24
Xoossa Keethay laaletonna Attenna
(Mar 13:1-2; Luqa 21:5-6)
1 Yesuusi Xoossa Keethafe keyidi bishin, iya tamaareti iyako yidi, malaaletidi Xoossa Keetha gimbiya bessidosona. 2 Yesuusi entako zaaridi, “Ee! Haysa ubbaa be7eetii? Taani hintew tumaa odayis; shuchi shucha bolla gimbetida mela laaletonna attenna” yaagis.
Sinthafe Hananabata
(Mar 13:3-13; Luqa 21:7-19)
3 Yesuusi Shamaho zuma bolla uttidashin, iya tamaareti bantarka iyako yidi, “Hessi awude hananeeko nuus oda. Qassi ne yuussasinne wodiya wursethaas malaatay aybee?” yaagidi oychidosona.
4 Yesuusi zaaridi, “Hintena oonika balethonna mela naagetite! 5 Ayis giiko, daro asati ta sunthan, ‘Taani Kiristoosa, Xoossay asaa ashshanaw kiittidaysa’ yaagishe yidi daro asaa balethana. 6 Matan de7iya ola girsaa, haahon de7iya ola wore si7anaw de7eeta. Hessa melabay hananaw bessiya gisho Hirgofite. Shin wursethay buroona. 7 Derey deriyara, issi kawotethay hara kawotethaara oletana. Koshaynne biitta qaaxoy ubba bessan hanana. 8 Hessi ubbay yelo iqethas zooke mela.
9 “He wode asay hintena waayees aathidi immana, qachananne wodhana. Ta sunthaa gisho asa ubbay hintena ixana.Maato 10:22. 10 He wode daroti ammano aggana. Banta giddon issoy issuwa aathidi immana, issoy issuwa ixana. 11 Qassi daro wordo nabeti dendidi darota balethana. 12 Geellatethi dariya gisho, daro asaa siiqoy irxana. 13 Shin wursethi gakanaw genciya uray attana.Maato 10:22. 14 Asa ubbaas marka gidana mela Xoossaa kawotethaa Wongelay biitta ubban odetana. Hessafe guye, wursethay yaana.
Tuna Dhayo
(Mar 13:14-23; Luqa 21:20-24)
15 “Hessa gisho, nabiya Daaneli odida dhayo tunatethay geeshsha bessan eqidaysa hinte be7ana.Zaare 9:27; 11:31; 12:11. (Akeekiso: Hessi woy guusseko nabbabeysi akeeko!) 16 He wode Yihuda biittan de7eysati deriyako baqato. 17 Keetha huuphen de7iya uray ba son de7iyaba ekanaw soo gelonna baqato.Luqa 17:31. 18 Gaden de7eysi ba ma7uwa ekanaw guye simmofo. 19 He wode qantha maccasatasinne dhanthiya maccasatas daro un7a gidana. 20 Balgon woyko Sambaatan hinte baqatoy gidonna mela Xoossaa woossite. 21 Ayis giiko, sa7i medhetoosape hachi gakanaw hanonnabay, qassi sinthafeka ubbaraka hanonna waayey he wode hanana.Medhe 12:1; Qon 7:14. 22 Xoossay he gallasata taybuwa guuthonnaako ase gidida oonika attenna. Shin I ba doorida asata gisho, he gallasata taybuwa guuthana.
23 “He wode oonika hintena, ‘Heko, Kiristoosi haysan’ woyko ‘Hinin de7ees’ yaagiko ammanopite. 24 Ayis giiko, wordo Kiristoosatinne wordo nabeti dendana. Entaw danda7etiko, hari attoshin Xoossay dooridaysataka balethanaw gita malaatatanne malaalsiyabata oothana. 25 Akeekite, taani hintew haysa kasetada odas.
