1 Goday Musekonne Aaronako, 2 Isra7eele asaas haysada yaagidi odite; “Biitta bolla de7iya mehetapenne do7atape hinte maanaysati haysata; 3 Shuquley phalqetidaysatanne waammotiya meheta miite. 4 Shin waammotishe shuquley phalqetonaysatanne shuquley phalqethi gididi waammotonayisata moopite. Gimaley waammotees, shin shuquley phalqetonna gisho, hintew tuna gido. 5 Gupalley waammotees, shin shuquley phalqetonna gisho, hintew tuna gido. 6 Eshey waammotees, shin shuquley phalqethi gidonna gisho, hintew tuna gido. 7 Guduntho moopite; iyaw shuquley phalqethi, shin waammotonna gisho, I hintew tuna. 8 Hinte hessata moopite; enta bawuta bochofite; enti hintew tuna.

9 “Haatha giddon de7iya medhetetha ubbaafe hinte maanaysati haysata; Abbaa giddon woyko shaafa haatha giddon de7iya ubbaafe qefeynne poqoy de7iya ubbaa miite. 10 Shin abba giddon woyko goggiya haathan de7iya qefeynne poqoy bayna medhetethati hintew tuna gidiya gisho moopite. 11 Haysati hintew tuna; enta moopite; enta bawuta bochofite. 12 Qefeynne poqoy bayna haatha giddon de7iya medhetethati ubbay hintew tuna.

13 “Kafotape hintew tuna gididaysatinne hinte maanaw bessonnaysati haysata; arganthi, anko, molo kafo, 14 xilo, phirco qommo ubbaa, 15 quuro ubbaa 16 yancho, solo, qoolle, gutto ubbaa, 17 guutha gutto, hazazo, diidinthe, 18 haatha kutto, shi7a anko, daare anko, 19 silaago, saabisanne iya qommo ubba, ayyaana kafonne shirshiqo.

20 “Qefera de7iya oyddu tohon hemetiya laafa medhetethati ubbay hintew tuna. 21 Gidoshin, qefey de7iya oyddu tohon hemeteysatape enta tohuwape bollara gupanaw maaddiya tohoy de7eyisata miite. 22 Hessatika, boole qommo ubbaa, xaqo ubbaanne sere ubbaa. 23 Shin hara qefera de7iya oyddu tohoy de7iya medhetethati ubbay hintew tuna.

24 “Haysati hintena tunisana; enta bawuta bochiya oonika omarsi gakanaw tuna gidana. 25 Enta bawuta denthiya oonika ba ma7uwa meecco; shin omarsi gakanaw I tuna gido. 26 Shuquley de7ishe phalqethi gidonnaysati woyko waammotonnaysati ubbay hintew tuna; enta bochiya oonika tunees. 27 Oyddu tohotan hemetiya do7a ubbaafe gindera hemeteysati hintew tuna; enta bawuta bochiya oonika omarsi gakanaw tunees. 28 Enta bawuta denthiya oonika ba ma7uwa meecco; shin omarsi gakanaw I tuna. Entika hintew tuna.

29 “Sa7ara hemeteysatape haysati hintew tuna. Entika giro, ecere, dumma dumma koche, 30 geegge, haylasho, korche, wakallanne shaaqancho. 31 Sa7ara hemetiya ubbaafe haysati hintew tuna; enta bawuta bochiya oonika omarsi gakanaw tuna gidees. 32 Enta bawuta bochiya ay miisheyka tuna gidees; mitha miishey woyko ma7oy woyko galbi woyko ogoroy tuna gidees. Enta bawutay bochida miishe ubbay haathan muuketidi omarsi gakanaw gam7o; hessafe guye geeshshi gidana. 33 Entafe issuwa bawutay oto giddon wodhidi bentiko, iya giddon de7iyaba ubbay tuna; he otuwa menthite. 34 Ay kathi gidin he otuwa giddon de7iya haathaafe xokiko, he kathay tuna gidees; uyetiyaba gidin, he otuwa giddon de7iko tuna gidees. 35 He bawutape issoy wodhida miishe ubbay tuna; cooce woyko oto gidikoka menthite; enti hintew tuna. 36 He bawutay bochida ubbay tuna gidikoka pultoynne haatha olli tunenna. 37 Enta bawutape issoy zeretha katha bolla wodhiko, hessi tunenna. 38 Shin he zerethaa bolla haathi gukidi simmin, enta bawutape issoy iya bolla wodhiko, he zerethay hintew tuna.

39 “Meetetiya mehetape issoy bawutiko, iya bawuta bochiya oonika omarsi gakanaw tuna. 40 Oonika he mehiya bawutape miiko, ba ma7uwa meecco; omarsi gakanaw I tuna. Oonika iya bawuta tookidi denthiko, ba ma7uwa meecco; omarsi gakanaw I tuna.

41 “Sa7ara gooshetiya medhetethi ubbay hintew tuna; iya moopite. 42 Ulora gooshetiyaba gidin, oyddu tohora hemetiyaba gidin, daro tohoy de7iyaba gidin, sa7ara gooshetiya medhetethi ubbay hintew tuna gidiya gisho moopite. 43 Ha sa7ara gooshetiya medhetethatan hintena tunisopite; enta gaason hinte asatethaa tunisopite. 44 Taani Godaa, hinte Xoossaa. Taani geeshshi gidiya gisho, hintena dummayidi geeshshi gidite. Sa7ara gooshetiyabatan hinte asatethaa tunisopite. 45 Taani hintew Xoosse gidanaw hintena Gibxe biittafe kessida hinte Godaa. Hesaa gisho, taani geeshshi gidiya gisho, hinteka geeshshi gidite.

46 “Mehe, kafo, haatha giddon qaaxiya medhetethi ubbaanne sa7ara hemetiya medhetetha ubbaa wogay haysa. 47 Hessan hinte tunanne tuna gidonnayisata giddon, qassi meetetiyanne meetetonna medhetethata giddon de7iya dummatethaa shaakidi erana.”