1 Biitta oli xoonidi oykidaape guye, Isra7eele asa ubbay Seelon shiiqidi, Goda goyinno dunkaaniya yan essidosona. 2 Shin Isra7eele asape laata biitta ekiboonna laapun kochati attidosona.

3 Hessa gisho, Iyyasuy Isra7eele asaako, “Goday hinte aawata Xoossay hintew immida biitta laattonna awude gakanaw gam7anee? 4 Issi issi kochaafe heedzu heedzu asata doorite. Issi issi kochay laattana biitta enti yuuyidi, xomoosi be7idi, mazgabidi yaana mela ta enta kiittana. Enti he biittaba xaafi ekidi, simmidi taako yaana. 5 He biitta laapun bessan shaakana. Yihuda kochay dugeha baggan, Yoosefa kochay pudeha baggan de7iya banta biitta oykida mela daana. 6 Ha laapun bessan shaaketana biitta qoncisi xaafidi ekidi yiite. Godaa, nu Xoossaa sinthan entaw saama yeggana. 7 Gidoshin, Leewe kochati kahine gididi, Godaas oothiya gisho, hintera laata biitta ekokona. Gaade kochay, Robeela kochaynne, Minaase kochaafe baggay Yordaanose shaafape doloha baggan, Godaa aylley, Musey entaw immida biitta koyrottidi laatidosona” yaagis.

8 He asati biitta xomoosidi, xaafanaw baanape sinthe, Iyyasuy, “Bidi biitta yuuyidi xomoosidi xaafite; simmidi taako yiite. Taani haysan, Seelon, Godaa sinthan hintew saama yeggana” yaagidi kiittis. 9 Asati bidi, biitta ubbaa yuuyidosona. Katamata ubbaa xaafidi, biitta waati laapun bessan shaakaneko qoncisidosona. Yaati simmidi, Iyyasuy dunkaanida gutaa, Seelo simmidosona. 10 Iyyasuy Godaa sinthan, Seelon entaw saama yeggis. Attida Isra7eele zerethata gakiya laata biitta shaakidi immis.

11 Koyro saamay Biniyaame kochaa enta kochan kochan gakis. Enta gakida biittay Yihudapenne Yoosefa kochaafe giddon de7ees. 12 Pudeha baggara enta zaway Yordaanosepe dendidi, Iyaarko pude keyidi, wuloha baggan de7iya derey dariya biitta kanthidi, Beet-Aweena mela biittan eqees. 13 He zaway dugeha baggara kase Looza geetetidi xeegetiya Beetele kanthidi, dugeha Axaroot-Adaare wodhidi, Beet-Horonape dugeha baggan de7iya zuman zawatees. 14 He zaway dugeha baggara Beet-Horona sinthan de7iya zumaape wuloha bagga xaaxetidi, Yihuda kochaa katama gidida, Qiriyaat-Ba7aale woyko Qiriyat-Yi7aarima aadhees. Hessi wuloha baggara de7iya zawa. 15 Dugeha bagga zaway wuloha baggara Qiriyaat-Yi7aarimepe dendidi, Naftooha pultotan zawatees. 16 Hessafe he zaway duge bidi Raafayme zangaarape pudeha baggan de7iya Henooma zangaarape sintha baggara duge wodhees. Yaape Yaabuseta katamaape dugeha baggan de7iya lanqiya oykidi, Hinoome zangaara wodhidi, Enrogeelan zawatees. 17 Yaape pudeha bagga mirqetidi Enshemeshe baggara Adumima zuma sinthan de7iya Geliloota gakees. Yaape qassi Robeela na7aa Bohaana shuchaako duge wodhees. 18 Qassi Beet-Araba pudeha bagga lanqiya oykidi, duge Yordaanose zangaara wodhees. 19 Hessafe Beet-Hogila pudeha lanqiya kanthi bidi, Yordaanose shaafay goggidi geliya Maxine Abbaafe pudeha bagga gaxa gakees. Haysi dugeha bagga zawa. 20 Doloha bagga zaway Yordaanose shaafa. Biniyaame kochati laattida biittay ubba baggara zawatida zaway haysa.

21 Biniyaame kochay banta kochan kocha laattida katamati, Iyaarko, Beet-Hogila, Emeq-Qaxixa, 22 Beet-Araba, Zamarayme, Beetele, 23 Awiime, Paara, Ofira, 24 Kefaar-Amoona, Ofinanne Gib7a. Enti kumethi tammanne nam7u katama. Enta yuushuwan de7iya gutatika enta bolla guzhetoosona. 25 Qassi Gaba7oona, Rama, Be7erota, 26 Mixipha, Kefira, Mooxa, 27 Reqeema, Yirpha7eela, Tarala, 28 Xela7a, Elefa, Yerusalaame geetetiya Yaabuseta katama, Gib7anne Qiriyat-Yi7aarima. Enti kumethi tammanne oyddu katama. Enta yuushuwan de7iya gutatika enta bolla guzhetoosona. Biniyaame kochay banta kochan laattida biittay haysa.