1 Isra7eele asay Yordaanose shaafape doloha baggara de7iya Arnoona zangaarape bidi Armoona zumaa gakanaw, qassi doloha baggara Yordaanose zangaara gakanaw de7iya biitta ubbaa olidi oykis. He xoonetida kawoti haysafe kaallidi xaafetidaysata; 2 Haseboonan uttidi haariya Amooreta kawa Sihoona. I Galada biittas baggaa ekidi, Arnoona zangaara matan de7iya Aroorape dendidi, Amooneta zawa Yaaboqa shaafa gakanaw de7eysa haarees. 3 Qassi doloha baggara Yordaanose zangaaran Kenereeta abbaafe bidi, Beet-Yashimoota baggara Maxine Abbaa kanthidi, Pisga deriyape garsa baggara de7iya biittata haarees.

4 Hessadaka, Raafaymeta sheeshape wursethi gidida, Astarootenne Edraa7a haariya, Baasane kawa Ooge xoonis. 5 Oogey, haariya zaway pudehan Armoona zumaa, dolohan Salaka katamaa gakidi, wulohan Geeshuretanne Makata zawa gakanaw de7iya Baasane biitta ubbaa gakees. Haseboona kawa Sihoona biitta Galada pudeha baggaa gujidi haarees.

6 Godaa aylley Musey kaalethin, Isra7eele asay ha kawota xoonidosona. Godaa aylley Musey enta biitta Robeela kochatas, Gaade kochatasinne Minaase kochaafe baggaas shaakidi laatisis.

7 Iyyasuynne Isra7eele asay Yordaanose shaafape wuloha baggan de7iya kawota ubba xoonidosona. He biittay Libaanose zangaaran de7iya Ba7aal-Gaadepe bidi, dugeha baggara Sayre matan de7iya Halaqa deriya gakees. Iyyasuy he biittaa shaakidi, Isra7eele kochatas laata biitta oothidi immis. 8 He I immida biittay, derey dariya biitta, wuloha baggan de7iya gadha, Yordaanose zangaara, Yihudanne Negebe mela biitta. He biittay kase Hiteti, Amooreti, Kanaaneti, Parzeti, Hiwetinne Yaabuseti de7iya biitta. 9 Isra7eele asay xoonida kawoti haysafe kaallidi xaafetidaysata; Iyaarko kawa, Beetele matan de7iya Gaye kawa, 10 Yerusalaame kawa, Kebroona kawa, 11 Yarmuta kawa, Laakiso kawa, 12 Egloona kawa, Gezera kawa, 13 Dabira kawa, Gedera kawa, 14 Horma kawa, Arada kawa, 15 Libina kawa, Adulaama kawa, 16 Maqeda kawa, Beetele kawa, 17 Tapuha kawa, Hefeera kawa, 18 Afeeqa kawa, Saarona kawa, 19 Madoona kawa, Hazoora kawa, 20 Shimroon-Maroona kawa, Azifa kawa, 21 Tanaka kawa, Magido kawa, 22 Qaadesa kawa, Qarmeloosan de7iya Yoqinaame kawa, 23 Gezzen de7iya Doora kawa, Galgalan de7iya Goyma kawanne 24 Tirsa kawa.