1 Asa ubbay Yordaanose pinnidaape guye Goday Iyyasuko, 2 “Issi issi Isra7eele kochaafe issi issi asi ekada tammanne nam7u asata doora. 3 He asati Yordaanose shaafa giddon kahineti eqida bessaafe tammanne nam7u shuchata ekana melanne he shuchata hachi hinte dunkaanidi aqiya bessan wothana mela oda” yaagis.

4 Iyyasuy Isra7eele zerethatape dooretida tammanne nam7u asata xeegis. 5 Entako, “Godaa hinte Xoossaa caaqo taabotey de7iya bessa guye Yordaanose shaafa gelidi, issi issi Isra7eele zerethata taybon ubbay issi issi shuchi hinte hashen tookite. 6 Ha shuchati, Goday hachi oothidaba hintena qofisiya malaata gidana. Wonto hinte nayti, ‘Ha shuchati aybisee?’ yaagidi oychiya wode, 7 hinte zaaridi, ‘Godaa caaqo taabotey pinniya wode Yordaanose haathay gogethi aggis. Hessa gisho, ha shuchati ha bessan hanidaba Isra7eele asaa ubba wode qofisiyaba gidana’ ” yaagis.

8 He asati Iyyasuy kiitidaysada oothidosona. Goday Iyyasus odidaysada, Isra7eele zerethata taybon Yordaanose shaafape tammanne nam7u shuchata efidi, enti aqiya bessan wothidosona. 9 Iyyasuy, Kahineti Yordaanose shaafan caaqo taabotiya tookidi, eqida bessan tammanne nam7u shuchata essis. He shuchati hachi gakanaw yan de7oosona. 10 Musey Iyyasu kiitidaysa mela, Goday Iyyasu kiittidaba ubbay poletana gakanaw, caaqo taabotiya tookida kahineti Yordaanose shaafan eqidi gam7idosona. Asay ellesidi shaafa pinnidosona. 11 Asa ubbay, pinnidaape guye, Godaa caaqo taabotiya tookida kahineti asaape sinthe aadhidi kaalethidosona. 12 Musey kiitidaysada, Robeelanne Gaade kochati, qassi Minaase kochaafe baggay olas dancetidi, asaape sinthatidi pinnidosona. 13 Darotethan oytamu mukulu gidiya olanchoti, Godaa sinthan, Iyaarko matan de7iya denban oletanaw shiiqidosona. 14 He gallas, Goday Iyyasu Isra7eele asa ubbaa sinthan dhoqu dhoqu oothis. Enti Muse bonchidaysada Iyyasuka iya de7o laytha ubban bonchidosona.

15 Goday Iyyasuko, 16 “Caaqo taabotiya tookida kahineti Yordaanose shaafape keyana mela oda” yaagis. 17 Iyyasuy kahineti Yordaanose shaafape keyana mela odis. 18 Godaa caaqo taabotiya tookida kahineti Yordaanose shaafape keyidosona. Enta tohoy mela biitta yedhida wode ellesidi, Yordaanose haathay ba bessa simmidi, kase goggeysada gaxa gakidi gogethi oykis.

19 Asay koyro ageenan tammantho gallasan Yordaanose shaafa pinnidi, Iyaarkos doloha baggan de7iya Galgalan dunkaanidosona. 20 Iyyasuy Yordaanose shaafape eketida tammanne nam7u shuchata Galgalan essidi, 21 Isra7eele asaako haysada yaagis; “Wonto hinte nayti, ‘Ha shuchati aybisee?’ yaagidi hintena oychiya wode, 22 ‘Isra7eele asay Yordaanose shaafa mela biittara yedhidi pinnidaysa qofisiyaba’ yaagidi odeeta. 23 Nuuni pinnana gakanaw, Goday, nu Xoossay Zo7o Abbaa kase nu sinthan melisidaysada, hinteka pinnana gakanaw, Goday, hinte Xoossay Yordaanose shaafa hinte sinthan melisidaysa odite. 24 Hessa gisho, biittan de7iya asa ubbay, Godaa wolqay ay mela giteeko erana; hinteka Godaa, hinte Xoossaa, merinaw bonchana” yaagis.