37
1 “Iya uushuwan ta wozanay dirgees;
ba bessan qaaxees.
2 Iya doonape keyiya qaala si7ite;
dadada guummiya iya girsaa hayzite.
3 I salo garsan ba wol7antha laallees;
biitta gaxape gaxa gakanaw kiittees.
4 Hessafe guye, iya guunthay si7etees;
ba yashshiya girsaa sissees.
Iya girsay si7etiya wode,
ba wol7antha teqenna.
5 Xoossaa malaalsiya ogen ba guuntha sissees;
nuuni akeekanaw danda7onna gitaba I oothees.
6 I shachako, ‘Sa7an wodha’ yaagees;
wolqaama iraako, ‘Buka’ yaagidi kiittees.
7 I medhida asa ubbay iya oosuwa erana mela,
asay banta oosuwa aggana mela oothees.
8 He wode do7ati banta bessaa geloosona;
banta gongoluwan qosetoosona.
9 Wolqaama gotey dugehape dendees;
irxa carkoy pudehape yees.
10 Xoossaa de7o shempoy shachi medhees;
dalga haathata shuchada minthees.
11 Shaari haathe tookana mela oothees;
ba wol7antha shaara giddon laallees.
12 Shaarati iya kiitan biitta gaxaa yuuyosona;
I kiittiya kiita ubbaa poloosona.
13 Xoossay ira bukisey biitta irxisanaasa,
woyko asaa seeranaasa, woyko ba siiquwa bessanaasa.
14 “Iyyoba, hessa si7a;
Xoossay oothiya malaalsiya oosuwa taki gada akeeka.
15 Xoossay shaarata waatidi kiittiyako,
ba wol7antha waatidi wol7amisiyako eray?
16 Shaarati salon waanidi uttiyako,
eran polo gidida Xoossay
oothiya malaalsiya oosuwa neeni eray?
17 Dugeha carkoy carkidi biitta mishisiya wode,
neeni wolqaama bazzo seelan til7ana.
18 Xoossay saluwa til7ida mastooteda micciya wode,
neeni iya maaddanaw danda7ay?
19 Nuuni era paca gidiya gisho,
Xoossas woygidi odetaneko ne nuna tamaarsa.
20 Xoossara odetana gada taani oychanaw koshshii?
tana dhaysana mela ta ayis iya denthethanee?
21 Carkoy salope shaara geeshshiya wode,
salon phooliya awa oonika be7anaw danda7enna.
22 Pudeha baggara worqaa daaniya poo7oy bentees;
Xoossay yashshiya teeman qoncees.
23 Ubbaa Danda7iya Xoossaako shiiqanaw danda7oko;
iya wolqay gita.
I ba tuma pirdaaninne ba gita xillotethan
ase qohenna.
24 Hessa gisho, asay iyaw yayyees;
bantana cinca geyisata I kadhees” yaagis.