1 Aarona adde nayti nam7ay Godaa sinthe shiiqidi hayqidaape guye, Goday Museko haysada yaagis: 2 Taani Taabotiya nagara atotetha kamaa bolla shaaran gidada qonciya gisho magarajuwafe guyen de7iya Ubbaafe Geeshsha Bessaa ba koyida wode gelidi hayqonna mela ne ishaa Aaronas oda. 3 Aaroni nagaraa yarshos issi wofaano, xuussa yarshos issi maraze ekidi Ubbaafe Geeshsha Bessaa gelo. 4 Aaroni liinope oosetida geeshsha adussa qamisenne garsara ma7etiya ma7o ma7o. Liinope oosetida danco danco; hessada ba huuphen liinope oosetida xaatha qace wotho. He ma7oti geeshshi gidiya gisho, ma7anape sinthe ba asatethaa meeceto.

5 Isra7eele maabaray nagara yarshos nam7u koleta, xuussa yarshos issi maraze Aaronas eho. 6 Aaroni ba nagarasinne ba soo asaa nagaraa atotethas issi wofaano yarsho. 7 Hessafe guye, nam7u koleta Geeshsha Dunkaaniya pengen Godaa sinthe eho. 8 He nam7u deeshata ekidi issuwa Godaasa, issuwa qassi Azaazelasa*Azaazelasa: Ibraawetho doonan mela biitta yedeteysa guussu. gidi enta bolla saama yeggo. 9 Aaroni saaman Godaas gidida deesha ekidi nagara yarsho oothidi yarsho. 10 Shin saaman Azaazelas gidida deesha asa nagaraa atotethas mela biitta yeddanaw paxa de7ishin Godaas shiisho.

11 Aaroni ba nagarasinne ba soo asaa nagaraa atotethas issi wofaano nagaraa yarsho oothidi shiisho. Yaatidi ba nagaraa gisho he wofaanuwa shuko. 12 Godaa sinthan de7iya yarsho bessaafe ixaane cuyisiya miishen bonqo kunthidi, liiqidi gaacetida sawiya ixaane nam7u kuuca ekidi magarajuwa giddo gelo. 13 Godaa sinthan de7iya taman ixaane wotho. I hayqonna mela ixaaniya cuyay Taabotiya bolla de7iya nagara atotetha kamaa kammo. 14 Wofaanuwa suuthaafe guuthara ekidi, ba biradhiya yeddi ekidi atotetha kamaa sintha baggaa wurxo. Nagara atotetha kamaa sintha baggara de7iya bessaa laapun toho wurxo.

15 Hessafe guye, asaa nagaraa gisho gidiya deesha shukidi, iya suuthaa magarajuwa giddo ehidi, wofaanuwa suutha wurxidaysada nagara atotetha kamaanne Taabotiya sinthaa wurxo. 16 Ubbaafe Geeshsha Bessaa Isra7eele asaa tunatethafenne nagarape geeshshees. Enti tunabaa oothishin, enta giddon de7iya Geeshsha Dunkaaniya haysada oothidi geeshsho. 17 Aaroni Ubbaafe Geeshsha Bessaa gelidi, ba nagaraa, ba soo asaa nagaraanne kumetha Isra7eele asaa nagaraa atotethas yarshidi keyana gakanaw, oonika geeshsha Dunkaaniya giddon de7opo.

18 Hessafe guye, Godaa sinthan de7iya yarsho bessa keyidi iya geeshsho. Wofaanuwa suuthaafenne deesha suuthaafe guuthara ekidi, yarsho bessa yuushuwan de7iya kaceta tiyo. 19 He suuthan ba biradhiya yeddi ekidi laapun toho wurxo; hessada oothidi Isra7eele asaa tunatethaafe he yarsho bessa geeshsho.

20 Aaroni Ubbaafe Geeshsha bessaa, geeshsha Dunkaaniyanne yarsho bessa geeshshiya wogaa polidaape guye, paxa de7iya deesha shiisho. 21 Aaroni ba nam7u kushiya paxa de7iya deesha huuphen wothidi, Isra7eele asaa naaqo ubbaa, enta makalla ubbaa, enta nagara ubbaa paaxo. Yaatidi he deesha huuphen hessa toosso; he deesha efana mela giigisida uraa bolla mela biitta yeddo. 22 Deeshay enta nagara ubbaa tookidi, asi bayna bessi mela biitta bo.

23 Hessafe guye, Aaroni Geeshsha Dunkaaniya bidi Ubbaafe Geeshsha bessaa gelo. Liinope oosetida kase I ma7idi gelida ma7uwa qaaridi yan wotho. 24 Geeshsha bessan ba asatethaa meecetidi, ba kase ma7uwa ma7i keyidi ba nagaraanne asaa nagaraa atotethas xuussa yarsho yarshsho. 25 Nagara yarshuwa modhuwa yarsho bessan xuuggo.

26 Bazzo yedetiya deesha efida uray ba ma7uwa meecco; ba asatethaa meeceto; yaati simmidi guta gelo.

27 Nagara atotethas Aaroni enta suuthaa Ubbaafe Geeshsha bessaa ehida wofaanuwanne deesha galbaa, attida ashuwanne tociya gutaape gaxa kessidi xuuggo. 28 Hessa xuuggida uray ba ma7uwa meecco; ba asatethaa meeceto; hessafe guye, gutaa gelo.

29 Haysi hintew merinaa woga gido; laapuntha ageenay gelida tammantho gallas hintena kawushite; biitta aawu na7a gidin woyko hara biitta asi gidin, ay oosoka oothopite. 30 Ayis giiko he gallasay hinte nagara atotethi demmiya gallas; hinte Godaa sinthan hinte nagara ubbaafe geeyana. 31 Hessi hintew gita Sambaata shempo gallas gidana. He gallas hintena kawushite; hessi hintew merinaa woga gido. 32 Qassi ba aawa bessan kahine gidana mela tiyetiyanne dummatiya kahiney geeshshi gidida liinope oosetida ma7uwa ma7idi, nagaraa atotetha wogaa polo. 33 I ubbaafe Geeshsha bessaa, Geshsha Dunkaaniya, yarsho bessa, kahinetanne Isra7eele asa ubbaa geeshsho. 34 Isra7eele asa ubbaa nagaraa atotethas laythan laythan issi toho oothanaw haysi hintew merina woga gido. Goday kiitidaysada Musey oothis.