1 Goday Museko haysada yaagis; 2 Goga hargey oykida uray geeyiya gallas oothanaw koshshiya wogay haysa. He uraa kahiniyako ehanaw koshshees. 3 Kahiney gutaape gaxaa keyidi iya hargiya be7o. I be7iya wode goga hargey uraa asatethafe dhayidabaa gidiko, 4 kahiney nam7u tuna gidonna kafota, ziga mitha qanxo, zo7o qacinanne hisoophe bonco he hargiyafe geeyiya uraa gisho ehana mela kiitto. 5 Hessafe guye, kahiney nam7u kafotape issuwa pultofe duuqidi keren qolida haatha bolla shukana mela kiitto. 6 Hanko kafuwa zo7o qacinaranne hisoophe boncora ekidi, keren de7iya pulto haatha bolla shukida kafuwa suuthan naaqo. 7 He suuthaa, he goga hargiyafe geeyiya uraa bolla laapun toho wurxo; he uray tuna gidonaysa eriso; paxa de7iya kafuwa demba yeddo.

8 He hargiyafe geeyiya uray ba ma7uwa meecco; ba asatethaa bolla de7iya ikise ubbaa meedeto; ba asatethaa meeceto. Hessafe guye, I geeyidi guta gelo, shin ba dunkaaniya giddo gelonna laapun gallas karen gam7o. 9 Laapuntha gallas ba huuphiya, buuchaa, deemuwanne ba asatethaa bolla de7iya hara ikise ubbaa meedeto; qassi ba ma7uwa meecco; ba asatethaka meeceto; Hessafe guye, I geeshshi gidana.

10 Hospuntha gallasan borey bayna nam7u urge dorsatanne issi laythi gidida issi macca dorse eho. Qassi katha yarshos zaytera munuqetida heedzu kilo giraame lo77o dhiillenne issi litiro zaytepe siko eho. 11 Iya geeshshiya kahiney uraanne I ehida yarshotara issife Geeshsha Dunkaaniya pengen Godaa sinthan shiisho.

12 Kahiney nam7u dorsa urgetape issuwa ekidi, issi litiros siko zaytera issife naaqo yarsho oothidi shiisho; he shiiqida yarshuwa yuusho yarsho oothidi Godaa sinthan shiisho. 13 Yaatidi, I he dorsa urgiya nagara yarshonne xuussa yarsho shukiya geeshsha bessan shuko. Nagara yarshuwa mela naaqo yarshoyka kahiniyas imetees; ika ubbaafe aadhida geeshshi. 14 Kahiney naaqo yarshuwa suuthaafe guuthi ekidi, he geeyiya uraas ushacha bagga haythaa, ushacha kushiya wogga biradhiyanne ushacha tohuwa wogga biradhiya tiyo. 15 Hessafe guye, kahiney zaytiyape guuthara ekidi, ba haddirsa kushiya qaaqan tigo.

16 He haddirsa kushiya qaaqan de7iya zaytiya ba ushacha kushe biradhiya yeddi yeddi ekidi, Godaa sinthan laapun toho wurxo. 17 Yaatidi, ba kushiya qaaqan de7iya zaytiyape ekidi, geeyiya uraas ushacha haytha, ushacha kushiya wogga biradhiyanne ushacha tohuwa wogga biradhiya kase naaqo yarshuwa suuthaa tiyida bessan tiyo. 18 Qassi ba kushiya qaaqan attida zaytiya kahiney geeyiya uraa huuphen gusso; yaatidi Godaa sinthan he uraa nagaraa atto yaagiso.

19 Hessafe guye kahiney geeyiya uraa nagara atotethas shiiqida yarshuwa yarshees; kallidi qassi xuussa yarshos shiiqida mehiya shukees. 20 Kahiney xuussa yarshuwa katha yarshuwara issife yarsho bessan wothidi xuuggees; yaatidi uraa nagaraa atto yaagisees; he uray geeyees.

21 Shin uray hessa ubbaa ehanaw danda7onna manqo gidiko, Godaa sinthan iya nagaraa atotethas yuushshanaw naaqo yarshos issi dorsa urge eho. Katha yarshos zaytera munuqetida issi kilo giraame lo77o dhiillenne issi litiro zaytepe sikuwa eho. 22 Baw danda7etida mela nam7u holle woyko nam7u kuraacho issuwa nagaraa yarshos, issuwa xuussa yarshos eho.

