1 Hessafe guye, Goday Iyyasuko haysada yaagis; 2 “Taani Muse baggara kiitidaysada, ‘Asay baqatidi attiya katamata dummayana mela’ Isra7eele asaas oda. 3 Oonika qoponnanne eronna ase wodhiko, yaa baqatidi gukida suuthaa gisho suuthi zaaranaw koya uraape attana. 4 Ase wodhidaysi he katamatape issuwako baqatidi bidi, katamaa pengen eqidi, hanidaba ubbaa he katamaa cimatas odo. Hessafe guye, enti banta katamaa efidi, I daana bessi immiko entara yan de7o. 5 Suuthaa gisho suuthi zaaranaw koya uray iya kaallidi yiiko, I ba ishaa eridi, qohanaw koyidi wodhiboonna gisho he katamaa cimati iya aathidi immofo. 6 Shango sinthan shiiqidi, pirdetana gakanawunne he wode de7iya kahine halaqay hayqana gakanaw he kataman de7o. Hessafe guye, baqatidi keyida katamaa guye simmidi ba soo gelo” yaagis.

7 Yaatin Isra7eele asay derey dariya Niftaalemen Galilan de7iya Qaadesa, derey dariya Efreeman de7iya Seekemanne derey dariya Yihudan de7iya Qiriyaat-Arba woyko Kebroona dummayidosona. 8 Yordaanose shaafape hefinthan, Iyaarkofe doloha baggan dhoqan, mela biittan, Robeela, kochata biittan de7iya Boosora, Gaade kochata biittan, Galadan de7iya Ramotanne Minaase kochata biittan, Baasanen de7iya Goolana dummayidosona. 9 Isra7eele asaynne enta giddon de7iya betanchoti baqatidi attana mela dummatida katamati haysata. Oonika eronna de7ishe ase wodhiko, shango sinthan pirdetonna de7ishe, hayqonna attanaw ha katamatape issuwako baqatanaw danda7ees.