1 Issi asi issifetetha yarshos ba mehiyape borey bayna ussi woyko wofaano Godaa sinthe shiisho. 2 Yarshanaw ehida mehiya huuphen ba kushiya wothidi Geeshsha Dunkaaniya pengen shuko. Kahineti, Aarona nayti suuthaa ekidi yarsho bessa oyddu maazaniya bolla wurxo. 3 Issifetetha yarshuwafe xuussa yarsho oothidi Godaas shiisho; hessika ulo ashuwa kammida moodhiya, 4 nam7u kilahota, enta bolla de7iya moodhiyanne tiriya xeera baggaa eko. 5 Aarona nayti hessa xuussa yarshuwara issife yarsho bessa bolla de7iya mithaa bolla wothidi xuuggo. Hessi Godaas xuugetiya sawo tonku giya yarsho gidana.

6 Issifetetha yarshos shiiqey macca woyko adde dorse gidiko borey baynaba gido. 7 Issi asi dorsa urge yarshiyaba gidiko hessa Godaa sinthan shiisho. 8 He dorsa urgiya huuphen ba kushiya wothidi Geeshsha Dunkaaniya pengen shuko. Aarona nayti suuthaa ekidi yarsho bessa oyddu maazaniya bolla wurxo. 9 Issifetetha yarshuwafe Godaas xuussa yarsho oothidi yarsho; hessika modhuwa, goynaape bidi zoko meqethaa gakanaw de7iya modhuwa, ulo ashuwa kammida moodhiya, 10 nam7u kilahota, enta kammida moodhiya tiriya xeera baggaa eko. 11 Kahiney hessa Godaas xuussa yarsho oothidi yarsho bessan xuuggo.

12 I yarshey deeshe gidiko I hessa Godaa sinthe shiisho. 13 Iya huuphen ba kushiya wothidi Geeshsha Dunkaaniya sinthan shuko. Aarona nayti suuthaa ekidi yarsho bessa yuushuwa wurxo. 14 I he yarshuwafe ekidi Godaas xuussa yarsho oothidi yarsho; hessika ulo ashuwa kammida moodhiya ubbaa, 15 nam7u kilahota, enta kammida moodhiya tiriya xeera baggaa eko. 16 Kahiney hessa Godaas sawo tonku giya yarsho oothidi yarsho bessan xuuggo. Modho ubbay Godaaba.

17 Hinte modhonne suuthi moopite. Hessi hinttesnne yaana yeletethay de7iya bessa awunka naagiya woga gido.