1 Goday Musekonne Aaronako haysada yaagis; 2 “Issi asa asatethaa bolla kixi wodhiko woyko shattoy woyko iralley keyiko iya gogay hargen laametiko, he uraa kahiniya Aaronako woyko kahine gidida iya adde naytape issuwako eho. 3 Kahiney iya goga bolla de7iya madunthaa be7o. He madunxida bessan de7iya ikisey booxikonne madunthay ollatiko, hessi goga harge. Kahiney hessa be7idi uray tuna gideysa eriso. 4 Shin iya gogaa bolla de7iya madunthay boothi gididi, gogaape kanthidi ollatiboonaba gidiko he madunthaa bolla de7iya ikisey booxonnaba gidiko, kahiney he uraa dumma keethan laapun gallas gordidi wotho. 5 Laapuntha gallas kahiney iya zaaridi be7o; I be7iya wode madunthay uraa gogaa bolla dalgonna kaseysda de7iko, kahiney he uraa nam7antho dumma keethan laapun gallas gordidi wotho. 6 Qassika laapuntha gallas kahiney iya be7o; I be7iya wode madunthay dalgonna ixidi dhayi dhayi biiko, kahiney I tuna gideysa eriso. Hessi goo7o gideysa eriso; he uray ba ma7uwa meeccidi tuna gidonaysa erisees. 7 Shin I geeyanaw bana kahiniya bessidaape guye, he goo7oy iya gogaa bolla dalgi dalgi biiko I zaaridi bana bessanaw kahiniyako boo. 8 Kahiney iya be7o; he goo7oy uraa gogaa bolla dalgi dalgi biiko, hessi goga harge gidiya gisho kahiney I tuna gideysa eriso.

9 “Oonika goga hargen oyketiko iya kahiniyako eho. 10 Kahiney iya be7iya wode iya gogaa bolla bootha kixi de7iko, ikisey boothi laammikonne he kixa giddon ashoy bentiko, 11 hessi gogaa bolla gam7ida harge gidiya gisho, kahiney I tuna gideysa eriso. I tuna gideysi eretida gisho, iya dumma keethan gordidi wothanaw koshshenna. 12 Kahiney goga hargey addiya asatethaa bolla dalgiko, huuphepe toho gakanaw ubbaa ma77idaba gidiko be7o. 13 He goga hargey iya asatethaa ubbaa ma7iko, iya asatethay kumethi laametidi boothi gidida gisho, I tuna gidonaysa kahiney eriso. 14 Shin he maduntha giddora ashoy bentiko I tuna. 15 Kahiney he ashuwa be7idi he uray tuna gideysa eriso. He ashoy goga harge gidiya gisho I tuna. 16 Shin he ashoy qassika laametidi booxiko, he uray kahiniyako bo. 17 Kahiney iya be7o; iya madunthay booxidaba gidiko, he uray tuna gidonaysa kahiney eriso; I tuna gidana.

18 “Issi asa bolla merkoy wodhidi paxidaba gidiko, 19 iya bessan bootha kixay wodhiko woyko zo77ida iralley keyiko he uray kahiniyako bo. 20 Kahiney iya be7o; he madunthay ollatiko, madunthaa bolla de7iya ikisey laametidi booxiko, he uray tuna gideysa kahiney eriso. Hessi merkoda doomida goga harge. 21 Shin kahiney be7iya wode ikisey booxonnaba gidiko, madunthay gogaa kanthidi ollatiboonaba gidiko, qassi dhayi dhayi biiko, kahiney iya dumma keethan laapun gallas gordidi wotho. 22 Hessi iya gogaa bolla dalgi dalgi biiko, hessi goga harge gidiya gisho he uray tuna gideysa kahiney eriso. 23 Shin he iralley dalgi dalgi boonna issi bessan de7iko, hessi merkoy paxida beeta gidiya gisho, he uray tuna gidonaysa eriso.

24 “Tami issi asi miiko he mida bessan bootha woyko zo7o iralley keyiko, 25 kahiney he bessa be7o. He bessan de7iya ikisey booxikonne he madunthay ollatiko, hessi goga harge. I tamay mida bessaara keyida gisho kahiney I tuna gideysa eriso. 26 Shin kahiney be7iya wode he madunthaa bolla de7iya ikisey booxonnaba gidiko, madunthay gogaa kanthidi ollatiboonaba gidikonne qassi dhayi dhayi bidaba gidiko, kahiney iya dumma keethan laapun gallas gordidi wotho. 27 Laapuntha gallas kahiney iya be7iya wode he bessay dalgi dalgi biiko, hessi goga harge gidiya gisho I tuna gideysa kahiney eriso. 28 Shin he madunthay gogaa bolla dalgonna aggidi issi bessan uttikonne dhayi dhayi biiko, hessi tamay mida bessan attida beeta gidiya gisho, I tuna gidonaysa kahiney eriso.

