1 He bessan shiiqida shangoti ubbay dendidi Yesuusa Philaxoosako efidosona. 2 “Ha uray nu asaa balethishin, kawas giira giironna mela diggishininne qassi, ‘Taani Kiristoosa hinte kawa’ yaagishin demmida” yaagidi mootidosona.

3 Philaxoosi Yesuusa, “Neeni Ayhudeta kawo?” yaagidi oychis.

Yesuusi, “Ee, ne gidaysa mela” yaagis.

4 Philaxoosi kahine halaqatakonne asaako, “Ha uraa bolla taani issi balaka demmabike” yaagis. 5 Shin enti, “Ha uray Galilape doomidi haysa gakanaw Yihuda kumetha iitabas denthethees” yaagidi minthi odidosona.

6 Philaxoosi hessa si7ida wode Yesuusi Galila aseeko eranaw koyidi iya oychis. 7 Yesuusi Herodiisa biittafe yida asi gideysa Philaxoosi erida wode Herodiisi he wode Yerusalaamen de7iya gisho iyako yeddis.

8 Herodiisi Yesuusa be7anaw daro wodepe koyishe de7iya gisho, iya be7ida wode daro ufaytis. Ayis giiko, iyabaa si7ida gisho malaalsiyaba oothin be7anaw amotishe de7ees. 9 Herodiisi Yesuusa daro oyshota oychis, shin I aykoka zaaribeenna. 10 Kahineta halaqatinne higge astamaareti yan eqidi minthidi iya mootosona. 11 Herodiisaranne iya wotaadaretara Yesuusa kadhidosonanne leqsidosona. Boncho afila mayzidi Philaxoosako zaaridi yeddidosona. 12 Herodiisaranne Philaxoosara kase morkeshin he gallas wolla giigidosona.

13 Philaxoosi kahine halaqata, asaa haareysatanne asaa xeegidi, 14 “ ‘Ha uray asaa geellatethas denthethees’ gidi taako ehideta. Taka hinte sinthan pilgada hinte shiishida mootuwas aybi balaka demmabike. 15 Herodiisi, hessatho aybi balaka iya bolla demmiboonna gisho nuuko yeddis. Tumaka ha uray hayqos gathiya aybi balaka oothibeenna. 16 Hessa gisho, iya garaafada billa yeddana” yaagis. 17 Hessa I giday Paasika Ba7aale wode issi asi entaw billanaysi iyaw attonnaba gidiya gishosa.

18 Derey ubbay issi bolla, “Ha uraa gede digga, nuus Barbaana billa” yaagidi waassidosona. 19 Barbaani katamaa giddon asaa iitabas denthethidi ase wodhidi qashetida asi.

20 Philaxoosi Yesuusa billanaw koyidi asaas zaari odis. 21 Gidoshin, asay, “Kaqa! Kaqa!” yaagidi waassidosona. 22 Philaxoosi heedzantho, “Ha uray qohidabay aybee? Wodhos gathiya bala ta demmabike. Hessa gisho, garaafada yedda aggana” yaagis.

23 Enti banta qaala dhoqu oothidi, “Kaqetanaw bessees” gidi minthi waassidosona. Enta waasoyka xoonis. 24 Enta oysha gisho, gidi Philaxoosi iya bolla pirdis. 25 Ase iitabas denthethidaysanne ase wodhidi qashetidaysa billana mela woossida gisho he uraa entaw billis. Shin Yesuusa enti koydaba oothana mela entaw aathidi immis.

26 Yesuusa oykidi efishin Simoona geetetiya Qereena biitta addey gaxarepe yishin, demmidi masqaliya toossidi Yesuusa kaallidi baana mela un7ethidosona. 27 Daro asaynne banta tiraa iccishe yeekiya maccasati iya guyera kaalloosona.

28 Shin Yesuusi entako guye simmidi, “Hinteno, Yerusalaame maccasato, hinte huuphesinne hinte naytas yeekitepe attishin, taw yeekofite. 29 ‘Heko maynthati, yelonna ulotinne dhanthonna dhanthati anjetidosona’ hinte yaagana gallasay yaana. 30 He wode dereta, ‘Nu bolla kundite’, zumataka, ‘Nuna kammite’ yaagana.Hose 10:8; Qon 6:16. 31 Hiza, qaye mithaa hessatho oothiko mela mithaa waatandesha?” yaagis.

