1 Goday Musekonne Aaronako haysada yaagis; 2 Isra7eele asaas haysada yaagidi odite; “Issi asa asatethafe goggiyabay de7iko hessi tuna. 3 Goggiyabay de7iya uraa tuna oothiya wogay haysa; he goggiyabay aggin, aggonna ixin, he uraa tuna oothees.

4 “Iya asatethafe goggiyabay de7iya uray zin7iya hiixaynne uttiya oyde ubbay tuna. 5 Iya hiixa bochiya oonika ba ma7uwa meecco; ba asatethaka meeceto; yaatidi omarsi gakanaw tuna gidees. 6 Goggiyabay de7iya uray uttidaba bolla uttiya oonika ba ma7uwa meecco; ba asatethaka meeceto; yaatidi omarsi gakanaw tuna gidees.

7 “Goggiyabay de7iya uraa asatethaa bochiya oonika ba ma7uwa meecco; ba asatethaa meeceto; yaatidi omarsi gakanaw I tuna gidees.

8 “Goggiyabay de7iya asi tuna gidonna asa bolla cutiko, he uray ba ma7uwa meecco; ba asatethaka meeceto; yaatidi omarsi gakanaw I tuna gidees.

9 “Goggiyabay de7iya uray uttiya toga koori tuna. 10 Iyape garsara de7iyaba bochiya oonika omarsi gakanaw tuna gidees; qassi hessa tookiya oonika ba ma7uwa meecco; ba asatetha meeceto; yaatidi omarsi gakanaw I tuna gidees.

11 “Goggiyabay de7iya asi ba kushiya meecetonna bochiya asi oonika ba ma7uwa meecco; ba asatethaa meeceto; yaatidi omarsi gakanaw tuna gidees.

12 “Goggiyabay de7iya uray bochiya oto ubbaa menthite; mithafe oosetida miishe ubbay haathan meeceto.

13 “Goggiyabay de7iya asi he gogiyabape geeyida wodepe laapun gallas gam7o. Ba ma7uwa meecco; ba asatethaa pulto haathan meeceto; yaatidi I geeshshi gidees. 14 Hospuntha gallasan nam7u holleta woyko nam7u kuraachota ekidi, Geeshsha Dunkaaniya penge, Godaa sinthe ehidi kahiniyas immo. 15 Kahiney holletape issuwa nagara yarshos, issuwa qassi xuussa yarshos yarshees; yaatidi kahiney uraa asatethafe goggiyaba gisho Godaa sinthan iya nagaraa atto yaagisees.

16 “Issi addefe iya atunthay gukiko, ba kumetha asatethaka meeceto; yaatidi omarsi gakanaw I tuna gidees. 17 Atunthay bochida ma7o ubbay woyko galba ubbay haathan meeceto; yaatidi omarsi gakanaw tuna gidees. 18 Issi addey maccara aqin, iya atunthay gukiko, nam7ayka haathan meeceto; yaatidi omarsi gakanaw enti tuna gidoosona.

19 “Issi maccasi ba kushe meto be7iko, laapun gallas gakanaw iya tuna; iyo bochiya oonika omarsi gakanaw tuna.

20 “Ba kushe meto wode iya zin7iya hiixaynne iya uttiya oydey ubbay tuna. 21 Iya zin7iya hiixa bochiya ubbay ba ma7uwa meecco; ba asatethaka meeceto; yaatidi omarsi gakanaw tuna gido. 22 Iya uttiyaba bochiya ubbay ba ma7uwa meecco; ba asatethaa meeceto; yaatidi omarsi gakanaw tuna gido. 23 Iya zin7iya hiixa gidin woyko iya uttiyaba bochiya oonika omarsi gakanaw tuna.

24 “Issi maccasi kushe metora de7iya wode addey iira aqiko, he kushe metuwa I bochiko, laapun gallas gakanaw I tuna gidees; I zin7iya hiixa ubbay tuna gidees.

25 “Issi maccasi, ba kushe meto wodey aadhin, suuthi aggonna goggiko woyko kushe meto wodey ba qammafe aadhidi goggiko, kushe meto wode iya tuna gididaysada suuthay eqana gakanaw iya tuna gidawusu. 26 Suuthi iipe goggiya wode iya zin7iya hiixa ubbay, ba kushe meto be7iya wode iya zin7ida hiixa melanne iya uttiya oydiya mela tuna gidees. 27 He tunidabata bochiya oonika tuna gidiya gisho I ba ma7uwa meecco; ba asatethaa meeceto; yaatidi omarsi gakanaw tuna gidees.

28 “Iipe goggiya suuthay eqiko, iya he wodepe doomada laapun gallas gam7o; hessafe guye, iya geeshshi gidana. 29 Hospuntha gallas iya nam7u holleta woyko nam7u kuraachota ehada Geeshsha Dunkaaniya pengen kahiniyas immo. 30 Kahiney holletape issuwa nagaraa yarshos, issuwa xuussa yarshos yarsho. Yaatidi, kahiney iipe goggiya tunatethaa gisho Godaa sinthan I nagaraa atto yaagisees.

31 “Isra7eele asay banta giddon de7iya Geeshsha Dunkaaniya tunisidi, hayqonna mela neeni haysada oothada enti bantana tunisiyabape dummayidi daana mela naaga.”

32 Iya asatethafe goggiyabay de7iya asas, iya atunathay gukin tuniya addes, 33 ba kushe meto gaason tuniya maccasas, adde gidin macca gidin goggiyabay de7iya asaasinne tunida maccara aqiya addes imetida wogay haysa.