36
1 Elihuy gujidi haysada yaagis;
2 “Xoossaa doona gidada ta new odiyabay de7iya gisho,
guuthu danda7ada si7a.
3 Taani ta eraa haaho soope ehana;
tana Medhidaysi xillo gideysa qoncisana.
4 Taani wordo haasayike;
kumetha eri de7iya asi neera de7eysa ammana.
5 “Xoossay tuma wolqaama;
shin I oonaka kadhenna.
I ba akeekan mino.
6 I iitati de7on daana mela oothenna;
shin un7etidaysatas suure pirdees.
7 Xoossay ba ayfiya xillota bollafe denthenna;
enta kawotara utisidi,
merinaw dhoqu dhoqu oothees.
8 Shin asay santhalaatan qashetiko,
woyko meto wodoron oyketiko,
9 I enta oosuwanne
otoron oothida nagaraa enta bolla qoncisees.
10 Seera si7anaada enta haytha dooyees;
nagarape simmana mela enta kiittees.
11 Enti si7idi iyaw kiitetiko,
banta laytha saroninne ufaysan wursana.
12 Shin enti si7onna ixiko mashshan wurana;
enti era dhayida gisho hayqana.
13 “Xoossaa ammanonna asati
banta wozanan yilotida mela de7oosona;
I enta pirdiya wode maade koyidi woossokona.
14 Enti oothiya tuna oosuwan dhayana;
banta na7atethan hayqana.
15 Shin waayeteyisata enta waayiyape ashshees;
enta metuwa baggara entaw odees.
16 “Xoossay nena meto wodorope,
un7i bayna dalga bessi,
dooretida kathi kumida gaytaako kessana.
17 Shin ha77i iitata bolla gakiya pirday ne bolla gakin;
xillo pirdan oyketadasa.
18 Oonika nena duretethi bessidi cimmonna mela,
wodhaafe daroy balethonna mela naageta.
19 Ne duretethay
woyko ne dafetethay nena metope ashshanee?
20 Asay banta bessaafe dhayiya qammay,
yaana mela amottofa.
21 Ha meto ubbay nena gakiday hessa gaasona;
hessa gisho, iita oothonna mela naageta.
22 “Xoossay ba wolqan dhoqu dhoqu gis;
iya mela astamaarey oonee?
23 Xoossaa, ‘Haysa ootha’ gidi kiittey,
woyko, ‘Neeni iita ooso oothadasa’ yaaganaw danda7ey oonee?
24 Asay mazmuren sabbida iya oosuwa,
neka mazmuren sabba.
25 Asa koche ubbay Xoossaa oosuwa be7is;
asay haahon eqidi xeellidosona.
26 Xoossay gita! Iya gitatetha nu akeekanaw danda7oko;
iya laytha darotethaas zawi baawa.
27 “Xoossay haathe abbafe pude salo efees;
duge zaaridi ira oothidi bukisees.
28 He iray shaarape keyidi,
asa bolla bukana mela oothees.
29 Xoossi shaara waatidi micciyako,
Xoossay de7iya saluwan waanidi guummiyako,
oonika erenna.
30 I ba yuushon wol7antha poo7uwa laallees;
abba ciimmuwa waatidi kammiyako be7a.
31 Yaatidi Xoossay deriya aysees;
kathaa darsidi immees.
32 I wol7anthi ba kushen oykees;
ba mallida bessaa caddana mela kiittees.
33 Dadi dhuuqidi uushoy yaanaysa bessees;
meheyka uushoy yaanaysa erees.