5
Isra7eele Asaa Qaxaretetha
1 Yordaanose shaafape wuloha baggan de7iya Amooreta kawotinne Medetiraane Abbaa lanqen de7iya Kanaaneta kawoti ubbay, Isra7eele asay pinnana gakanaw Yordaanose shaafa Goday waati melisidaako si7ida wode enta wozanay til7in, Isra7eele asaara eqetanaw xaalatethi dhayidosona.
2 He wode Goday Iyyasuko, “Salo shuchu qarayada Isra7eele adde asaa nam7antho qaxara” yaagis. 3 Iyyasuy qara salo shucha ekidi, “Qaxara Dere” geetetiya bessan Isra7eeleta qaxaris. 4 I hessa oothiday, Gibxefe keyda addetan laythi olas gakida ubbay mela biittan hayqi wurida gishosa. 5 Gibxefe keyida adde asa ubbay, qaxaretidosona, shin Gibxefe bishe mela biittan yeletida adde nayti qaxaretibookona. 6 Gibxefe keyiya wode laythi olas gakida adde asa ubbay Godaas kiitetonna ixida gisho, enti hayqidi wurana gakanaw Isra7eeleti mela biittan oytamu laythi yuuyidosona. Goday, nuus immana gidi enta mayzatas caaqida eessinne maathi goggiya aradda biittaa hayqida enta nayti laattonna mela kase caaqis.Taybo 14:28-35. 7 Hessa gisho, Iyyasuy qaxariday Goday enta bessan denthida enta nayta. Enti oge bolla yeletida gisho qaxaretibookona.
8 Asa ubbay, qaxaretidaape guye, enta madunthay paxana gakanaw enti dunkaanida bessan gam7idosona. 9 Goday Iyyasuko, “Hachi taani Gibxeta boriya*Gibxe boriya: Gibxe boriya geetetiday enti Gibxen aylletethan de7idaysa bessana. hintefe diggas” yaagis. Hessa gisho, he bessaa sunthay hachi gakanaw Galgala†Galgala: Ibraawetho doonan Galgala guussay “Diggis” woyko “Gondorsis” guussu. geetetidi xeegetees.
10 Isra7eele asay Iyaarko denban Galgala geetetiya bessan dunkaanidi, koyro ageenan tammanne oyddantho gallasan omarsi Paasika Baaliya bonchidosona. 11 Paasikape guye, wontetha gallas, he gadiyan dolida katha ayfiya, uythunne tiya caaca midosona. 12 He gadiyan mokida kathaa enti mida wontetha gallas mannay wodheysa aggis. He wodepe doomidi Isra7eele asay manna demmibookona. Hessafe guye, enti Kanaanen kaxida katha midi de7idosona.
Iyaarko Kundethaa
13 Iyyasuy Iyaarko matan de7iya wode mashsha oykidi ba sinthan eqida issi adde be7is. Iyyasuy iyako shiiqidi, “Neeni nu baggaye woyko nu morketa baggee?” yaagidi oychis.
14 Addey zaaridi, “Taani oodde baggaka gidike. Shin ta Godaa tora mocona gidada yas” yaagis.
Iyyasuy sa7an kundi goyinnidi, “Ta godaw, ta oothanaba taw odaa” yaagis.
15 Godaa toora moconay Iyyasuko, “Neeni eqida bessay geeshshi gidiya gisho, ne tohuwape caammaa kessa” yaagis. Yaatin Iyyasuy I gidaysada oothis.