14
Xammaqiya Yohaanisa Hayquwa
(Mar 6:14-29; Luqa 9:7-9)
1 He wode Galila aysiya Herodiisi*Herodiisi: Haysi kawa Herodiisa Antiphaasa. I, Yihudanne Peeriya Kiristoosi yeletanaape sinthe 4-39 ML gakanaw haaris. I Kawa Herodiisas na7a. Yesuusaba si7is. 2 Ba aylletako, “Haysi Xammaqiya Yohaanisa; I hayqope dendis. Yaanida gisho, ha ubbaa malaatata I oothees” yaagis.
3 I hessa giday Herodiisi ba ishaa Filphoosa mache Herodiyadi gaason Yohaanisa qasho keethi gelsida gishosa. 4 Yohaanisi Herodiisa, “Ne iyo ekanaw woga gidenna” yaagis.Luqa 3:19-20; Leewe 18:16; 20:21. 5 Herodiisi Yohaanisa wodhanaw koyis, shin derey Yohaanisa nabe oothidi be7iya gisho yashetis.
6 Herodiisi ba yeletida gallasa bonchiya wode, Herodiyada na7iya asaa sinthan yethan durada iya ufaysasu. 7 Yaatin, I, “Iya koyaba ubbaa immana gidi” caaqis. 8 Na7iya ba aaye zoriya si7ada Herodiisako, “Xammaqiya Yohaanisa huuphiya keren wothada taw imma” yaagasu. 9 Iya yaagin kawoy qiirotis, shin ba caaquwa gishonne baara de7iya imathata gisho gidi I oyshay poletana mela kiittis. 10 Kawoy ase kiittidi Yohaanisi qasho keethan de7ishin iya qoodhiya gora7isis. 11 Huuphiya keren wothi ehidi na7ees immidosona; na7iyaka ekada ba aayes efasu. 12 Yohaanisa tamaareti yidi iya aha efidi moogidosona. Iyape guye hanidaba ubbaa bidi Yesuusas odidosona.
Ichashu Mukulu Asaa
(Mar 6:30-44; Luqa 9:10-17; Yoha 6:1-14)
13 Yesuusi hanidaba si7ida wode wogolon gelidi he bessaafe issi geemmiya soo barka bis. Asay hessa si7idi katamatape dendidi tohon iya kaallidosona. 14 Yesuusi wogoluwape wodhidi daro asaa be7idi entaw qadhetis. Enta giddon de7iya harganchota pathis.
15 Sa7ay omarsishe biya wode Yesuusa tamaareti iyako shiiqidi, “Ha bessay asi bayna bessi, sa7ika qammis. Yaaniya gisho, heeran de7iya gutata bidi bantaw shammidi maana mela deriya yedda” yaagidosona.
16 Shin Yesuusi entako, “Derey moonna baanaw koshshenna; enti maanaba hinte immite” yaagis.
17 Enti zaaridi, “Nuus haysan ichashu uythaafenne nam7u molope hari baawa” yaagidosona.
18 Ika, “Ane enta haa ehite” yaagis. 19 Kaallidika, derey maatan uttana mela odis. Ichashu uythaanne nam7u molota ekidi, salo xeellidi galati simmidi, uythaa menthidi ba tamaaretas immis; enti qassi deriyas immidosona. 20 Ubbay midi kallidosona. Yesuusa tamaareti mishin attidaysa tammanne nam7u gayta denthidosona. 21 Kathaa mida asay maccasaynne nayti attishin, ichashu mukulu gidees.
Yesuusi Abba Bollara Hemetis
(Mar 6:45-52; Yoha 6:15-21)
22 Yesuusi ba tamaareti wogolon gelidi baape sinthatidi abbaafe he pinthi pinnana mela kiittidi baw deriya moyzanaw guye attis. 23 Deriya moyzi simmidi barka woossanaw issi zuma bolla keyis. Sa7ay qamminka I barka yan gam7is. 24 He wode wogoloy abba bolla bishin sintha baggara carkoy dendin hobbey wogoluwa un7ethis.
25 Wontimaatha bolla Yesuusi abba bolla hemetishe ba tamaaretako yis. 26 Iya tamaareti, I abba bolla hemetishe bantako yeysa be7idi yayyidosona. Entika, “Haysi moytille” gidi yayyidi waassidosona.
27 Shin Yesuusi ellessidi, “Aykoy baawa! Yayyofite! Tanabay” yaagis.
28 Phexroosi iyako, “Godaw, nena gidiko, taani haatha bollara hemetada neeko baana mela tana kiitta” yaagis.
29 Yesuusi Phexroosako, “Haaya” yaagis.
Phexroosi wogoluwape wodhidi haatha bollara hemetishe Yesuusako buussu oykis. 30 Shin wolqaama carkuwa be7idi yayyis. Haathan mitetethi oykida wode, “Godaw! tana ashsharki!” yaagidi waassis.
31 Yesuusi ellesidi ba kushiya yeddi iya oykidi, “Neno, ammanoy pacidayso ayis sidhay” yaagis.
32 Yesuusaranne Phexroosara wogoluwan gelida wode carkoy si77i gis. 33 Wogoluwa giddon de7iya iya tamaareti, “Neeni tumaka Xoossa Na7a” gidi goyinnidosona.
34 Enti abba pinnidi Gensareexe biitta gakidosona. 35 He biittan de7iya asay Yesuusa erida wode banta heeran de7iya guta ubba kiita yeddidosona. Asay harganchota ubbaa iyako ehidosona. 36 Harganchoti iya afila macaraa xalaala bochana mela woossidosona. Bochida ubbayka paxidosona.