12
Maccasi Yeli Simmidi Geeyiya Woga
Goday Museko haysada yaagis; Isra7eele asaas haysada yaagada oda; “Issi maccasi qanthatada adde na7a yeliko, ba kushe metuwa be7iya wode tuna gideysada laapun gallas gakanaw tuna gidana. Hospuntha gallas na7ay qaxaretanaw koshshees. Hessafe guye, maccasiya ba yelo suuthay xiz7ana gakanaw hastamanne heedzu gallas gam7o; qassi ba geeyiya gallasay wurana gakanaw geeshshaba bochofo; Geeshsha Dunkaaniyaka gelopo.
“Shin issi maccasi macca na7a yeliko, ba kushe meto be7ida wode iya tuna gididaysada nam7u saaminta gakanaw iya tuna gidana. Hessafe guye, ba yelo suuthay xiz7ana gakanaw usupun tammanne usupun gallas gam7o.
“Maccasiya adde na7a woyko macca na7a yelada ba geeyiya wodiya ongidaape guye, xuussa yarshos issi laytha dorsenne nagara yarshos qassi issi holle woyko issi kuraacho Geeshsha Dunkaaniya pengen de7iya kahiniyako eho. Kahiney hessa ekidi Godaa sinthan I nagaraa atotethas yarshees. Hessafe guye, iya geeyana. Adde na7a woyko macca na7a yeliya maccasas de7iya wogay haysa.
“Shin iya issi laytha dorse ehanaw danda7onna ixiko, nam7u holleta woyko nam7u kuraachota eho. Entafe issoy xuussa yarshos, qassi issoy nagara yarshos gido. Hessada oothidi kahiney I nagaraa atotethas yarshees; iyaka geeshshi gidana.”