1 Nam7antho saamay Simoona kochaa enta kochan kochan gakis. Enti laattida biittay Yihuda kochati laattida biitta giddon de7ees. 2 Enti laattida katamati, Barsaabe woyko Seeba, Molada, 3 Haxar-Shu7aala, Bala, Exema, 4 Eltolaada, Batula, Horma, 5 Xiqilaaga, Beet-Markaboota, Haxar-Suusa, 6 Beet-Laba7ootanne Sharuha. Enti kumethi tammanne heedza katama. Enta yuushuwan de7iya gutati enta bolla guzhetoosona. 7 Qassi hara bessan Ayna, Irmoona, Eteranne Ashana geetetiya oyddu katamatanne enta yuushuwan de7iya gutata oykidosona. 8 Simoona biittay dugeha baggan de7iya Ba7ilaat-Ba7eera woyko Rama katamatanne enta yuushuwan de7iya gutata ubbaa gakees. Simoona kochay banta kochan kochan laattida biittay haysa. 9 Yihuda kochata gakida biittay dalga gidida gisho, iyape shaaketidi, Simoona kochatas imetis.

10 Heedzantho saamay Zabloona kochaa enta kochan kochan gakis. Enti laattida biittay Sarida gakees. 11 Yaape dendidi zaway wuloha baggan de7iya Mar7ala kanthidi, Dabasheeta bochishe, Yoqinaama matan de7iya haatha gakees. 12 Saridape doloha bagga mirqetidi, Kisiloot-Taabora kanthidi Dabirataninne Yaafan zawatees. 13 Yaape wuloha baggara kanthidi, Gaat-Hefeeranne It-Qaxinaana gakidi, Irmoonakonne Ne7ako mirqettees. 14 Pudeha bagga zaway Hanatoone yuuyidi, Yiftaahe zangaaran zawatees. 15 He zaway Qaxata, Nahilaala, Shimroona, Yidaalanne Beeteleme geetetiya katamata oykees. Enti kumethi tammanne nam7u katama; enta yuushuwan de7iya gutati enta bolla guzhetoosona. 16 Zabloona kochati banta kochan kochan laattida katamatinne enta yuushuwan de7iya gutati haysata.

17 Oyddantho saamay Yisakoora kochaa enta kochan kochan gakis. 18 Enta zaway Izra7eele, Kasulota, Suneema, 19 Hafarayma, Shi7oona, Anahaarata, 20 Rabita, Qisoona, Abeexa, 21 Rameta, Enganima, Enhadanne Beet-Phaxexa oykees. 22 He biitta zaway Taabore, Shahaxumanne Beet-Sameesa bochishe bidi, Yordaanose shaafan zawatees. Enti kumethi tammanne usupun katama; enta yuushuwan de7iya gutati enta bolla guzhetoosona. 23 Yisakoora kochay banta kochan kochan laattida biitta giddon de7iya katamatinne enta yuushuwan de7iya gutati haysata.

24 Ichashantho saamay Aseera kochaa enta kochan kochan gakis. 25 Enta biitta zaway, Helqata, Hala, Bexena, Azifa, 26 Alameleke, Amadanne Mishaala ekees. Wuloha baggara Qarmeloosaninne Sihoor-Libnaatan zawatees. 27 Qassi doloha baggara Beet-Daagonako mirqetidi, Zabloonanne Yiftahi7eela zangaara bochishe bidi, pudeha baggara Beet-Emeqanne Ni7eela gakees. Qassi pudeha baggara Kaabula, 28 Ebroona, Rehooba, Hamoonanne Qaana kanthidi, Sidoonan zawatees. 29 He zaway Rama yuuyidi, gimben diretida Xiroosa katamaa gakidi, Hoosako mirqetidi, Medetiraane abban zawatees. Qassi Mahalaba, Akziiba, 30 Uma, Afeeqanne Rehooba geetetiya katamata gakidi zawatees. Enti kumethi laatamanne nam7u katama; enta yuushuwan de7iya gutati enta bolla guzhetoosona. 31 Aseera kochay banta kochan kochan laattida katamatinne enta yuushuwan de7iya gutati haysata.

32 Usupuntho saamay Niftaaleme kochaa enta kochan kochan gakis. 33 Enta zaway Helefapenne Zananime wolaape bidi, Adaam-Neqeba, Yabni7eelanne Laquma kanthidi, wursethay Yordaanose shaafan eqees. 34 Qassi he zaway wuloha baggara Aznoot-Taboorako mirqetidi, Huqooqan eqees. He zaway dugeha baggan Zabloona, wuloha baggan Aseera, doloha baggan Yordaanose shaafa kanthidi Yihudan gakees. 35 Gimben diretida katamati, Xidima, Xeera, Hamaata, Raqata, Kenereeta abba, 36 Adaama, Rama, Haxoora, 37 Qeedesha, Edraa7a, Enhaxoora, 38 Yir7oona, Magdela, Horema, Beet-Anaatanne Beet-Sameesa katamata oykees. He katamati kumethi tammanne uddufuna; enta yuushuwan de7iya gutati enta bolla guzhetoosona. 39 Niftaaleme kochay banta kochan kochan laattida katamatinne enta yuushuwan de7iya gutati haysata.

40 Laapuntha saamay Daane kochaa enta kochan kochan gakis. 41 Enti laattida katamati Xor7a, Eshta7oola, Irshemesha, 42 Sha7albima, Eloona, Yitala, 43 Eloona, Timina, Eqroona, 44 Eltaqa, Gibtoona, Balata, 45 Yehuda, Benebaraaqa, Gaat-Rimoona, 46 Mayarqoona, Raqoonanne Yoophe katama yuushuwan de7iya heerata oykees. 47 Daane kochay enta laata biittay entafe eketin, Lashema katama bidi, olan xoonidi, he kataman de7iya asaa mashshan wodhidi, he biitta bantaba oothidosona. He katama sunthaa laammidi, banta aawa Daane sunthan Daane gidi sunthidosona. 48 Daane kochati banta kochan kochan laattida katamatinne enta yuushuwan de7iya gutati haysata.

49 Isra7eele asay biitta shaahuwa ongida wode, Nawe na7aa Iyyasus laata biitta immidosona. 50 Goday kase kiittidaysada Iyyasuy derey dariya Efreeman de7iya Timnaat-Saara katama immana mela oychin, iyaw immidosona. He katamaa zaari giigisidi, yan de7is. 51 Kahiney Alaazari, Nawe na7aa Iyyasuynne Isra7eele soo asaa halaqati Seelon, Godaa sinthan Xoossaa dunkaaniya pengen saama yeggidi, shaakida laata biittay haysa. Enti biitta shaakidi ongidosona.