1 Yordaanose shaafape wuloha baggan derey dariya biittaninne gadhan Medetrane abbaafe bidi Libaanose gakanaw de7iya Hiteta, Amooreta, Kanaaneta, Parzeta, Hiwetanne Yaabuseta kawoti ubbay, Gaye asay xoonetidaysa si7ida wode, 2 Iyyasunne Isra7eeleta olanaw issife shiiqidi zoretidosona.

3 Gaba7oona asay Iyyasuy Iyaarko bollanne Gaye katamaa bolla oothidaba si7idi, 4 Iyyasu cimmanaw koydosona. Enti shinqe qachidi, cima woyne ogoronne curqa qarxiita hare bolla caanidi, Iyyasuko ase kiittidosona. 5 Kiitetida asati wurida caamma aathidosona; peedhetida afila ma7idosona; enti oykida shinqeyka melidabaanne meqertidaba. 6 Enti Isra7eele asay dunkaanida guta Galgala bidi, Iyyasukonne Isra7eele asaako, “Nuuni haaho gadepe yida. Nu yiday hintera caaqetidi saro daanasa” yaagidosona.

7 Yaatin, Isra7eele asay Gaba7oone asaako, “Hinte nu matan de7iya asaakosh? Nu aybin eridi hintera caaqetanee?” yaagidosona.

8 Enti Iyyasuko, “Nu ne aylleta” yaagidi zaaridosona.

Iyyasuy zaaridi, “Hinte oonantee? Awupe yidetii?” yaagidi oychis.

9 Enti zaaridi, “Nuuni ne aylleti Goday hinte Xoossay Gibxen oothidaysa si7ida gisho, daro haaho gadepe yida. 10 Qassi Yordaanose shaafape hefinthan wuloha baggan de7iya nam7u Amoore kawota, Haseboona kawa Sihoonanne Astarooten de7iya Baasane kawa Ooge bolla I oothidaysa nu si7ida. 11 Nu biitta cimatinne nu biittan de7iya ubbay, oges shinqe giigisi oykidi bidi entara gahetidi, entako, ‘Nu hinte aylleta; nu yiday hintera caaqetidi saro daanasa’ yaagite.

12 “Nu oykida shinqiya be7ite. Nu soope ekidi keyiya wode ho77o, shin ha77i melidaysanne puulumidaysa be7ite. 13 Ha woyniya ogorotan nu kunthiya wode oorathi, shin ha77i daaketidaysa be7ite. Ogiya haahotethaafe dendoysan nu ma7oynne nu caammay wuris” yaagidosona. 14 Shin Godaa sheniya oychonna de7ishe, Isra7eele asay enta shinqiyafe guuthara ekidosona. 15 Yaatin, Iyyasuy hintena wodhoko gidi saro caaqo entara caaqetis. Isra7eele cimatika he caaquwa menthoko gidi caaqidosona.

16 Entara caaqida heedzantho gallasan he asati enta biittan de7eysanne entaw shooro gideysa Isra7eele asay si7idosona. 17 Isra7eele asay heedzu gallas hemetidi, he asati de7iya katamata gakidosona. Enta katamati Gaba7oona, Kafira, Baarotenne Qiriyat-Yi7aarima geetetidi xeegetoosona. 18 Shin Isra7eele cimati entaw Godaa, Isra7eele Xoossaa sunthan caaqida gisho, Isra7eele asay enta wodhibookona. Yaatin, asa ubbay cimata bolla zuuzumidosona. 19 Shin Isra7eele cimati, “Nu entaw Godaa Isra7eele Xoossaa sunthan caaqida gisho, ha77i enta bochanaw danda7oko. 20 Nuuni entaw haysada oothana; nuuni entaw caaqida caaquwa menthin Godaa hanqoy nu bolla yoonnaada enta wodhoko. 21 Enti de7o giite. Gidoshin Isra7eele asa ubbaas mithinne haathe shiisheyisata gido” yaagidosona. Hessa gisho, cimati banta caaquwa naagidosona.

22 Iyyasuy Gaba7oona asaa xeegidi, “Nu matan de7ishe, ‘Nuuni daro haaho biittafe yida’ gidi, nuna ayis cimmidetii? 23 Hinte hessa oothida gisho, baadetidaysata. Hinte merinaw ta Xoossaa keethan mithin haathe shiishiya aylle gidana” yaagis.

24 Enti zaaridi, “Nuuni ne aylleti, Goday hinte Xoossay ha biittan de7iya asa ubbaa dhaysidi, biitta hintew immanaw ba aylliya Muses odidaysa si7ida. Hessa gisho, hintew babidi haysa oothida. 25 Ha77i nu ne kushen de7oos. New lo77onne suure daanidi bentidaba ootha” gidi zaaridosona. 26 Iyyasuy Isra7eele asay enta wodhonna mela ashshis. 27 He gallas Iyyasuy, Gaba7oona asata Isra7eeletasinne Goday doorida bessan de7iya iya yarsho bessaas haathenne mithi shiishiya asi gidana mela oothis. Gaba7oona asati hachi gakanaw hessa oothosona.