodey Xoossay ta keethaa anjin,
taani ta na7atetha wolqara de7ida wode.
5 He wode Ubbaa Danda7iya Xoossay taape shaaketibeenna;
ta nayti ta yuushon de7oosona.
6 He wode taani ta kushiya maathan meeccayis;
shucha biittan toketida shamahoy,
shaafa haathada goggiya zayte immees.
7 Taani katamaa pirda keethaa bida wode,
shangotara issife uttayis.
8 He wode na7atethati tana be7idi oge yeddoosona;
cimati tana bonchanaw dendi eqidosona.
9 Halaqati oda aggaagidosona;
banta kushiya banta doona bolla wothidosona.
10 He kataman de7iya gita asati si77i gidoosona;
enta inxarsay enta kottonuwa baqidi oykis.
11 Tabaa si7ida ubbay nashshees;
tana be7ida ubbay bonchees.
12 Hessi haniday,
taani manqota waasuwa si7ada ashshida gishonne,
yi7o nayta maaddida gishosa.
13 Hayqana haniya asati tana anjidosona;
am7eti ta maaduwan ufaytidosona.
14 Xillotethaa ma7oda ma7as;
suure pirdaa afilada ma7as;
barneexada wothas.
15 Taani qooqetas ayfe,
wobbetas toho gidas.
16 Manqotas aawa gidas;
oge asas xabaqa gidas.
17 Taani iitata gacuwa menthas;
enti bonqidaysa enta doonape yegisas.
18 Taani ta wozanan, “Ta laythay shafeda darin,
ta son bonchon hayqana” gada qopas.
19 Taani xaphuwa haathan yeddida,
tashiya bolla aki kumida mitha melashin!
20 Ta bonchetida mela de7as;
ta wolqay ubba wode oorathishin!
21 Ta haasaya wode si77i gidi si7ees;
ta zoriya ufaysan ekoosona.
22 Ta entana alliya gisho,
ta oda simmin taape guyera odiya asi baawa.
23 Goshshanchoy ira naageysada,
enti ta haasaya si7anaw hakankidi naagoosona.
24 Enti hirgan de7ishin ta som7uwa pashkisayis;
ta miichay enta minthethees.
25 Taani enti daana ogiya doorada entaw halaqa gidas.
Ba olanchota giddon de7iya kawoda ta enta giddon de7as;
enti azzaniya wode minthethas.