1 Wontetha gallas, wonta guura Iyyasuynne asay Seexima geetetiya bessaafe dendidi, Yordaanose shaafa bidi, pinnonna yan dunkaanidosona. 2 Heedzu gallasape guye, halaqati enti dunkaanida guta gelidi, 3 “Leewe koche gidida kahineti tookida, Godaa, hinte Xoossaa caaqo taabotiya hinte be7ida wode dunkaanida gutaape dendidi enta kaallite. 4 Hinte kase ha ogiyara bidi eronna gisho, hinte baana ogiya enti bessaana. Shin caaqo taabotiyako shiiqopite. Hinte giddoninne caaqo taabotiya giddon nam7u mukulu wadha gidiya haahotethi de7o” yaagidi odidosona.

5 Iyyasuy asaako, “Goday wonto hinte giddon malaalsiyaba oothana gisho, hintenatethaa geeshshite” yaagis. 6 Qassi kahinetas, “Caaqo taabotiya tookidi, asape sinthe aadhite” yaagidi kiittis. Kahineti caaqo taabotiya tookidi, asape sinthe aadhidosona.

7 Goday Iyyasuko, “Taani Musera gididaysada, neeraka gidanaysa asa ubbay erana mela hachi Isra7eele ubbaa sinthan nena dhoqu dhoqu ooso doomana. 8 Neeni, caaqo taabotiya tookiya kahinetas, ‘Yordaanose shaafa doona gakiya wode haatha gido gelidi eqite’ gada kiita” yaagis.

9 Iyyasuy Isra7eele asaako, “Haa yidi Godaa, hinte Xoossaa qaala si7ite. 10 De7o Xoossay hinte giddon de7eysa hinte eranay, Kanaaneta, Hiteta, Hiweta, Parzeta, Gergeseta, Amooretanne Yaabuseta hinte sinthafe I gooddidi kesseysana. 11 Biitta ubba Godaa caaqo taabotey hintefe sinthatidi, Yordaanose shaafa pinnana. 12 Hiza tammanne nam7u Isra7eele zerethatape issi issi asi doorite. 13 Biitta ubba Godaa caaqo taabotiya tookida kahineta tohoy Yordaanose haatha yedhiya wode haathay eqana. Qommofe duge goggiya Yordaanose haathay issi bolla shiiqidi dooretana” yaagis.

14 Asay Yordaanose shaafa pinnanaw dunkaanida gutaape dendiya wode, caaqo taabotiya tookida kahineti asaa sinthan boosona. 15 Kathi shiishiya wode Yordaanose shaafay medhaysada kixikoka, caaqo taabotiya tookida kahineti Yordaanose shaafa gakidi, enta tohoy haatha gaxa yedhida wode, 16 qommofe duge goggiya haathay eqis. Zartaana matan de7iya Adaama katama gakanaw shiiqidi dooretis. Duge Hayqo abbaako goggiya haathay eqis. Yaanin, asay Iyaarko katama pinnidosona. 17 Isra7eele asay mela biittara pinnidi wurana gakanaw Godaa caaqo taabotiya tookida kahineti Yordaanose shaafa giddon mela biittan eqidosona.