11
Xammaqiya Yohaanisi Kiitida Asata
(Luqa 7:18-35)
1 Yesuusi tammanne nam7u tamaareta kiitidaape guye yaape dendidi tamaarsanawunne sabbakanaw Galila katamata bis.
2 Yohaanisi qasho keethan de7ishe Kiristoosi oothiyabata si7idi, ba tamaaretape iyako kiittidi, 3 “Yaana geetetiday neneyee? Woyko nuuni haraa naagino?” yaagidi oychis.
4 Yesuusi entako zaaridi, “Bidi hinte si7iyabaanne hinte be7iyaba Yohaanisas odite. 5 Qooqeti xeelloosona, wobbeti hemetoosona, baro harganchoti paxoosona, tulleti si7oosona, hayqidaysati hayqope dendoosona; manqotas Wongelay sabbaketees.Isa 35:5. 6 Tanan dhubetonay anjetidaysa” yaagis.
7 Yohaanisa tamaareti guye simmidi bin, Yesuusi deriyas Yohaanisaba odishe, “Ha mela biitta ay be7anaw keydetii? Carkoy qaathiya mayre be7anaw yidetiyee? 8 Yaatin, ay be7anaw keydetii? Koyse ma7o ma7ida ase be7anaseyee? Koyse ma7o ma7ida asati kawo gadhon de7oosona. 9 Yaatin, ay be7anaw keydetii? Nabe be7anaseyee? Heko, hinte nabepe aadheysa be7eeta.
10 “Ne ogiya ne sinthan giigisiya
ta kiitanchuwa neepe sinthe kiittana”
geetetidi xaafetiday iyassa.Milki 3:1.
11 Ta hintew tuma odayis; maccasape yeletidaysata giddofe Yohaanisape aadhey oonika baawa; salo kawotethan ubbaafe guuxey I, iyape aadhana. 12 Xammaqiya Yohaanisa wodiyape doomidi hachi gakanaw salo kawotethay daro naaqetees, minnida asati wolqan yaa gelana.Luqa 16:16. 13 Nabeti ubbaynne Muse higgey Yohaanisa wode gakanaw salo kawotethaaba tinbite odidosona. 14 Hiza, hinte enta kiitaa ammanana gidiko, yaana geetetida Eeliyaasi, I Yohaanisa.Milki 4:5; Maato 17:10. 15 Hiza, si7iya haythi de7ey si7o.
16 “Hiza, ha wodiya yeletethaa aybira daaniso? Giya giddon uttidi woli xeegidi,
17 “ ‘Nu hintew suusul77e punnin;
hinte yexeketa.
Nu sabbidi zeleelin;
hinte yeekeketa’
giya nayta daanosona. 18 Xammaqiya Yohaanisi moonnanne uyonna yin, ‘Tuna ayyaani de7ees’ yaagideta. 19 Asa Na7ay mishenne uyishe yin, ‘Yarambanne ushshancho, qaraxa qanxiseysatanne nagaranchota dabbo’ yaagideta. Hiza, cincatethaa tumatethay iya oosuwan qoncees” yaagis.
Ammanonna Ixida Katamata
(Luqa 10:13-15)
20 Hessafe guye, Yesuusi daro malaatata oothida katamatan de7iya asati banta nagaraape simmidi maarotan gelonna ixida gisho entana, 21 “Korazine katamaw nena ayye! Beetesayda katamaw nena ayye! Ayis giiko, hinte giddon oosetida malaatati Xiroosaninne Sidoonan oosetida gidiyako, enti beni bido tiyetidi, kayo ma7o ma7idi banta nagarape simmi aggana.Isa 23:1-18; Iyyu 3:4-8; Amo 1:9-10; Zaka 9:2-4. 22 Shin ta hintew odayis; pirda gallas hintefe aathidi Xiroosasinne Sidoonas pirday kawuyana. 23 Qassi, Qifirnahooma, neeni pude salo keyanaw koyay? Hanenna! Neeni Si7oolen yegetana. Ayis giiko, ne giddon oosetida malaatati Soodomen oosetidaba gidiyako, Soodomey hachi gakanaw de7anashin.Isa 14:13. 24 Shin ta new odayis; pirda gallas neepe aathidi Soodomes pirday kawuyana” yaagidi hanqetis.Maato 10:15; Luqa 10:12.
Kiristoosi Immiya Shempo
(Luqa 10:21-22)
25 He wode Yesuusi, “Aawaw, saluwanne sa7aa Godaw, neeni haysa eranchotapenne cincatape genthada naytas qoncisida gisho, nena galatayis. 26 Ee, ta Aawaw, haysi ne lo77o sheniyada hanis.
27 “Ubbay taw ta Aawape imetis. Aawape hari Na7a erey baawa, Na7aapenne I entaw qoncisanaw koyeysatape hari Aawa eranaw danda7ey baawa.Yoha 1:18; 3:35; 10:15.
28 “Hinteno, daaburanchoto, toohoy deexida ubbay taako haa yiite; taani hintena shempisana. 29 Taani ta wozanan ashkenne aada gidiya gisho, ta qambaran gelite, taape tamaarite; hinte, hinte shempuwas shempo demmana.Ermi 6:16. 30 Ta qambaray liiqo, qassi ta toohoyka kawushe” yaagis.