1 He wode “Paasika” giya Uytha Ba7aaley matis.Kessa 12:1. 2 Kahine halaqatinne higge astamaareti ase yayiya gisho, waatidi Yesuusa banta giddofe dhaysaneko oge koyoosona. 3 Xalahey tammanne nam7atape issuwa gidida Asqoroota Yihuda geeteteysa gido gelis. 4 Yihudi kahine halaqatakonne Xoossa Keetha naageysata halaqatako bidi Yesuusa waati aathidi immaneko entara maqetis. 5 Entika hessan ufaytidi miishe immanaw iyara zoretidosona. 6 Ika zoretethan giigis. Aathi entaw immanaw asi bayna inje wode naagishe de7ees.

7 Hessafe guye, Paasika dorsay shuketiya Uytha Ba7aaley gakis. 8 Yesuusi, “Paasika kahuwa maana mela bidi nuus giigisite” yaagidi Phexroosanne Yohaanisa kiittis. 9 Enti, “Nu awun giigisana mela ne koyay” yaagidi oychidosona. 10 I entako, “Heko hinte katama gelishin haatha oto tookida addey hintera gahetana. I bidi geliya keethaa iya kaallidi gelite. 11 Astamaarey godaako, ‘Ta ta tamaaretara wolla Paasika kahuwa maanaw imatha keethi awunee? yaagis’ giite. 12 I pooqiya bolla hiixetidi giigidi de7iya dalga kifile hintena bessaana, yan giigisite” yaagis. 13 Enti bidi Yesuusi gidaysada hanin demmidosona. Paasika ba7aale kahuwa yan giigisidosona.

14 Saateyka gakida wode Yesuusi hawaaretara wolla kahuwa bolla uttis. 15 I entako, “Ta waaye ekanaape sinthe ha kahuwa hintera maanaw daro amottas. 16 Hiza, si7ite! Xoossaa kawotethan haysas birshethay poletana gakanaw ha kahuwa zaarada miike” yaagis. 17 Ushshaa ekidi galati simmidi, “He7ite haysa hinte giddon shaaketite. 18 Si7ite! Xoossaa kawotethay yaana gakanaw hachife doomada ha woyne ushshafe zaarada uyike” yaagis.

19 Uythaa ekidi, galati simmidi, “Haysi hintew imetiya ta ashuwa. Haysa oothishe tana qopite” yaagidi menthidi entaw immis.

20 Hessadaka, kahuwape guye, ushsha ekidi, “Ha ushshay hintew gukida ta suuthan gidiya ooratha caaquwa.Ermi 31:31. 21 Gidoshin, tana aathidi immana uraa kushey taara issife gaytaana.Maz 41:9. 22 Asa Na7ay iyaw geetetoysa mela hayqanaw de7ees, shin iya aathidi immiya uraa ayye!” yaagis. 23 Enti banta giddon, “Haysa ooni oothanee” gidi woli oychidosona.

24 Qassi enta giddon gita gidanay oone giya palami medhetis.Maato 18:1; Mar 9:34; Luqa 9:46. 25 Yesuusi entako, “Deriya kawoti banta asaa wolqan haaroosona; banta deriya bolla godateysataska bantana, ‘Lo77o ootheyisata’ yaagidi xeegosona.Maato 20:25-27; Mar 10:42-44. 26 Shin hinte giddon hessa mela gidopo. Hinte giddon bayratey kaaloda hano;Maato 23:11; Mar 9:35. kaaletheysi kaalleysada hano. 27 Hanoshin, mokeysafenne Moketeysafe awusi aadhii? Moketeysa gidenneyee? Shin taani hinte giddon mokeysa mela.Qon 13:12.

28 “Hinteka ta metuwan taape shaaketonna taara minnidi eqidaysata. 29-30 Hinte ta gaytape maana mela, uyana melanne araatata bolla uttidi tammanne nam7u Isra7eele sheeshata bolla pirdana mela ta aaway tana shuumidaysada taka hintena ta kawotethan shuumana” yaagis.Maato 19:28.

31 Kaallidika Yesuusi, “Simoona, Simoona, Xalahey hintena gisteda harqanaw woossis. 32 Shin taani ne ammanoy dhayonna mela new gaannatas. Neka simmida wode ne ishata mintha” yaagis.

33 Simooni, “Godaw, taani neera qashetanawunne hayqanaw giigetas” yaagis.

34 Yesuusi Phexroosako, “Ta new odayis; hachi kuttoy waassanaape sinthe ne tana heedzu toho kaddana” yaagis. 35 Kaallidika, Yesuusi entako, “Taani hintena korojoy, karxiitinne caammi baynna kiitida wode hintew pacidabay de7ii?” yaagidi oychis.Maato 10:9-10; Mar 6:8-9; Luqa 9:3.

Enti zaaridi, “Aykoyka pacibeenna” yaagidosona.

