Leeweta Maxaafa
Gaatha Qofa
Leeweta maxaafay, Leewe kochaafe gidida Leeweti waatidi banta oosuwa oothaneko qoncisees. He oosotape koyroy, asay kumetha xaalatethan Xoossako shiiqana mela yarsho shiisho; nam7anthoy, tunanne tuna gidonabata shaakidi asaa Xoossa sinthan tunatethafe geeshsho.
Maxaafas gul7a qofay Xoossa geeshshatethi. “Taani, Goday, hinte Xoossay, geeshshi gidiya gisho, hinteka geeshshi gidite” yaagis. Qassi Xoossa asay ha geeshshi gidida Isra7eele Xoossara shiphi gidi daana melanne waanidi iya goyinnanaw bessiyako paadidi bessees.
Leeweta maxaafan daro eretida kiitay, Yesuusi gita kiita gidi nam7antho dethan wothida, “Ase ubbaa ne huupheda dosa” geetetidi xaafetida qaala (Leewe 19:18).
Maxaafa Ayfe Qofata
Yarsho wogata (1:1—7:38)
Kahineta shuumo woga (8:1-36)
Aarona yarshuwa (9:1-24)
Nam7u kahineta hayquwa (10:1-20)
Tunanne tuna gidonabata (11:1—15:33)
Atotethaa gallasinne iya wogata (16:1-34)
Dumma dumma higgeta (17:1—20:27)
Dumma dumma ba7aaleta boncho woga (21:1—25:55)
Anjonne seera (26:1-46)
Qaala caaqonne yarsho wogata (27:1-34)
1
Xuussa Yarsho
1 Godaa Xoossay, Geeshsha Dunkaaniya giddon gididi Muse xeegidi yaagis; 2 Isra7eele asaas haysada yaagada oda; hintefe oonika Godaas yarsho yarshiya wode ba mehiyape, ba dorsafenne ba deeshape eho. 3 He yarshoy mehepe xuussa yarshos gidiko borey bayna wofaano gido. Goday he yarshuwa ekana mela Geeshsha Dunkaaniya geliya pengen yarsho. 4 Yarshuwa yarshiya uray xuussa yarshos ehida mehiya huuphen ba kushiya wotho. Hessi iya nagara atotethas Goday ekida yarsho gidana. 5 I he wofaanuwa Godaa sinthan shuko; kahineti, Aarona nayti he suuthaa ekidi, Geeshsha Dunkaane geliya pengen de7iya yarsho bessa oyddu maazaneta bolla wurxo. 6 He mehiya galbaa qaaridi, ashuwa qommon qommon kesso. 7 Kahiniya Aarona nayti yarsho bessan mithi wothidi tama eetho. 8 Kahineti, Aarona nayti he kessida ashuwa bolla huuphiyanne modhuwa gujidi, yarsho bessan taman de7iya mithaa bolla maarayidi wotho. 9 Shin he uray ulo ashuwanne gedata haathan meecco. Kahiney he ubbaa yarsho bessan xuuggo; hessi Godaas taman xuugetiya sawo tonku giya yarsho gidana.
10 Xuugetiya yarshos I immiya imoy dorsaafe woyko deeshape gidiko, borey bayna maraze woyko kole gido. 11 He mehiya yarsho bessaafe pudeha baggara Godaa sinthan shuko. Kahineti, Aarona nayti he suuthaa ekidi yarsho bessa oyddu maazaneta ubbaa bolla wurxo. 12 He uray ashuwa qommon qommon kesso; kahiney he kessida ashuwa bolla huuphiyanne modhuwa gujidi, yarsho bessan taman de7iya mithaa bolla maarayidi wotho. 13 Shin he uray ulo ashuwanne gedata haathan meecco; kahiney he ubbaa yarsho bessan xuuggo; hessi Godaas taman xuugetiya sawo tonku giya yarsho gidana.
14 Godaas yarshetiya xuussa yarshoy kafo gidiko holle woyko kuraacho gido. 15 Kahiney hessa ekidi qoodhiya kushera duutho; huuphiya yarsho bessa bolla de7iya taman xuuggo. Iya suuthay yarsho bessa miyera guko. 16 Ulo ashuwanne qefiya kessidi, yarsho bessaafe doloha baggara bido qoliya bessan yeggo. 17 I he kafuwa qefeta oykidi shaako, shin kumethi shaakofo. Kahiney yarsho bessa bolla de7iya taman wothidi xuuggo; hessi Godaas taman xuugetiya sawo tonku giya yarsho gidana.