1 Oonika katha yarsho Godaas yarshiya wode he yarshoy lo77o dhiille gido; iya bolla zaytenne ixaane gujo. 2 Hessa kahine gidida Aarona naytako eho; kahineti he lo77o dhiilliyafe issi kuuca ekidi, zaytenne ixaane ubbaa gujidi yarsho bessa bolla taman xuuggo. Hessi Godaas taman xuugetiya sawo tonku giya qofiso yarsho gidana. 3 Katha yarshuwafe attidaysi Aaronasinne iya naytas gidana. Hessi Godaas taman xuugetida ubbaafe geeshsha yarsho gidana.

4 Yarshetiya uythay coocen kompetida gidiko, zaytera munuqetida lo77o dhiille gido. He uythay irshoy bayna zayten munuqetidaysa woyko lee7on uuketidi zayten tiyetidaysa gido. 5 Yarshetiya uythay beshen uuketidaba gidiko, irshoy bayna zayten munuqetida lo77o dhiille gido. 6 Iya menthada iya bolla zayte tigada katha yarsho oothada yarsha. 7 Ne yarshiya kathay oton kaxidaba gidiko zayten munuqetida lo77o dhiille gido. 8 Hessada hanidi giigida kathaa yarshuwa Godaas ehada kahiniyas imma; kahiney hessa ekidi yarsho bessan yarsho. 9 Kahiney he katha yarshuwa ekidi, yarsho bessan xuussa yarsho oothidi taman xuuggo. Hessi Godaas taman xuugetiya sawo tonku giya qofiso yarsho gidana. 10 Katha yarshuwafe attidaysi Aaronasinne iya naytas gidana. Hessi Godaas taman xuugetida ubbaafe geeshsha yarsho gidana.

11 Neeni irsho woyko eessi Godaas taman xuuggada yarshanaw bessonna gisho Godaas hinte ehiya katha yarshoy irshoy de7iyaba gidopo. 12 Hayisata bayra yarsho oothidi Godaas yarshanaw danda7eeta, shin sawo tonku giya yarsho oothidi Godaas yarsho bessan xuuggofite. 13 Maxiney, neeni ne Xoossara caaqida caaquwas malla gidiya gisho ne katha yarsho ubban maxine yegga. Ne katha yarsho ubbaa maxinen mal7etha. 14 Neeni kathaafe bayra Godaas ehiya wode caacetidi shirketida tiya gidanaw bessees. 15 Hessi katha yarsho gidiya gisho iya bolla zayte tiga; ixaane wotha. 16 Kahiney he caacetidi shirketidanne zaytey tigetida katha yarshuwafe bagga ekidi ixaane ubbaara qofiso yarsho oothidi Godaas taman xuuggo.