36 I entako, “Ha77i korojoynne karxiiti de7ey oyko; mashshi baynay ba afilaa bayzidi mashsha shammo. 37 Haa si7ite! ‘Geellatara taybetis’ geetetidi xaafetidaysi tanan poletanaw bessees. Ee, ta gisho xaafetidabay poleteysi tumatis” yaagis.Isa 53:12.

38 Iya tamaareti, “Godaw haysan nam7u mashshati de7oosona” yaagidosona.

I, “Gidana” yaagis.

39 Yesuusi kase meezetidaysada dendidi Shamaho zuma bolla keyis. Iya tamaareti iya kaallidosona. 40 He bessaa gakida wode, “Paacen gelonna mela woossite” yaagis. 41 Entafe shuchi holin gakiya soo mela haakidi gulbatidi woossis. 42 “Ta aawaw, ne shene gidiko ha metuwa taape aatha. Shin ta shene gidopo ne sheney hano” yaagidi woossis. 43 Kiitanchoy salope qoncidi minthis. 44 Daro un7etidi minnidi woossees. Iya cawayka suuthi xokiyada sa7an xokees.

45 Yesuusi woosa wursidi ba tamaaretako yis. Enti, azzanope dendoysan daaburidi dhiskidashin demmidi, 46 “Ayis dhisketii? Paacen gelonna mela dendidi woossite” yaagis.

47 I buroo oda bolla de7ishin daro asati yidosona. Tammanne nam7atape issoy Yihuda geeteteysi entana kaalethees. I Yesuusa yeeranaw mati shiiqis. 48 Shin Yesuusi, “Yihuda, Asa Na7aa yeerada aatha immanee?” yaagis.

49 Yesuusa tamaareti he hanuwa be7idi, “Godaw mashshan shocino?” yaagidosona. 50 Enta giddofe issoy kahine halaqaa oosanchuwa shocidi ushacha haytha qanxidi yeggis.

51 Shin Yesuusi, “Agga! Diggofite”*Agga! Diggofite: Yesuusi ha bessan agga yaagiday iya ashshanaw gidi asati uraa haytha qanxoysa agga qanxofa gidaysanne, harati iya oykanaw yidaysata diggofite ha77i enta wode yaagidaysa nam7u qofata woli gathidi oykis. yaagis. Uraa haythaa bochidi pathis.

52 Hessafe guye, Yesuusi bana oykanaw yida kahine halaqatako, Xoossa Keetha naageysata shuumatakonne cimatako, “Paanno oykiya asada mashshenne xam7a oykidi yidetii? 53 Ubba gallas xoossa keethan ta hintera de7iya wode ta bolla kushe wothibeeketa. Shin haysi dhuma kawotethay haarida wodenne hinte wode” yaagis.Luqa 19:47; 21:37.

54 Hessafe guye, Yesuusa oykidi kahine halaqaa zabbaa efidosona. Phexroosi haahon Yesuusa kaallees. 55 Asati kahine halaqaa zabban tama eethidi wolla uttidashin Phexroosi entara issife uttis. 56 Issi gadhindiya Phexroosi tama matan uttidaysa cadda xeellada, “Ha uray iyara de7ees” yaagasu.

57 Shin Phexroosi, “Ha maccasete ta he uraa erike” yaagidi kaddis.

58 Guutha wodepe guye issi hara addey iya be7idi, “Neka entafe issuwa” yaagis.

Shin Phexroosi, “Ha addiyaw tana gidike” yaagis.

59 Issi saate mela gam7idaape guye issi hara addey tillisidi, “Ha uray Galilape gidiya gisho sidhey bayna iyara de7ees” yaagis.

60 Shin Phexroosi, “Ha addiyaw, ne geysa ta erike” yaagis. I he oda ongonna de7ishin kuttoy waassis.

61 Goday guye simmidi Phexroosa xeellis. Phexroosi, “Hachi kuttoy waassanaape sinthe ne tana heedzu toho kaddana” yaagidi, Goday odida qaala akeekis. 62 Phexroosi kare keyidi daro kokoridi yeekis.

63 Yesuusa naagiya asati iya leqisonne deshethi oykidosona. 64 Iya ayfiya goozidi “Ane tinbite oda; nena dechiday oonee?” yaagidi oychoosona. 65 Hara daro cashshe cayidi kawushoosona.

66 Sa7i wontiya wode Ayhude biitta cimati, kahine halaqatinne higge astamaareti shiiqidi, Yesuusa banta sinthe shiishidosona. 67 Enti, “Neeni Kiristoosee? Ane nuus oda?” yaagidi oychidosona.

Yesuusi, “Ta odiyako ammaneketa. 68 Ta oychiyako zaareketa. 69 Shin Asa Na7ay haysafe gede baggan wolqaama Xoossaa ushacha baggan uttana” yaagis.

70 He wode ubbay, “Yaatin, neeni Xoossaa na7ee?” yaagidosona.

I, “Ta Xoossaa na7a gideysa hinte gideta” yaagis.

71 Enti, “Hiza, hara marka ay koshshii? I ba inxarsan odishin nu si7ida” yaagidosona.