Iyyasu Maxaafa
Gaatha Qofa
Iyyasu maxaafay, ichashu Muse maxaafata kaallidi xaafetida maxaafa. Isra7eele asay Muse bessan shuumetida Iyyasuy kaalethin, ola xoonidi, Kanaane biitta waati oykidaako odiya taarike. Ha maxaafay sunthetiday, Isra7eele asa kaalethana mela Muse bessan shuumetida Iyyasu sunthana.
Iyyasu maxaafay xaafetida waanna gaasoy, Xoossay Isra7eele asaas Kanaane biitta immana gidi caaqida caaquwa polida, ammanthiya Xoossi gideysa bessanaasa (23:14). Isra7eele asay ha77ika Yordaanose Shaafape wuloha baggan de7iya Moo7abe denban dunkaanidi de7oosona (Zaare 34:1). Iyyasu Maxaafay heedzu kifiletan shaaketees.
1. Xoossa kiitan, Iyyasuy Muse bessan shuumetethanne Isra7eele asay Kanaane gelanaw giigetetha (1:1—5:15) odees. Xoossay Iyyasuko, “Hinte tohoy yedhiya bessi ubba hintew immas” yaagis.
2. Isra7eele asay Xoosse kiitetidi, miixan teqetida biitta, diretida katamatanne dancetida olanchota bolla waanidi xoono demmidaako odees (6:1—13:7)
3. Iyyasuy tammanne nam7u Isra7eele kochatas biitta gishuwa, Kaalebas laata biitta imuwa, baqatidi attiya katamatanne Leewetas immida katamata paadidi odiya kifile (13:1—22:34).
Maxaafay ba qofa, Iyyasuy shaaketana woyko hayqana hanishe odetida odan xaaxees. Wursethan, maxaafay Iyyasunne Alaazara hayquwa bessidi qachees. Ha maxaafa qulpe xiqisey (24:15) bolla, “Hinte goyinnana Xoossa hachi doorite. Shin taani, ta soo asaara nu Godaa goyinnana” giya kifiliya.
Maxaafa Ayfe Qofata
Yordaanose pinethinne Iyaarko oyketethi (1:1—6:27)
Iyyasuy Muse bessan shuumetis (1:1-18)
Nam7u Wochiya asati Iyaarko buussaa (2:1-24)
Yordaanose pinethinne qofiso shuchata (3:1—5:1)
Ooratha yeletethay qaxaretis (5:2-15)
Iyarkonne Gaye katamata (6:1—8:29)
Isra7eele asay Kanaane biitta oyketha (8:30—12:24)
Isra7eele asay oykiboonna biitta (13:1-7)
Yordaanosepe doloha baggan de7iya biitta (13:8-33)
Yordaanosepe wuloha baggan de7iya biitta (14:1—19:51)
Qosetidi attiya katamata (20:1-9)
Leewetas imetida katamata (21:1-45)
Dolohape yida kochati banta biitta simuwa (22:1-34)
Iyyasu wursetha odaanne hayquwa (23:1—24:33)
1
Xoossay Iyyasu Kiittis
1 Godaa aylley Musey hayqidaape guye, Goday Muse maaddiya Nawe na7aa Iyyasu, haysada yaagis. 2 “Ta aylley, Musey hayqis. Hessa gisho, neeranne ha asa ubbay dendidi, taani Isra7eele asaas immanaw de7iya biitta gelanaw, Yordaanose shaafa pinnite. 3 Taani Muses odidaysada, hinte tohoy yedhiyaso ubba hintew immas. 4 Hinte zaway dugeha Negebe mela biittafe dendidi, pudehan de7iya Libaanose zuma gakanaasa. Qassi doloha baggan de7iya Efraxiisa wogga shaafape dendidi, Hiteta biitta ubba ekidi wuloha baggan de7iya Medetrane abba gakanaasa. 5 Iyyasu, ne laytha ubban oonika neera eqetanaw danda7ena. Taani Musera gididaysada, neeraka gidana. Taani nena yeggike; aggike. 6 Aykoy baawa minna. Taani enta mayzatas immana gada caaqida biitta neeni ha asaa laatisana. 7 Aykoy baawa minna. Ta aylley Musey new immida higgiya ubbaa minthada naaga. Neeni biya bessa ubban new injetana mela iyape ushachi woyko haddirsi goopa. 8 Ha higge maxaafay ne doonape shaaketofo. Iyan xaafetidaba ubbaa minthada naaganaw gallasinne qamma iya qopa. Hessa ne oothiko, new ubbabay injetananne poletana. 9 Ne biya bessa ubban taani Goday ne Xoossay neera de7iya gisho, babofa; hirgofa; yaagada new odayis” yaagis.
10 Hessafe guye, Iyyasuy deriya halaqata haysada yaagis; 11 “Asay dunkaanidi de7iya guta bidi, heedzu gallasa garsan, ‘Goday, hinte Xoossay, hintew immiya biitta laattanaw Yordaanose shaafa pinniya gisho, hintew shinqe giigisite’ yaagidi deriyas odite” yaagis.
12 Iyyasuy, Robeelanne Gaade kochata qassi Minaase kochatape bagga haysada yaagis; 13 “Goday, hinte Xoossay, hintena shempisana, ha biittaa hintew immana yaagidi, Godaa aylley Musey odidaysa qopite. 14 Hinte macheti, hinte naytinne hinte mehey Yordaanose Shaafape hafinthan Musey hintew immida biittan de7ishshona. Shin hinte olanchoti banta ola miishiya oykidi, hinte asaape sinthatidi, oletanaw Yordaanose shaafa pinnona. 15 Goday hintena shempisidaysada, entaka shempisana gakanawunne Goday hinte Xoossay entaw immiya biitta enti laattana gakanaw, enta maaddite; oletite. Yaatidi, simmi yidi, Yordaanose Shaafape hafinthan doloha baggan, Godaa aylley Musey immida hinte buzo biittan de7ite” yaagis.
16 Enti zaaridi Iyyasuko, “Ne nuna kiitida ubbaa nuuni oothana; ne kiittiyaso ubbaa baana. 17 Nuuni Muses ubbaban kiitetidaysada, newuka kiitetana. Goday, ne Xoossay Musera gididaysada, neeraka gido. 18 Neera eqeteynne ne kiita ixiya oonika de7iko, hayqo. Gidoshin neeni minna” yaagidosona.