1-2 Hessafe guye, Isra7eele asay Kanaane biittan, Seelon dunkaanidi de7ishin, Leewe soo asaa halaqati kahiniya Alaazarako, Nawe na7aa Iyyasukonne Isra7eele halaqatako yidi, “Nuuni daana katamatanne mehe heemmiya biitta nuus immana mela, Goday Muse baggara kiittis” yaagidosona. 3 Hessa gisho, Goday kiitidaysada, Isra7eele asay Leewetas katamatanne mehe heemmiya biitta banta biittafe shaakidi, immidosona.

4 Koyro saamay Qahaata kochaas keyis. Kahiniya Aarona kochay, Yihuda, Simoonanne Biniyaame kochaafe tammanne heedzu katamata saaman ekidosona. 5 Attida Qahaata kochay, Efreema, Daanenne wuloha baggan de7iya Minaase kochaafe tammu katamata saaman ekidosona.

6 Gedisoona kochay, Yisakoora, Aseera Niftaalemenne doloha baggan de7iya Minaase kochaafe tammanne heedzu katamata saaman ekidosona.

7 Meraara kochay, Robeela, Gaadenne Zabloona kochaafe tammanne nam7u katamata ekidosona.

8 Goday Muse baggara kiitidaysada, Isra7eele asay ha katamatanne mehe heemmiya biitta Leewetas saaman shaakidi immidosona.

9 Isra7eele asay Yihudanne Simoona kochaafe kaallidi sunthan xeegetida katamata immidosona. 10 Koyro saamay Leewe kochaafe yeletida, Qahaata koche gidida Aarona yaraas keyin, entaw imetida katamati haysata; 11 Derey dariya Yihudan de7iya Qiriyaat-Arba woyko Kebroonenne iya yuushuwan de7iya hentha biittata entaw immidosona. (Arbi Anaaqe aawa.) 12 Shin koyro he katama yuushuwan de7iya biittanne gutata Yoofona na7aa Kaalebas laata oothidi immidosona. 13 Kahiniya Aarona yaraas ase wodhida asi baqatidi attiya Kebroonenne hentha biitta, Libinanne hentha biitta, 14 Yatiranne hentha biitta, Eshtamoo7anne hentha biitta, 15 Holonanne hentha biitta, Dabiranne hentha biitta, 16 Aynanne hentha biitta, Yuuxanne hentha biitta, Beet-Sameesanne hentha biitta. Haysati Yihudapenne Simoonape eketida, katamati kumethi uddufuna. 17 Biniyaame kochaafe eketida oyddu katamati, Gaba7oonanne hentha biitta, Gib7anne hentha biitta, 18 Anatootenne hentha biitta, Almoonanne hentha biitta. 19 Aarona koche gidida kahinetas imetida katamatinne hentha biittati tammanne heedza.

20 Leewe koche gidida, attida Qahaata kochaas, Efreemas imetida biittafe shaaketidi imetis. 21 Qassi entaw derey dariya Efreeman, ase wodhida asi baqatidi attiya oyddu katamati Seekemanne hentha biitta, Gezeranne hentha biitta, 22 Qibxaymanne hentha biitta, Beet-Horonanne hentha biitta immidosona. 23 Daane kochaafe shaaketi imetida oyddu katamati, Eltaqanne hentha biitta, Gibetonanne hentha biitta, 24 Eloonanne hentha biitta, Gaat-Rimoonanne hentha biitta. 25 Minaase kocha baggafe shaaketi imetida nam7u katamati, Tanakanne hentha biitta, Gaat-Rimoonanne hentha biitta. 26 Attida Qahaata kochati hentha biittara issife tammu katama ekidosona.

27 Hara Leewe koche gidida Gedisoona kochaas imetida biittay, Minaase kocha baggaafe ase wodhida asi baqatidi attiya nam7u katamati, Baasanen de7iya Goolananne hentha biitta, Be7eshtiranne hentha biitta. 28 Yisakoora kochaafe imetida oyddu katamati, Qisoonanne hentha biitta, Debraatanne hentha biitta. 29 Yarmutanne hentha biitta, Enganimanne hentha biitta. 30 Aseera kochaafe shaaketi imetida oyddu katamati Mishaalanne hentha biitta, Abdoonanne hentha biitta, 31 Helqatenne hentha biitta, Rehoobanne hentha biitta. 32 Niftaaleme kochaafe shaaketi imetida heedzu katamati, ase wodhida asi baqatidi attiya, Galilan de7iya Qaadesanne hentha biitta, Hamoot-Dooranne hentha biitta, Qartananne hentha biitta. 33 Gedisoona kochati hentha biittara issife tammanne heedzu katamata ekidosona.

34 Leewe koche gidida attida Meraara kochati, Zabloona kochaafe shaaketi imetida oyddu katamati, Yoqnaamanne hentha biitta, Qartananne hentha biitta, 35 Diminanne hentha biitta, Nahilaalanne hentha biitta ekidosona. 36 Robeela, kochaafe shaaketidi imetida oyddu katamati, Boosoranne hentha biitta, Yahaaxanne hentha biitta, 37 Qidemootanne hentha biitta, Mefaatanne hentha biitta. 38 Gaade kochaafe shaaketidi imetida oyddu katamati, Galadan ase wodhida asi baqatidi attiya, Ramotanne hentha biitta, Mahinayme, 39 Haseboona, Ya7izeera. 40 Leewe koche gidida attida Meraara kochay ekida katamati tammanne nam7a.

41 Isra7eele asay laattida biittafe Leewe kochaas imetida katamati hentha biittara issife oytamanne hospuna. 42 He katamata ubbaa yuushuwan hentha biittati de7oosona.

43 Goday enta aawatas immana gidi caaqida biitta ubbaa Isra7eele asaas immis. Enti he biitta laattidi, yan de7idosona. 44 Goday enta aawatas caaqidaysada, enta saron wothis. Enti olas keyida wode ubban enta morketi entara eqetanaw danda7ibookona. 45 Goday Isra7eele asaas immana gidi caaqida lo77oba ubbaa polisipe attishin, issoyka attibeenna.