1 “He wode salo kawotethay banta xompe oykidi, macho ehanaw bida addiya mokanaw keyida tammu geela7ota daanees.Luqa 12:35. 2 Entafe ichashati eeya, qassi ichashati cinca. 3 Eeyati xompe oykidosona, shin guzha zayte oykibookona. 4 Shin cincati banta xompenne hara guzha zayte oykidosona. 5 Machiw ekeysi gam7in, he geela7oti bantana dhiskoy oykin dhiskidosona.

6 “Giddi bilahe gidiya wode, ‘Heko, machiw eheysi gakis, iya mokanaw keyite’ giya gita caboy si7etis.

7 “He wode he geela7oti ubbay barkidi, banta xompiya giigisidosona. 8 Eeyati cincatako, ‘Nu xompey to7ana haniya gisho, hinte zaytiyape nuus immerketi’ yaagidosona.

9 “Shin cincati zaaridi, ‘Akay, nuusinne hintew gidiya zaytey baawa. Hessa gisho, bidi hintew shammidi ekite’ yaagidosona. 10 Eeya geela7oti zayte shammanaw bin, machiw ekeysi puttu gis. Giigeti uttida ichashu geela7oti iyara issife yaagano keethi gelidosona; kareyka gordeti aggis.

11 “Guyepe hanko geela7oti yidi, ‘Godaw, godaw, nuus dooyarki’ yaagidosona.

12 “Shin I zaaridi, ‘Taani hintew tuma odayis; ta hintena erike!’

13 “Hiza, Asa Na7ay yaana gallasaa woyko saatiya hinte eronna gisho barkidi naagite.

14 “Xoossaa kawotethay ba oosanchota xeegidi baw de7iyaba entaw sheedhidi oge baanaw keyida uraa daanees.Luqa 19:11-27. 15 Entaw huuphen huuphen enta wolqaa mela issuwas ichashu karxiite bira, issuwas nam7u karxiite bira qassi issuwas issi karxiite bira immidi ba ogiya bis. 16 Ichashu karxiite bira ekida aylley ellesi bidi zal7idi, hara ichashu karxiite bira wodhisis. 17 Hessadaka, qassi nam7u karxiite bira ekida aylley hara nam7u karxiite bira wodhisis. 18 Shin issi karxiite bira ekidaysi bidi, olla bookidi, ba godaa miishiya moogis.

19 “Daro wodepe guye he aylleta goday yidi, ba miishiya entara salla7is. 20 Ichashu karxiite bira ekida aylley yidi, hara ichashu karxiite bira ehidi, ‘Ta godaw, neeni taw ichashu karxiite bira immadasa. Shin taani hara ichashu karxiite bira wodhisas’ yaagis. 21 Iya goday, ‘Zamboy! Neeni lo77onne ammanthiya aylle; neeni guuthaban ammanetadasa. Taani nena darobaa bolla shuumana; haa gelada ne godaara ufayta’ yaagis.

22 “Qassi nam7u karxiite bira ekidaysi yidi, ‘Ta godaw, neeni taw nam7u karxiite bira immadasa. Shin taani hara nam7u karxiite bira wodhisas’ yaagis. 23 Iya goday, ‘Zamboy! Neeni lo77onne ammanthiya aylle; neeni guuthaban ammanetadasa. Taani nena darobaa bolla shuumana; haa gelada ne godaara ufayta’ yaagis.

24 “Qassi issi karxiite bira ekidaysi yidi, ‘Ta godaw, neeni zeronna bessafe cakiyanne dharcona bessafe maxiya iita asi gideysa taani erayis. 25 Hessa gisho, yayyada ne bira biittan moogas. Ne miishey haysish’ yaagis.

26 “Iya goday zaaridi, ‘Ha iita azalla aylliyaw, taani zeronna bessafe cakeysanne dharcona bessafe maxiya asi gideysa eradasa. 27 Yaatin, neeni ta miishiya banken wothidaba gidiyako, taani simmiya wode ta miishiya wodhera ekanaysa diggadasa. 28 Hessa gisho, miishiya iyape ekidi, tammu karxiite biri de7eysas immite. 29 Ayis giiko, de7iya ubbaas guzhetananne darana. Shin baynaysafe hari attoshin, he iyaw de7iya guuthiyaka eketana.Maato 13:12; Mar 4:25; Luqa 8:18. 30 Ha maaddonna aylliya kare dhumaa kessi yeggite. Yan iyaw yeehonne ache garcethi gidana’ yaagis.Maato 8:12; 22:13; Luqa 13:28.

31 “Asa Na7ay, kiitancho ubbatara, ba bonchuwara yaa wode I ba boncho kawotetha araata bolla uttana.Maato 16:27; Maato 19:28. 32 Biittan de7iya asi ubbay iya sinthe shiiqana. Henthanchoy dorsata deeshatape shaakeysada I he asaa nam7an shaakana. 33 Qassi dorsata ushacha baggara deeshata haddirsa baggara essana.

34 “Hessafe guye, kawoy ushacha baggara de7eysatako haysada yaagana: ‘Ta Aaway anjidaysato, ha yidi sa7i medhetiya wodepe doomidi hintew giigida kawotetha laattite. 35 Ayis giiko, taani koshatin muzideta, saamotin ushshideta, eretonna imatha asi gidada bin mokideta, 36 kallotin mayzideta, hargetin hargisideta, qashetin tana oychideta’ yaagana.

37 “Hessafe guye, xilloti zaaridi, ‘Godaw, neeni koshatin awude be7idi muzido? Woyko neeni saamotin awude be7idi ushshido? 38 Neeni imathe gidada yin awude be7idi mokido? Woyko neeni kallotin awude mayzido? 39 Neeni hargin woyko qashetin neeko bidi nena awude oychido?’ yaagana. 40 Kawoy zaaridi, ‘Taani hintew tuma odayis; hinte tana kaalliya ha ubbaafe guuxeysas oothidaysa taw oothideta’ yaagana.

41 “He wode haddirsa baggara de7eysatako, ‘Ha baadetidaysato, ta matape haakite. Xalahesinne iya kiitanchotas giigida merinaa taman biite. 42 Ayis giiko, koshatin tana muzibeeketa; saamotin ushshibeeketa. 43 Taani imathe gidada bin tana mokibeketa, kallotin mayzibeeketa, hargininne qashetin tana oychibeeketa’ yaagana.

44 “He wode enti, ‘Godaw, neeni koshatin woyko saamotin woyko imathe gidada bin woyko kallotin woyko hargin woyko qashetin be7idi nena awude maaddonna ixido?’ yaagidi zaarana.

45 “He wode kawoy zaaridi entako, ‘Taani hintew tuma odayis; hinte tana kaalliya ha ubbaafe guuxeysa maaddonna ixidaysi, tana maaddonna ixidaysa’ yaagana. 46 Hessa gisho, he asati merinaa pirdas qassi xilloti merinaa de7uwas baana” yaagis.Daane 12:2.