1 Nawe na7ay Iyyasuy, biitta wochi be7iya nam7u asata Seexima*Seexima: Ha qaalay Ibraawetho doonan soqala guussu. geetetiya bessaafe qosan kiittishe, “Bidi biitta wochite; qassi Iyaarko katama dummayidi wochite” yaagidi kiittis.

Enti bidi, Raabo geetetiya laymatethan aqiya ase soo aqanaw gelidosona. 2 Iyaarko kawoy, “Isra7eele asape kiitetidaysati ha biitta wochanaw hachi qamma yidosona” giya odaa si7is.

3 Yaatin, Iyaarko kawoy Raabiko, “Ne soo gelida asati biitta wochanaw yida asi gidiya gisho, entana kessada imma” yaagidi kiittis.

4 Shin maccasiya he nam7u asata qottada, “Ee asati taako yidosona, shin enti awupe yidaako ta erike. 5 Omarsi katama pengiya gordana haniya wode, enti keyidi bidosona. Enti awu bidaako ta erike. Ellesidi enta hinte kaalliko, oykana” yaagada entaw odasu. 6 Shin iya asata dasa bolla kessada talba coyna giddon qosasu. 7 Yaatin, kawoy kiitida asati wocheyisata koyishe, Yordaanose Shaafa pinthiya ogiya gakanaw bidosona. Enti katamaape buroo keyida mela katama pengey gordetis.

8 Wocheysati dhiskanaape kasetada, iya entako keyada, 9 haysada yaagasu; “Goday ha biitta hintew immidaysa ta erayis. Gaasoyka, hintefe dendidaysan gita yashshan asa ubbay til7is. 10 Gibxe biittafe hinte keyida wode, Goday hinte sinthan Zo7o Abbaa waati melisidaako nu si7ida. Qassi Yordaanose Shaafape doloha baggara de7iya Amoore kawota nam7ata, Sihoonanne Ooge hinte waatidi wodhidakonne enta katama waatidi dhaysidaako nu si7ida. 11 Nuuni hessa si7ida wode, nu wozanay yashshan til7is. Hiza, hinte Goday, Xoossay saluwaka sa7aaka haareysi iya gideysa nu erida. 12 Hessa gisho, ta hintew keehidaysada hinte ta aawa soo asaas keehanaada Godaa sunthan caaqite. Hessas ammanthiya malla taw immite. 13 Ta aawanne ta aayiw, ta ishatanne ta micheta eta soo asaa ubbaa wodhoko gidi caaqite” yaagasu.

14 He asati zaaridi, “Nu new caaqida caaquwa polonna ixiko, Xoossay nuna wodho. Nu oothiyaba ne asas qoncisonna ixiko, Goday ha biitta nuus immiya wode, nuuni new ammanetananne keehana” yaagidosona.

15 Ra7aabi keethay katama gimbe dirsara oyketidi keexetida gisho, maskootiyara wodoro duge yeddada, entana duge wodhisasu. 16 Ra7aaba entako, “Hintena koyeysati demmonna mela deriyako, bidi enti simmana gakanaw yan heedzu gallas qosetite. Yaani simmidi, hinte biya bessa baanaw danda7eeta” yaagasu.

17-18 Asati zaaridi, “Nuuni ha biitta oykanaw geliya wode, ha zo7o wodoruwa ne nuna wodhisida maskootiyan qachonna ixikonne ne aawa, ne aayiw, ne ishatanne ne soo asa ubbaa ne soo shiishonna ixiko, ne nuna caaqisida caaqoy nuus gome gidenna. 19 Oonika ne soope kare keyidi hayqiko, hessi iya gome. Nuuni hessas oyshetoko. Neera son de7ishe oonika qohetiko, iya suuthaa gomey nuna gako. 20 Shin nu oothiyaba neeni asas qoncisiko neeni nuna caaqisida caaqoy nuus gome gidenna” yaagidosona.

21 Iya zaarada, “Hinte qaalada hano” gada enta moyzasu. Enti bidaape guye, he zo7o wodoruwa maskootiyan qachasu.

22 Enti deriyako bidi, enta koyeysati Iyaarko simmana gakanaw yan heedzu gallas qosetidosona. Enta koyeysati oge ubban koydosona, shin demmibookona. 23 Hessafe guye, he nam7u asati deriyape wodhidosona. Yordaanose pinnidi, Nawe na7aa Iyyasuko yidi, bantana gakidaba ubbaa odidosona. 24 Enti Iyyasuko, “Goday tuma he biittiw nuus aathidi immis. Qassi he biittan de7iya asa ubbay, nuus yayyidi til7idosona” yaagidosona.