23 Hospuntha gallas ba tunatethaafe geeyiya uray Geeshsha Dunkaaniya pengen Godaa sinthe ehidi kahiniyas immo. 24 Kahiney naaqo yarshos yida dorsa urgiyanne zaytiya ekidi, yuusho yarsho oothidi Godaa sinthan yuushsho. 25 Naaqo yarshos yida dorsa urgiya shuko; He urgiya suuthaafe guuthara ekidi, ha geeyiya uraa ushacha haytha, ushacha kushiya wogga biradhiyanne ushacha tohuwa wogga biradhiya tiyo. 26 Kahiney zaytiyape guuthara ba haddirsa kushiya qaaqan tigo. 27 Haddirsa kushiya qaaqan de7iya zaytiyape ushacha kushiya biradhiya yeddi ekidi, Godaa sinthan laapun toho wurxo. 28 Kahiney ba kushiya qaaqan de7iya zaytiyape guuthara ekidi, geeyiya uraas ushacha haytha, ushacha kushiya wogga biradhiyanne ushacha tohuwa wogga biradhiya kase naaqo yarsho suuthaa tiyida bessan tiyo. 29 Godaa sinthan uraa nagaraa atotethas kahiney ba kushen attida zaytiya geeyiya uraa huuphen tigo. 30 Hessafe guye, geeyiya uray baw danda7etidaysa mela holle woyko kuraacho eho. 31 Issuwa nagara yarshos nam7anthuwa xuussa yarshos katha yarshuwara issife shiisho. Kahiney geeyiya uraa nagaraa Godaa sinthan iya nagaraa atto yaagiso. 32 Ba asatethaa bolla de7iya goga hargiyafe geeyanaw manqotethi diggida uraas de7iya wogay haysa.

33 Goday Musekonne Aaronako haysada yaagis; 34 “Taani hintew immiya Kanaane biitta hinte geliya wode he biittan de7iya hinte keethafe issuwan taani buuqa yeddiya wode, 35 he uray kahiniyako bidi, ‘Ta keetha bolla buuqa daaniyabay de7ees’ yaagidi odo. 36 Kahiney soo gelidi buuqa qommuwa be7anaape kasetidi, son de7iyabay ubbay tuna geetetonna mela son de7iyaba ubbaa kare kessana mela kiitto; hessafe guye, kahiney be7anaw soo gelo. 37 I gelidi be7iya wode buuqay godaa bolla ciliilo woyko zo7o malla bessikonne qassi godaa midi ollayidi giddo geliko, 38 kahiney kare keyidi, keethaa laapun gallas gakanaw gordo. 39 Laapuntha gallasan kahiney he keethaa zaaridi xeelliya wode he buuqay keetha godaa bolla dalgiko, 40 buuqay de7iya shucha ubbaa godaape shoddidi, katamaape gaxa kessidi tuna bessan yeggana mela kiitto. 41 Kaallidi godaa meeshida urqa soo baggara bookidi, yuushshi aathidi qoqofana mela ootho; yaatidi he urqa katamaape gaxan de7iya tuna bessan yeggo. 42 Hessafe guye, he shodetida shuchata bessan hara shuchata wotho; hara urqan keethaa meesho.

43 “Shuchay shodetin, urqay qoqofetin, hara urqa meeshi simmin, buuqay keethaa giddon zaari bentiko, 44 kahiney hessa be7o. I be7iya wode buuqay he keethaa giddon dalgiko, hessi asape ase oykiya buuqa harge gidiya gisho he kathay tuna. 45 Hessa gisho, he keethaa, iya shuchaa, iya mithaanne I meeshetida urqa ubbaa laallidi katamaape gaxa efidi, tuna bessan yeggo. 46 He keethay gordan gam7iya wode iya gido geliya oonika omarsi gakanaw tuna. 47 He keethan aqiya woyko kathi miya uray ba ma7uwa meecco.

48 “Shin kahiney yidi xeelliya wode keethay meeshetidi simmin, zaaridi dalgonna ixiko, buuqay dhayida gisho, he keethay tuna gidonaysa kahiney eriso. 49 Keethaa geeshshanaw nam7u kafota, ziga mitha qanxo, zo7o qacinanne hisoophe bonco eho. 50 Kafotape issuwa pultofe duuqidi keren qolida haathan shuko. 51 Hessafe guye, zigaa, hisoophe boncuwa, zo7o qacinanne paxa de7iya kafuwa ekidi, keren de7iya shuketida kafuwa suuthaninne pulto haathan yeddi ekidi laapun toho he keethaa wurxo. 52 Yaatidi, kahiney he keethaa kafuwa suuthan, pulto haathan, paxa de7iya kafuwan, ziga mithan, hisoophe boncuwaninne zo7o qacinan geeshsho. 53 Paxa de7iya kafuwa katamaape gaxa yeddo. Hessada oothidi, keethaa geeshshiya wogaa polees; keethay geeshshi gidees.

54 “Dumma dumma goga hargeesinne goo7o hargees imetida wogay haysa. 55 Ma7o bolla woyko keetha bolla keyiya buuqa harge gidin, 56 kixa gidin, merko gidin, iralle gidin, 57 issibay tuna gideysanne tuna gidonnaysa erisiya wogay haysa.”