1 Hessafe guye, Yesuusi wogoluwan gelidi, abba pinnidi ba katamaa bis. 2 Hanida guutha asati issi gunda ura algara tookidi Yesuusako ehidosona. Yesuusi enta ammanuwa be7idi, gunda uraa, “Ta na7aw, yayyofa; ne nagaray atto geetetis” yaagis.

3 He saatiyan, Ayhude higge astamaaretape issoti issoti, “Haysi Xoossaa cashshe gidenne” yaagidi banta wozanan qopidosona.

4 Yesuusi enta qofaa eridi, “Iitabaa hinte wozanan ayis qopeetii? 5 Hanoshin, ‘Ne nagaray atto geetetis’ geysafenne ‘Denda eqada ba’ geysafe awusi kawuyii? 6 Shin sa7a bolla nagara atto gaanaw Asa Na7aas maati de7eysa ta hintena erisana” yaagidi, gunda addiyako, “Denda eqa, ne algaa tookada, ne soo ba” yaagis.

7 Gunda uray dendidi ba soo bis. 8 Derey hessa be7idi malaaletidosona. Hessa mela maata asas immida Xoossaa galatidosona.

9 Yesuusi yaape dendidi bishe Maatosa geysa qaraxa qanxisiya bessan uttidashin be7idi, “Tana kaalla” yaagis.

Ika dendidi kaallis.

10 Yesuusi Maatosa son gayta bolla uttidashin, qaraxa qanxisiya daro asatinne nagaranchoti yidi iyaranne iya tamaaretara issife maanaw uttidosona.Luqa 15:1-2. 11 Issi issi Farsaaweti hessa be7idi, Yesuusa tamaareta, “Hinte astamaarey qaraxa qanxiseysataranne nagaranchotara ayis mii?” yaagidosona.

12 Yesuusi hessa si7idi, “Dhale koshshey harganchotasafe attishin, paxatasa gidenna. 13 Shin hinte bidi, ‘Taani hinte yarshuwa gidonashin hinte harata maarana mela koyayis’ geetetidi xaafetidaysi ay guusseko erite. Ayis giiko, taani nagaranchota xeeganaw yasipe attishin, xillota xeeganaw yabiike” yaagis.Maato 12:7; Hose 6:6.

14 He wode Yohaanisa tamaareti Yesuusako shiiqidi, “Nunne Farsaaweti xoomos, shin ne tamaareti ayis xoomokonaa?” yaagidi oychidosona.

15 Yesuusi zaaridi entako, “Machiw ekeysi entara de7ishin xeegetidi yida asay kayotanaw danda7onna? Mushuray enta matape eketana wodey yaana, enti he wode xoomana.

16 “Ooratha ma7ope peedhidi gal7a ma7o bolla sikey oonika baawa. Hessatho oothiko oorathay gal7a peedhees. Peedhethayka guji dalgees. 17 Ooratha woyne gal7a ogoron qoliya oonika baawa. Hessatho oothiko ooratha woyney gal7a ogoruwa dhusees woyneyka gukees; ogoroyka nam7antho maaddonnaba gidees. Shin ooratha woyney ooratha ogoron qoletanaw bessees. Hessatho oosetiko nam7ayka iitonna naagetoosona” yaagis.

18 Yesuusi hessa odo bolla de7ishin, Ayhude halaqatape issoy iyako yidi, iya sinthan gulbatidi, “Ta na7iya ha77i hayqasu, shin iya paxana mela neeni yada ne kushiya I bolla wotharki” gidi woossis. 19 Yesuusi dendidi iyara bis; iya tamaaretika kaallidosona.

20 I bishin tammanne nam7u laythi kumethi suuthi goggidi waaysiya issi maccasiya guyera shiiqada Yesuusa afilaa macaraa bochasu. 21 Iya ba wozanan, “Ta iya afilaa macaraa xalaala bochiyako paxana” yaagada qopasu.

22 Yesuusi guye simmi iyo xeellidi, “Ta naatte, yayyofa! Nena ne ammanoy pathis” yaagis. Maccasiya ellesada paxa aggasu.

23 Yesuusi Ayhude halaqaa soo gakiya wode zaye punneysatanne yeekeyisata be7idi, 24 “Ane kichite; guutha na7iya dhiskasupe attishin, hayqabuuku” yaagis. Shin asay iya bolla miicidosona. 25 Asaa kare kessidaape guye soo gelidi, na7e kushiya oykis, na7iya denda eqasu. 26 He worey he biitta ubbaa gakis.

27 Yesuusi yaape dendidi gede sinthe biya wode nam7u qooqeti banta qaala dhoqu oothidi, “Dawita na7aw, nuna maararki” yaagishe iya kaallidosona.

28 Yesuusi soo gelida wode qooqeti iya kaallidi yidosona. Yesuusi entako, “Taani hessa oothanaw danda7eysa hinte ammanetii?” yaagis.

Entika, “Ee, Godaw” yaagidi zaaridosona.

29 Hessafe guye, Yesuusi enta ayfiya bochidi entako, “Hintew, hinte ammanuwatho hano” yaagis. 30 Enta ayfeyka dooyetis. Yesuusi entako, “Haysa oodeska odopite” yaagidi minthi odis. 31 Shin asati bidi Yesuusaba he biitta ubban odidosona.

32 Enti yaape keyiya wode asay tuna ayyaanay oykidi muumisida issi asi Yesuusako ehidosona. 33 Tuna ayyaanay keydaape guye muume uray odetis. Dereyka malaaletidi, “Haysa mela oorathabay Isra7eele biittan hanibeenna” yaagidosona.

34 Shin Farsaaweti, “Tuna ayyaanata halaqan tuna ayyaanata kessees” yaagidosona.Maato 10:25; 12:24; Mar 3:22; Luqa 11:15.

35 Yesuusi ayhude woosa keethatan tamaarsishe, salo kawotethaa Wongela sabbakishe, asaa harge ubbaafe pathishe katamataninne guta ubban yuuyis.Maato 4:23; Mar 1:39; Luqa 4:44. 36 Daro derey, heemmiya asi bayna dorsada entana be7iya asi dhayin un7etidi de7eyisata be7idi entaw qadhetis.Taybo 27:17; 1 Kawo 22:17; 2 Taari 18:16; Hiz 34:5; Mar 6:34. 37 Ba tamaaretako, “Shiiqana kathay daro, shin kathaa shiishiya asay guutha.Luqa 10:2. 38 Hessa gisho, Goday kathaa shiishiya oosanchota yeddana mela woossite” yaagis.