29 “Issi addey woyko maccasa huuphen woyko gaco bolla madunthi keyiko, 30 kahiney he madunthaa be7iya wode madunthay gogaa kanthidi ollatiko iya bolla de7iya ikisey lee7idi galal7o daaniko, hessi huuphen woyko gaco bolla keyiya qaachiya goga harge gidiya gisho, he uray tuna gideysa kahiney eriso. 31 Qassi kahiney he hargiya be7iya wode gogaa kanthidi ollatiboonaba gidiko, kareetha ikisey iya bolla dhayiko, he qaachiya hargey de7iya uraa kahiney dumma keethan laapun gallas gordidi wotho. 32 Laapuntha gallas kahiney he hargiya be7iya wode qaachiya hargey dalgonnaba gidiko, iya bolla galal7o daaniya ikisey baynaba gidikonne gogaa kanthidi ollatiboonaba gidiko, 33 he ura qaachiya bessan de7iya ikisiya gidonashin, madunthaa yuushon de7iya ikisiya meedo. Kahiney he uraa dumma keethan hara laapun gallas gordidi wotho. 34 Laapuntha gallas kahiney he qaachiya bessaa be7iya wode uraa galbaa bolla dalgonna ixikonne gogaa kanthidi ollatonna ixiko, he uray tuna gidonaysa kahiney eriso. Uray ba ma7uwa meeccidi geeshshi gidana. 35 Shin I geeydaape guye, qaachiya hargey he uraa galba bolla dalgi dalgi biiko, 36 kahiney iya be7iya wode he qaachiya hargey dalgidaba gidiko, he uray tunida gisho kahiney galal7o daaniya ikisiya koyopo. 37 Shin kahiney be7iya wode he qaachiya bessay dalgonnaba gidikonne kareetha ikisey iya bolla dolidaba gidiko, he qaachiya bessay paxis. He uray tuna gidonna gisho, I geeshshi gideysa kahiney eriso.

38 “Issi adde woyko maccasa goga bolla bootha iralley keyiko, 39 kahiney be7iya wode enta gogaa bolla de7iya iralley bulla gidiko, hessi gogaa bolla coo keydaba gidiya gisho he uray tuna gidenna.

40 “Issi asas huuphe binaanay qoqofetiko, bo77a gideesipe attishin, I tuna gidenna. 41 Issi asi sinthara bo77atiko, iya tiishshi misipe attishin, I tuna gidenna. 42 Shin iya bo77i woyko tiishshi midaysa bolla zo7o woyko bootha madunthi keyiko, hessi iya bo77an woyko iya tiishsha bolla keyida goga harge. 43 Iya kahiney be7iya wode iya bo77i woyko tiishshi midaysa bolla de7iya madunthay galba bolla keyiya goga harge mela zo7o gidiko, 44 he uray tuma goga hargen oyketida hargancho. I tuna gidiya gishonne iya hargey iya huuphen de7iya gisho I tuna gideysa kahiney eriso.

45 “Goga hargey oykida asi peedhetida ma7o ma7o; ba huuphiya pixopo; ba doona kammo; ba qaala dhoqu oothidi, ‘Taani tuna, taani tuna!’ yaago. 46 He hargey iya bolla de7ida wode ubban I tuna. I tuna gidiya gisho, asaape shaaketidi, gutaape karen barka de7o.

47 “Ay ma7o bolla buuqida bessi bentiko, he ma7oy suufe gidin woyko liino gidin, 48 qacinape woyko shalope dadetida liino woyko suufe gidin, galba woyko galbafe oosetida ma7o gidin, 49 he ma7uwa bolla bentida buuqay ciliilo woyko zo7o mala bessiko, I qacinape woyko shalope dadetidaba gidin, galba woyko galbafe oosetidaba gidin, hessi asape ase oykiya harge gidiya gisho, hessa kahiney bessanaw koshshees. 50 Kahiney he buuqa be7idi, he buuqida ma7uwa dumma keethan laapun gallas gordidi wotho. 51 Laapuntha gallas kahiney he ma7uwa be7iya wode he ma7uwa bolla de7iya buuqay dalgi dalgi biiko, I qacina woyko shalo gidin, galba woyko galbafe oosetida ma7o gidin, hessi issuwafe issuwa oykiya buuqa harge gidiya gisho he ma7oy tuna. 52 He ma7oy qacina woyko shalo gidin, liino woyko suufe gidin, galbafe oosetidaba ayba gidin, kahiney iya xuuggo. Hessi issuwafe issuwa oykiya buuqa harge gidiya gisho, I xuugetanaw bessees.

53 “Shin kahiney be7iya wode he buuqa ma7uwa bolla dalgiboonaba gidiko, I qacina woyko shalo woyko galbafe oosetidaba ayba gidin, 54 he buuqay de7iya ma7uwa meeccana mela kahiney kiitto. Hessafe guye, he ma7uwa dumma keethan hara laapun gallas gordidi wotho. 55 He ma7oy meecetidaape guye qassika kahiney be7iya wode he buuqay ba malaa laammonnabaa gidikonne dalgi dalgi boonna ixikoka I tuna. He buuqa bessay ma7uwas guye baggara woyko sintha baggara de7ikoka he ma7oy taman xuugetanaw koshshees. 56 Shin he ma7uwa meecci simmin kahiney be7iya wode buuqay dhayi dhayi biiko, I galba gidin, qacina woyko shalo gidin, he buuqay de7iya bessaa kahiney daakidi kesso. 57 Hessafe guye, ma7uwa bolla simmidi keyiko, he ma7oy qacina woyko shalo gidin, galbafe oosetidaba gidin, hessi dalgi dalgi biiko he buuqay de7iya ma7oy taman xuugetanaw bessees. 58 Shin meecetida ma7oy qacina woyko shalo gidin, woyko galbafe oosetidaba ma7o gidin, buuqa malay dhayiko, he ma7oy nam7antho meeceto; Hessafe guye, I geeyees” yaagis.

59 Issi ma7oy suufe woyko liino gidin, qacina woyko shalo gidin, woyko galbafe oosetidaba gidin, he ma7uwa geeshshi woyko tuna yaagisanaw danda7iya wogay haysa.