1 Goday Muses haysada yaagidi odis; 2 Aaronanne iya adde nayta, entara issife kahinetetha ma7uwa, tiyo zaytiya, nagara yarshuwa shuketiya kormaa, nam7u marazetanne, irshoy geliboonna uuketida uythaa wothiya gayta ekada ya. 3 Qassi Isra7eele asa ubbaa xeegada Dunkaaniya penge shiisha.

4 Musey Goday kiitidaysada oothis; asa ubbay dunkaaniya penge shiiqis. 5 Musey asaako, ta oothana mela Goday kiittidaysi haysa.

6 Musey Aaronanne iya adde nayta ehidi haathan meeccis. 7 Aarona ma7uwa mayzidi, danco dancisis; adussa ma7uwa mayzidi iya bolla efuude ma7uwa mayzis. Efuudiya alleeqisidi daddida saqiyan Aarona xeessara gathidi qachis. 8 Efuudiya bolla tira kiise sikidi iyan Uriimenne Tumiime wothis. 9 Aarona huuphen xaatha qace wothis. Goday Muse kiitidaysada xaatha qaciya sintha baggara Geeshsha worqa guche misiliya wothis.

10 Hessafe guye Musey tiyo zaytiya ekidi, Dunkaaniyanne Dunkaaniya giddon de7iya miishe ubbaa tiyidi dummayis. 11 He zaytiyape ekidi yarsho bessa bolla laapun toho wurxis; iya miisheta, meecha keriyanne iya utuwa dummayanaw he zaytiyara tiyis. 12 He tiyo zaytiyape guuthara ekidi Aarona huuphen tigidi iya dummayis. 13 Goday Muse kiittidaysada Musey Aarona adde nayta sinthe aathidi ma7o mayzidi danco dancisis. Enta huuphen xaatha qace wothis.

14 Musey nagara yarshos yarshetiya kormaa ehis; Aaroninne iya adde nayti he kormaa huuphen banta kushiya wothidosona. 15 Musey he kormaa shukidi iya suuthan ba biradhiya yeddi ekidi, yarsho bessan de7iya kaceta tiyidi yarsho bessa geeshshis. Attida suuthaa yarsho bessaafe garsan gussis; hessada oothidi yarsho bessa Xoossas dummayidi geeshshis. 16 Musey ulo ashuwa kammida modhuwa ubba, tiriya xeera baggaa, kilahotanne enta kammida modhuwa ekidi, yarsho bessan xuuggis. 17 Shin Goday Muse kiitidaysada korma galbaa, attida ashuwanne tociya gutaape gaxa kessidi xuuggis.

18 Hessafe guye, Musey xuussa yarshos maraze ehis; Aaroninne iya adde nayti he maraziya huuphen banta kushiya wothidosona. 19 Musey he maraziya shukis; iya suuthaa yarsho bessa oyddu maazaneta bolla wurxis. 20 Musey maraziya ashuwa qommon qommon qanxerethis; huuphiya, attida ashuwanne modhuwa xuuggis. 21 Goday Muse kiitidaysada ulo ashuwanne gedata meeccidi, kumetha dorsaa Godaas sawo tonku giya xuussa yarsho oothidi yarsho bessan xuuggis.

22 Kahineti shuumetiya wode shiiqiya nam7antho dorsaa Musey ehis; Aaroninne iya adde nayti he dorsaa huuphen banta kushiya wothidosona. 23 Musey he maraziya shukis; iya suuthaafe ekidi, Aaronas ushacha haythaa, ushacha kushiya wogga biradhiyanne, ushacha tohuwa wogga biradhiya tiyis. 24 Qassi Musey Aarona adde nayta sinthe aathidi, he suuthaafe ekidi, enta ushacha haythaa, ushacha kushiya wogga biradhiyanne ushacha tohuwa wogga biradhiya tiyis. Yaatidi, Musey attida suuthaa yarsho bessa oyddu maazaneta bolla wurxis.

25 Modhdhuwa, goynaape bidi zoko meqethaa gakanaw de7iya modhuwa, tiriya xeera baggaa, kilahotanne enta kammida modhuwanne ushacha gedaa ekis. 26 Godaa sinthan de7iya gaytape irshoy bayna uuketida issi uythaa, uuketidi zayten tiyetida issi uythaanne lee7on uuketida uythaa ekidi modhuwa bollanne ushacha gedaa bolla wothis. 27 I he katha ubbaa Aarona kusheninne iya adde nayta kushen wothin, Godaa sinthan yuusho yarsho oothidi yarshidosona. 28 Musey he kathaa enta kushepe ekidi, xuussa yarshuwara gathidi, kahineta shuumiya wode Godaas sawo tonku giya yarsho oothidi yarsho bessan xuuggis. 29 Qassi Musey angaasuwa ekidi, yuusho yarsho oothidi Godaa sinthan yarshis. Goday Muse kiitidaysada, kahineta shuumiya wode yarshetiya maraziya ashuwape hessi Muse gakiya gisho.

30 Musey tiyo zaytiyapenne yarsho bessan de7iya suuthaafe ekidi, Aarona bollanne iya ma7uwa bolla, iya adde nayta bollanne, enta ma7uwa bolla wurxis; Aaronanne iya ma7uwa, iya naytanne enta ma7uwa dummayis.

31 Musey Aaronanne iya adde naytako haysada yaagis; ashuwa Dunkaaniya pengen kathite; Aaroninne iya adde nayti ta kiitidaysada gaytan de7iya geeshsha uythaara miite. 32 He ashuwapenne uythaafe palahiday de7iko taman xuuggite. 33 Kahineta shuumiya wogay laapun gallas ekiya gisho he wogay poletiya laapun gallasay wurana gakanaw Dunkaaniya pengefe kare keyopite. 34 Goday kiittin hachi poletida wogay hinte nagaraa quchanaasa. 35 Dunkaaniya pengen laapun gallas kumethi gallasinne qamma gam7ite; Godaa wogaa naagite; ixiko hinte hayqana. Tana Goday kiittiday haysa. 36 Aaroninne iya adde nayti Goday Muse baggara kiittidaba ubbaa oothidosona.