1 Hospuntha gallas Musey Aarona, iya adde naytanne Isra7eele cimata xeegis. 2 Aaronako haysada yaagis; borey bayna issi korma nagaraa yarshos, qassi issi maraze xuussa yarshos Godaa sinthe shiisha. 3 Borey bayna issi kole nagara yarshos, issi laythi kumida marinne dorsa urge xuussa yarshos bantaw ehana mela Isra7eele asaas oda. 4 Qassi issifetetha yarshos issi korma, issi marazenne katha yarshos zaytera munuqetida dhiille ehana mela entaw oda. Hachi Goday hintew qoncana gisho hessa oothite.

5 Enti Musey kiittidaba ubbaa Geeshsha Dunkaaniya sinthe ehidosona; maabara ubbay shiiqidi Godaa sinthan eqidosona. 6 Musey entako, Godaa bonchoy hintew qoncana mela hinte oothana mela Goday kiittiday haysa.

7 Musey Aaronako haysada yaagis; “Yarsho bessaako shiiqada ne nagaraa gisho nagara yarshonne xuussa yarsho yarsha. Goday kiitidaysada asaa nagaraa atotethas yarsho yarsha.”

8 Aaroni yarsho bessaako yidi, ba nagaraa gisho yarshetiya maraa shukis. 9 Aarona nayti suuthaa ekidi iyaw ehidosona; I, ba biradhiya he suuthan yeddi ekidi, yarsho bessan de7iya kaceta tiyis; attida suuthaa yarsho bessaafe garsan gussis. 10 Goday Muse kiitidaysada, ashuwape modhuwa, kilahotanne tiriya xeera baggaa ekidi yarsho bessan xuuggis. 11 Shin attida ashuwanne galbaa gutaape kare kessidi xuuggis.

12 Aaroni xuussa yarshos shiiqida mehiya shukis; iya nayti suuthaa ekidi iyaw ehidosona. I yarsho bessa oyddu maazaneta bolla wurxis. 13 Enti ashuwa qommon qommon kessidi, huuphiyara wolla iyaw ehidosona; I ekidi yarsho bessan xuuggis. 14 Ulo ashuwanne gedata haathan meeccidi, yarsho bessan de7iya xuussa yarshuwa bolla wothidi xuuggis.

15 Hessafe guye, Aaroni asaa gisho yarsho yarshis. I asaa nagaraa gisho yarshetiya koliya ekidi shukis; I kase ba nagaraa yarshidaysada enta nagaraa gisho yarshis. 16 Wogay kiiteysada xuussa yarshos shiiqiya mehiya ehidi yarshis. 17 Katha yarshuwa ehidi, iyape issi kuuca ekidi, wonta wonta xuussa yarshuwa bolla gujidi yarsho bessan xuuggis.

18 Aaroni kormanne maraziya asaas issifetetha yarsho oothidi shukis; iya adde nayti suuthaa iyaw ehidosona; I he suuthaa ekidi yarsho bessa oyddu maazaneta bolla wurxis. 19 Kormanne maraziya ashuwape modhuwa, goynaape bidi zoko meqethaa gakanaw de7iya modhuwa, ulo ashuwa kammida modhuwa, kilahotanne tiriya xeera baggaa ekidi, 20 enti angaaysuwa bolla wothin, Aaroni yarsho bessan xuuggis. 21 Goday Muse kiitidaysada, Aaroni angaaysuwanne ushacha gedaa yuusho yarsho oothidi Godaa sinthan yuushshis.

22 Hessafe guye, Aaroni ba kushiya asaako denthidi enta anjis. I nagara yarshuwa, xuussa yarshuwanne issifetetha yarshuwa yarshidaape guye yarsho bessaafe wodhis. 23 Museynne Aaroni Geeshsha Dunkaaniya giddo gelidosona; enti yaape keyidi asaa anjidosona. He wode Godaa bonchoy asa ubbaas qoncis. 24 Godaa matape tami wodhidi, yarsho bessan de7iya xuussa yarshuwanne modhuwa mis. Asa ubbay hessa be7ida wode ililidosona; gufannidi bonchidosona.