26 “Hessa gisho, asay hinteko, ‘Heko, Kiristoosi bazzon de7ees’ giiko, yaa boopite. Woyko hinteko, ‘Heko, qol7an de7ees’ giiko, entaba ammanopite.Luqa 17:23-24. 27 Ayis giiko, wol7anthi salon wol7amidi, dolohape wuloha gakanaw benteysada, Asa Na7aa yuussay hessada hanana.
28 “Bawuti de7iyason ankoti shiiqana.Luqa 17:37.
Kiristoosi Nam7antho Yaana
(Mar 13:24-27; Luqa 21:25-28)
29 “He wode he waaye gallasatape guye,
ellesidi away dhumana,
ageenay ba poo7uwa diggana.Isa 13:10; Ermi 2:10.
Xoolintoti salope wodhana,
qassi salon de7iya wolqati buqettana.
30 He wode Asa Na7aa yuussaa mallay saluwa bolla bentana. Sa7an de7iya asi ubbay yeekana. Qassi Asa Na7ay, wolqaranne gita bonchuwara saluwa shaara giddora yishin enti be7ana.Zaare 7:13; Zaka 12:10. 31 I ba kiitanchota gita moyze punora kiittana. Enti sa7aa oyddu baggaa bidi, ha gaxape ya gaxa gakanaw de7iya iyaw dooretidaysata shiishana.
Balase Mithee Leemiso
(Mar 13:28-31; Luqa 21:29-33)
32 “Balase mithafe tamaarite. Iya aacada hayxiya wode torchey matatidaysa hinte ereeta. 33 Hessadaka, hinte ha ubbaba be7iya wode Yesuusi matidi pengen de7eysa erite. 34 Taani hintew tuma odayis; ha ubbabay poletana gakanaw, ha yeletethay aadhenna. 35 Saloynne sa7i aadhana, shin ta qaalay ubbaka aadhenna.Medhe 6:5.
Yesuusi Yaana Wode Oonika Erenna
(Mar 13:32-37; Luqa 17:26-30, 34-36)
36 “He gallasaanne he saatiya salon de7iya ta aawape attishin, hari salo kiitanchota gidin woyko Na7aa gidin oonika erenna. 37 Asa Na7aa yuussay, Nohe wode hanidaysa mela gidana.Medhe 6:5. 38 He wode dhayo haathay yaanape sinthe Nohey markabiyan gelida gallasa gakanaw, asay mishenne uyishe, ekishenne gelishe gam7is. 39 Dhayo haathay yidi, enta ubbaa dhaysana gakanaw akeekibokona. Asa Na7aa yuussayka hessada hanana.
40 “He wode nam7u asati gaden oothana. Entafe issoy eketana, hankoy attana. 41 Nam7u maccasati issife gaaccana. Entafe issiniya eketana hankiya attana.
42 “Hiza, hinte Goday ay gallas yaaneko hinte eronna gisho, minnidi naagite. 43 Shin kaysoy qammafe ay saaten yaaneko goday eriyako, ba keethay booketonna mela barkidi naaganashin.Luqa 12:39-40. 44 Hessadaka, Asa Na7ay hinte qoponna saaten yaana gisho, hinteka giigidi de7ite.
Iitanne Lo77o Aylle Leemiso
(Luqa 12:41-48)
45 “Yaatin, ba soo asaas kathaa koshshiya wodiyan immana mela iya goday doorida ammantheysinne wozanaama aylley oonee? 46 I ba goday kiittidaysa oothishin iya goday yidi demmiya aylley anjetidaysa. 47 Taani hintew tuma odayis; goday he aylliya babaa ubbaa bolla shuumana. 48 Shin he aylley iita gidiko, ‘Ta goday gam7idi yaana’ yaagidi ba wozanan qopidi, 49 ba lagge oosanchota wadho doomiko, mathoteysatara miikonne uyiko, 50 he aylliya goday I qoponna gallasinne I eronna saaten, 51 yidi iya qanxerethana. Iya qaada cubbotara oothana. He bessan iyaw yeehonne ache garcethi gidana.