38
Xoossa Zaaruwa
1 Hessafe guye, Goday gote giddon gididi Iyyobas haysada yaagidi zaaris.
2 Eri bayna odan
ta zoriya dhumisey I hessi oonee?
3 Ane addeda danceta;
ta nena oychana, taw zaara.
4 Taani alamiya medhiya wode neeni awun de7ay?
Ane ne akeekiyako taw oda.
5 Ne eriko, ha sa7aa dalgatethaas zawa wothiday oonee?
Wadha wodoruwa sa7a bolla yeggiday oonee?
6 Ha sa7aa tuussata kundonna mela minthidi oykiday aybee?
Ha sa7aa baasuwas koyro shuchaa wothiday oonee?
7 Wonta bakalati issife yexiya wode,
kiitanchoti ubbay ufaysan ilili giya wode ne eray?
8 Abba haathi biittafe dhuuqidi keyiya wode,
iya pengeta gordiday oonee?
9 Abbaa shaara mayzas;
sakana dhuman gooziday tana.
10 Abbay kanthonna mela zawa medhiday,
iyaw pengenne teqe wothiday tana.
11 “Haysa gakanaw ya;
shin haysafe aadhofa;
ne wolqaama hobbey hessan eqo” yaagiday tana.
12 Iyyoba, ne yeletoosope wonti wontana mela kiita eray,
away dolana bessaa malla eray?
13 Wonta poo7oy biitta ubban poo7ana mela,
iita asata qosetida bessaafe qonce kessana mela,
neeni wonta kiitta eray?
14 Wonta poo7oy zumatanne zangaarata,
dakoydi wothida ma7oy eqidi benteysada bessees;
oto bolla wothida maatameda qoncees.
15 Iitata poo7oy eketana;
enta makalla qesey meqana.
16 Ciimmo abba giddo gelada pultuwa be7adii?
Woyko iya baasuwa gakada iya olla simeretadii?
17 New hayqo pengeti bentidona?
Woyko sakana dhumaa pengeta be7adii?
18 Sa7ay ay mela giteeko ne eray?
Hessa ubbaa ne eriya gidiko taw oda.
19 Poo7oko efiya ogey awunee?
dhumi awun de7iyako eray?
20 Poo7onne dhuma enta bessaa bessaa efanaw danda7ay?
Enti de7iya bessaa efiya ogiya eray?
21 Neeni sa7i medhetiya wode yeletida gishonne
daro laythi de7ida gisho hessa eronna aggaka!
22 Shachi minjetiya keethaa geladii?
woyko shachi dooretida bessaa be7adii?
23 Taani enta meto wodes, ola wodesinne
toora gallasas minja wothas.
24 Wol7anthi keya bessaa efiya ogey awun de7ii?
Woyko doloha carkoy awupe keyidi carkii?
25 Iri wodhiya bessaa giigisiday,
dadas oge kessiday oonee?
26 Asi doonna mela biittan
ira bukisey oonee?
27 Melida mela biittay iran laakidi,
purco maatay dolana mela oothiday oonee?
28 Iras aawi de7ii?
Woyko aka yeliday oonee?
29 Shachas aayiya de7ay?
30 Haathay shuchada minthees;
abba baasoy shachada uuketees.
31 Pilaadisa geetetiya xoolintota issife gathada qachanaw danda7ay?
Ooriyoona geetetiya xoolintoti qashetida wodoruwa billanaw danda7ay?
32 Cugan cugan de7iya xoolintota enta woden woden kessanaw danda7ay?
Biire geetetiya xoolintota enta naytara kaalethanaw danda7ay?
33 Saloti ay higgen aqiyako ne eray?
He higgey sa7aa haarana mela oothanaw danda7ay?
34 Di7oy nena muukana mela ira bukisanaw,
ne qaala dhoqu oothada shaarata sissanaw danda7ay?
35 Wol7anthi kiittanaw danda7ay?
Enti neeko yidi, “Heko, ay oothino?” goonna?
36 Wozanas cincatethi,
kahas akeeka immiday oonee?
37-38 Ba cincatethan shaarata taybanaw danda7ey oonee?
Baana munuqidi, urqa kessidi minthanaw,
salo otota gedi oothidi haathe tiganaw danda7ey oonee?
39 Shankatada macca gaammos miyaba eha eray?
koshatida gaammo marata muza eray?
40 Enti gongolon qoseti naagoosona;
bazzon zin7idi pee7osona.
41 Quuroti koshatidi daaburiya wode,
enta nayti miyaba demmanaw taako waassiya wode,
entaw miyaba immey oonee?