1 Hazoora kawoy Yaabini, Isra7eeleta xoonuwa si7ida wode Madoona kawa Yobaabas, Shimroona kawas, Azifa kawas, 2 pudeha gezzen de7iya kawotas, Kenereeta abbaafe dugeha baggan Yordaanose zangaaran de7iya kawotas, Nafat-Doorape wuloha baggara gadhan de7iya kawotas kiita yeddis. 3 Qassi dolohanne wuloha baggan de7iya Kanaanetas, Amooretas, Hitetas, Parzetas, derey dariya biittan de7iya Yaabusetasinne Mixiphan Armoona zumaape garsan de7iya Hiwetas kiittis. 4 Enti ubbay, banta olanchota, paratanne para gaareta issife gathidi yidosona. Enta tayboy abba gaxan de7iya shafe mela. 5 He kawoti ubbay banta wolqaa issife gathidi, Isra7eeleta olanaw Meroome haatha matan dunkaanidosona.

6 Goday Iyyasuko, “Ne entaw babofa; taani wonto hannoode enta ubbaa wodhada Isra7eele asaas aatha immana. Neeni enta parata gaadiya qanxana; enta para gaaretaka taman xuuggana” yaagis. 7 Iyyasuynne iya olanchoti ubbay enti qoponna de7ishin Meroome haatha matan enta bolla keyidi olidosona. 8 Goday entana Isra7eeleta kushen aathidi immis. Isra7eeleti enta olidi, gita Sidoonanne Masroota gakanaw, qassi doloha baggan de7iya Mixipha zangaara gakanaw entana yedethidosona. Entafe issi asika ashshona ubbaa wodhidosona. 9 Iyyasuy, Goday kiitidaysada ubbaa bolla oothis; enta parata gaadiya qanxis; enta gaareta xuuggis.

10 Yaatidi, Iyyasuy guye simmidi, Hazoora oli oykidi, kawuwaka mashshan wodhis. He wode Hazoora kawotethay hara kawotethaa ubbaas huuphe. 11 Isra7eele asay Hazooran de7iya asaa ubbaa mashshan wodhida gisho shempora attida asi baawa. He katamay taman xuugetis.

12 Godaa aylley Musey kiitidaysada, Iyyasuy he katamatanne enta kawota ubba di77is. Issi asika ashshona asa ubbaa mashshan wodhis. 13 Gidoshin, Iyyasuy xuuggida Hazoora katamaape attishin, zooze bolla*Zooze bolla: Hessi medho zooze gidonashin katamati olan laaletin kase biitta denthonnashin iya bolla keexishin dooretidi zooze gidis guussu. keexetida katamata Isra7eele asay xuugibookona. 14 Isra7eele asay he katamatape bonqida, miishiyanne mehe ubbaa bantaw ekidosona. Issi asika ashshona asa ubbaa mashshan wodhidosona. 15 Goday ba aylliya Muse kiitidaysada, Musey Iyyasu kiittis; Iyyasuyka kiitaa polis. Goday Muse kiitidabaape issibaaka Iyyasuy ashshibeenna; ubbaa oothis.

16 Iyyasuynne iya olanchoti derey dariya biitta, Negebe mela biitta, Goshena biitta ubbaa, wuloha baggan de7iya gadhaanne Yordaanose zangaara olidi oykis. 17 I Sayre kanthisiya Halaqa zumaape bidi, Armoona zumaape garsa baggan de7iya Libaanose zangaaranne Ba7aal-Gaade gakanaw de7iya biittata oykis. Enta kawota ubbaa shocis; di77idi wodhis. 18 Iyyasuy daro wode he kawota ubbaara oletis. 19 Gaba7oonan de7iya Hiwetape attishin, hara katami Isra7eeletara saro daanaw caaqiday baawa. Isra7eeleti hara katamata ubbaa olan xoonidi oykidosona. 20 Goday Muse kiitidaysada, Iyyasuy enta maaroti baynna ubbaa wodhana mela Goday enta wozana muumisidi Isra7eeleta olana mela denthethis.

21 He wode Iyyasuy bidi derey dariya Kebroonan, Dabiran, Anaaban, derey dariya Yihudaninne Isra7eelen de7iya adusata, Anaaqe kochata wodhidi ongis. Iyyasuy entanne enta katamata kumethi dhaysis. 22 Anaaqe kochatape oonika Isra7eele biittan attibeenna, shin Gaazan, Gaataninne Ashdoodan guuthati attidosona. 23 Goday Muse kiitidaysada Iyyasuy biitta ubbaa oykidi, Isra7eele asaa kochan kochan shaakidi laatisis.

Hessafe guye, biittay olape shempis.