32 Iyara wodhanaw hara nam7u worandzota efidosona. 33 Qeraaniyo*Qeraaniyo: Qeraaniyo geysi Girike doona. Aramike doonan “Golgota” woyko “Huuphe guugge” guussu. Qeraaniyo geetetiya sunthay imetiday Yesuusi kaqetiday asa huuphe guugge daaniya bessan gidiya gishosa. He bessay Roome kawotethay worandzota kaqiya bessi. (Maato 27:33; Mar 15:22; Yoha 19:17) geetetiya bessaa gathidi kaqidosona. Worandzotape issuwa ushacha baggara hankuwa haddirsa baggara kaqidosona. 34 Yesuusi, “Ta aawaw, enti ay oothiyako eronna gisho, neeni entaw atto yaaga” yaagis.Maz 22:18.

Enti iya afilaa bolla saama yeggidi shaaketidi ekidosona.

35 Asay eqidi xeelloosona, shin deriya haareysati, “Harata ashshis; Xoossay doorida Kiristoosi iya gidiko ane bana asho” yaagidi leqsidosona.Maz 22:18; Maz 22:7. 36 Wotaaddareti iyako shiiqidi, caala woyne ushsha immidosona.Maz 69:21. 37 Yaatidi, “Neeni Ayhudeta kawo gidiko ne huuphiya ashsha” yaagidi leqsidosona.

38 Iyaw huuphe baggara, “Haysi Ayhudeta kawo” giya xuufey de7ees. 39 Kaqetida worandzotape issoy cashshe sa7ara goochishe, “Ane neeni Kiristoosa gidiko, nenaka nunaka ashsha” yaagis.

40 Shin hanko worandzoy, “Neeni haysa mela pirdan de7ashe hari attoshin, Xoossas yayyikii? 41 Nuuni nu oothida nagaraa gisho bessiya pirda ekoos, shin ha uray issi iitabaa oothibeenna” yaagidi hanqetis.

42 Qassika, “Yesuusa, ne ne kawotethaara yaa wode tana qopa” yaagis.

43 Yesuusi, “Ta new tuma odayis; hachi neeni taara gannaten gidana” yaagis.

44-45 He gallas usupun saatepe bidi uddufun saate gakanaw away poo7uwa diggida gisho, biitta ubbaa bolla dhuma gidis. Xoossa Keetha geshey daaketidi nam7an shaaketis.Kessa 26:31. 46 Yesuusi, qaala dhoqu oothidi, “Ta aawaw, ta ta shempiw ne kushen sheedhayis” yaagidi hayqis.Maz 31:5.

47 Mato halaqay, hanidaysa be7idi, “Haysi uray tumaka xillo” yaagidi Xoossaa galatis. 48 Ha haniyaba be7anaw he bessaa shiiqida asa ubbay hanidaba be7ida wode banta tiraa iccishe banta soo simmidosona. 49 Gidoshin, Yesuusa matan eriya asa ubbay, hessadaka Galilape kaallidi yida maccasati hessa be7ishe haahon eqidosona.Luqa 8:2.

50-51 Ayhude shangotape issoy, Yoosefa geetetiya uray de7ees. I Armaate geetetiya Yihuda katamaape yis. I lo77onne Xillo asi gidiya gisho Xoossaa kawotethaa yuussaa naagees. Shangotape issuwa gidishe enta zoretethaaninne oosuwan deenna. 52 He uray Philaxoosako bidi, Yesuusa aha mooganaw taw imma gidi woossis. 53 Philaxoosi eka yaagin, Yesuusa aha wodhisidi afilara xaaxis. Zaallafe woocidi kessida hara asi moogetonna ooratha duufon wothis. 54 Sambaati gelana haniya gisho, he gallasay giigetetha qamma.

55 Galilape dendidi Yesuusa kaallidi yida maccasati Yoosefara bidi iya aha waati moogiyako duufuwa akeekidi be7idosona. 56 Yaape simmidi shittonne qibaate giigisidosona. Higgey kiitteysa mela Sambaata gallas shempi pee7idosona.Kessa 20:10; Zaare 5:14.