1 Goday Iyyasuko, “Yayyofa; hirgofa; olanchota ubbaa neera ekada, Gayee katamaa olanaw keya. Gaye kawa, iya asaa, iya katamaanne iya biitta ta ne kushen aathada immas. 2 Neeni Iyaarko bollanne iya kawa bolla oothidaysada Gaye bollanne iya kawa bolla oothana. Shin hinte ha77i olidi di7iya shalonne mehe hintew ekite. Katamaape guye baggara qoponna mentha gelanaw giigeta.”

3 Hessa gisho, Iyyasuynne olanchoti ubbay, Gaye katamaa olanaw dendidosona. Iyyasuy ba olanchota giddofe hastamu mukulu gidiya mino olanchota dooridi qamma yeddishe, 4 entana haysada yaagidi kiittis; “Bidi katamaape guye baggara qosetidi naagite. Katamaape haakidi boonnashin, menthi gelanaw giigidi naagite. 5 Tanne taara de7iya asa ubbay, katamaako shiiqana. He wode Gaye katamaa asay nuna olanaw yaa wode kaseysada nu enta sinthafe guye simmidi baqatana. 6 Enti kesseysada nu enta sinthafe baqatiya daanin, nuupe baqatoosona gidi, katamaape nu enta haassana gakanaw nuna kaallana. 7 He wode hinte qosetida bessaafe keyidi katamaa oykite. Goday hinte Xoossay katamaa hinte kushen aathidi immana. 8 Katamaa oykidaape guye, Goday kiitidaysa mela taman xuuggite. Ta hintena kiittas” yaagis.

9 Hessafe guye, Iyyasuy olanchota kiittis. Enti bidi Gayee katamaape wuloha baggan Beetelepenne Gayeepe giddon qosetidi naagidosona. Shin Iyyasuy he qamma asaara aqis.

10 Wontetha gallas guura Iyyasuy dendidi, olanchota xeegis. Yaatidi, inne Isra7eele cimati olanchota kaalethidi Gaye katamaa bidosona. 11 Iyara de7iya olanchoti ubbay, sinthe bidi Gaye katama matidi, katamaape pudeha baggan dunkaanidosona. Entafenne Gaye katamaape giddon zangaari de7ees. 12 Iyyasuy ichashu mukulu olanchota dooridi, katamaape wuloha baggara, Beetelepenne Gayeepe giddon qosidi wothis. 13 Olanchotape baggaa katamaape pudeha baggara, qassi katamaa menthidi gelana olanchota wuloha baggara besse besse oythis. He qamma Iyyasuy he zangaaran aqis.

14 Gaye katamaa kawoy hessa be7ida wode, ba olanchota ubbaa ekidi, Isra7eele asaara oletanaw demba biitta keyidosona. Shin kawoy katamaape guye baggara qoseti uttida olanchoti de7eysa eribeenna. 15 Iyyasuynne Isra7eele asa ubbay xoonetidaba daanidi, enta sinthafe mela biitta simmidi baqatidosona. 16 Gaye kataman de7iya asa ubbay, enta yedethanaw xeegereti keyidi, Iyyasu goodishe katamaape haakidi bidosona. 17 Gayen woyko Beetelen de7iya asa ubbay, Isra7eele asaa yedethanaw katamaa yeggidi keyin katama pengiya naagiya asi dhayida gisho; dooya attis.

18 Hessafe guye, Goday Iyyasuko, “Ne toora Gaye katamaa bolla dentha. Taani Gaye katamaa ne kushen aathada immana” yaagis. Yaatin Iyyasuy ba toora katamaa bolla denthis. 19 Iyyasuy ba toora denthida wode qosetida olanchoti banta bessaafe dendidi, katamaa geli oykidi, ellesidi taman xuuggidosona.

20 Gaye katamaa asay guye simmidi xeelliya wode, katamaa cuyay salo dendishin be7idosona. Mela biitta baqatida Isra7eele asay, bantana yedethiya asaa bolla guye simmida gisho, enti awu baggaraka kessi ekanaw danda7ibookona. 21 Iyyasunne iyara de7iya asa ubbay, qoseti uttida olanchoti katamaa oykidaysanne cuyay salo dendidaysa be7ida wode guye simmidi, Gaye katamaa asaa wodhidosona. 22 Katamaa gelidi oykida olanchotika katamaape enta bolla keyidosona. Yaatin, Gaye asay Isra7eele olanchotan ubba baggara teqetida gisho, issoyka attona woyko kessi ekonna ubbaa wodhidi wursidosona. 23 Shin Gaye katamaa kawa de7idi, Iyyasuko ehidosona.

24 Isra7eele asay Gaye katamaa asa entana yedethida bessan mashshan wodhidi ongidaape guye, ubbay guye katamaa simmidi, kataman attida asaa ubbaa mashshan wodhidosona. 25 He gallas Gaye kataman hayqida addeynne macci tammanne nam7u mukula. 26 Iyyasuy Gaye kataman de7iyaba ubbaa ongana gakanaw katamaa bolla denthida toora duge wothibeenna. 27 Shin Goday Iyyasu kiitidaysa mela Isra7eele asay he katamaa mehiyanne shaluwa bantaw di7idosona. 28 Iyyasuy Gaye katamaa xuuggis; he katamay hachi gakanaw laaletha doorenne asi baynna bessi gididi attis. 29 Iyyasuy, Gaye katama kawa wodhidi omarsi gakanaw mitha bolla kaqis. Awi wulliya wode, iya aha katamaa geliya pengen yeggana mela oothis. Iya bolla daro shucha keelidosona; he keela shuchay hachi gakanaw he bessan de7ees.

30 Hessafe guye, Iyyasuy Ebaala deriya bolla Godaas Isra7eele Xoossaas yarsho bessi keexis. 31 Godaa aylley Musey Isra7eele asaa kiitidaysadanne higge maxaafan xaafetidaysada, yarsho bessaa masetiboonnanne birati bochiboona shuchafe keexidi, iya bolla Godaas xuussa yarshonne issifetetha yarsho yarshidosona. 32 Iyyasuy, Isra7eele asaa sinthan, Muse higgiya shuchaa bolla zaari xaafis. 33 Isra7eele asaa anjana mela Godaa aylley Musey kiitidaysada Isra7eele asa ubbay, asa gade asata, enta cimati, enta shuumatinne daynnati ubbay, Godaa caaqo taabotiya tookida Leewe koche gidida kahineta sinthan ushacha bagganinne haddirsa baggan eqidosona. Entafe baggay Garzaana zuma sinthan, qassi baggay Ebaala deriya sinthan eqidosona.Zaare 11:29; 27:11-14. 34 Higge maxaafan xaafetidaysada, Iyyasuy higge qaala ubbaa, anjuwanne baadetha nabbabis. 35 Musey kiitida higgiya Iyyasuy, Isra7eele asa ubbaas, maccasas, naytasinne, asa gade asaas issi qaalaka ashshona nabbabis.