1 Yesuusi ayhude woosa keethi simmi gelis. Yan kushey gundida issi uray de7ees. 2 Issi issi asay Yesuusa mootanaw koyidi, kushey gundida uraa Sambaata gallas I pathikonne aggiko be7anaw koyidi minthidi naagoosona. 3 Yesuusi kushey gundida uraa, “Denda eqada haa sinthe ya” yaagis. 4 Hessafe guye, asaako, “Sambaata gallas lo77oba ootheysi wogeye iitabaa ootheysi wogee? Asa shempo ashoye woyko wodho?” yaagidi oychis.

Shin asay si77i gis. 5 Yesuusi hanqetidi, enta yuushshi aathi xeellidi, enti odin si7onnayisata gidiya gisho, enta bolla daro azzanis. He addiyako, “Ne kushiya piddi ootha” yaagis. Uray piddi oothin iya kushey paxis. 6 Ellesidi Farsaaweti ayhude woosa keethafe kare keyidi, Yesuusa waati wodhaneko maqetanaw Herodiisa baggatara issi soo shiiqidosona.

7 Yesuusi ba tamaaretara Galila Abbaako bis. Galilapenne Yihudape yida daro asay iya kaallidosona. 8 Qassika Yerusalaamepe, Edomiyaasape, Yordaanose Shaafa pinthafe, Xiroosa katamaapenne Sidoona katamaape Yesuusi oothidaba si7idi, daro asay iyako yidosona. 9 Asaa darotethaafe dendoysan iya un7ethonna mela iya tamaareti wogolo iyaw giigisana mela kiittis.Mar 4:1; Luqa 5:1-3. 10 Daro asaa I pathida gisho, hargiya asa ubbay iya bochanaw sugetoosona. 11 Tuna ayyaanay oykida asati iya be7ida wode iya sinthan kundidi, banta qaala dhoqu oothidi, “Neeni Xoossaa Na7aa gidikii?” yaagosona.

12 He tuna ayyaanati iya oonatetha oodeska qoncisonna mela entaw minthidi odis.

13 Yesuusi deriya bolla keyidi, ba koyida asata baako xeegis; entika iyako bidosona. 14 Enti baara daana melanne qaala tamaarsana mela tammanne nam7ata dooridi, enta, “Hawaareta”*Hawaare: Hawaare guussay kiitetidaysa guussu. gidi sunthis. 15 Tuna ayyaanataka kessana mela entaw maata immis.

16 I doorida tammanne nam7ati haysata: Phexroosa yaagidi sunthida Simoona, 17 Bo7anerges (Dada Nayta) yaagidi sunthidaysata, Zabdiyoosa nayta Yayqoobanne Yayqooba ishaa Yohaanisa, 18 Indiriyasa, Filphoosa, Bartelemoosa, Maatosa, Toomasa, Ilfiyoosa na7a Yayqooba, Taadiyosa, ba biittas mishetiya Simoonanne, 19 Yesuusa aathidi immida Asqoroota Yihuda.

20 Hessafe guye, Yesuusi soo bis. Qassi daro asay shiiqin, inne iya tamaareti hari attoshin kathi maanawuka danda7ibookona. 21 Asay iya, “Gooyees” giya gisho, iya dabboti hessa si7idi iya ekanaw bidosona.

22 Higge astamaaretape issoti issoti Yerusalaamepe yidi, “Iya bolla Bi7eel-Zebuuli de7ees”, I, “Xalahey wolqan tuna ayyaanata kessees” yaagidi odetidosona.Maato 9:34; 10:25.

23 Yesuusi asaa baako xeegidi leemiso odis. “Xalahey Xalahe waati kessanaw danda7ii? 24 Issi kawotethay ba giddon shaaketiko he kawotethay eqanaw danda7enna. 25 Hessadaka, issi keetha asay banta giddon shaaketiko dhayanape attishin, daanaw danda7okona. 26 Hiza, Xalahey baara kacetidi shaaketiko dhayope attishin, daanaw danda7enna.

27 “Shin koyrottidi wolqaama uraa qachonna de7ishe iya keetha gelidi, iya miishiya bonqanaw danda7iya asi baawa. Qachi simmidi iya keetha bonqanaw danda7ees.

28 “Taani hintew tuma odayis; Xoossay asa naytas nagara ubbaanne enti cayiya cashshe ubbaa atto gaana. 29 Shin Geeshsha Ayyaana bolla iitabaa odetiya oodeska merinaa nagara gidanaape attishin, Xoossay ubbaraka iya maarenna” yaagis.Luqa 12:10. 30 Yesuusi hessa giday, issi issi asati, “Iya bolla tuna ayyaanay de7ees” yaagida gishosa.

31 Iya aayanne iya ishati yidi karen eqidi, iyako ase kiittidi iya xeegidosona. 32 Iya matan uttida daro asati, “Heko, ne aayeranne ne ishatara karen eqidi nena koyoosona” yaagidosona.

33 Yesuusi zaaridi, “Ta aayiya oonee? Qassi ta ishati oonantee?” yaagis. 34 Ba matan uttida asa yuushshi aathi xeellidi, “Heko, ta aayanne ta ishati haysata. 35 Xoossay sheniya oothiya ubbay ta isha, ta michonne ta aayo” yaagis.