4
Zerethi Zeriya Ura Leemiso
(Maato 13:1-9; Luqa 8:4-8)
1 Yesuusi zaaridi Galila Abbaa matan tamaarsees. Daro asay iya matan yuushuwan shiiqin, abban de7iya wogoluwa giddo gelidi uttis, asa ubbay Abbaa matan de7ees.Luqa 5:1. 2 I enta darobaa leemison tamaarsis. Tamaarsishe haysada yaagis:
3 “Si7ite! Issi uray zerethi zeranaw keyis. 4 I zerishin, issi issi zerethay oge gaxan wodhis; kafoti yidi midosona. 5 Issi issi zerethay garsan shaalloy de7iya biitta bolla wodhis. Daro biitti bayna gisho, he zerethay ellesidi dolis. 6 Shin awi keyida wode shullis. Loythidi xapho yeddiboonna gisho, ellesi melis. 7 Issi issi zerethay aguntha giddon wodhis. Dolidaysa agunthay diccidi cuullida gisho ayfe ayfonna attis. 8 Issi issi zerethay aradda biittan wodhidi dolis. Diccidi issoy hastama, issoy usupun tamma issoy xeeta ayfis” yaagis. 9 “Si7iya haythi de7iya oonika si7o” yaagis.
10 Yesuusi odidaysa si7ida issi issi asatinne tammanne nam7u tamaareti Yesuusi barka de7ishin, iyako shiiqidi he leemisuwa birshethaa oychidosona. 11 Yesuusi entako haysada yaagis: “Hintew Xoossaa kawotethaa xuuraa eroy imetis. Shin haratas kawotethaafe karen de7eysatas ubbabay leemison odetees. 12 Gaasoyka,
“ ‘Enti xeelloosona, shin demmokona.
Si7oosona, shin akeekokona.
Enti demmiyakonne akeekiyako,
Xoossaako simmana
ika enta maaranashin’ ”Isa 6:9.
yaagis. 13 Yesuusi entako, “Ha leemisoy hintew gelennee? Yaatin, leemiso ubbaa hinte waati akeekanee? 14 Zereysi Xoossaa qaala zerees. 15 Qaalay zeretiya wode oge gaxan wodhidaysati qaala si7idaysata. Shin Xalahey ellesidi, yidi enta wozanan zeretida qaala maxi diggees. 16 Hessadaka, garsan shaalloy de7iya biittan zeretidaysi qaala si7idi, ellesidi ufaysan ekeysa. 17 Shin iyaw mino xaphoy bayna gisho ha77issafe attishin, gam7okona. Guutha wodepe guye qaala gaason waayey woyko goodi gakiya wode ellesidi dhubetoosona. 18 Aguntha giddon zeretidaysi qaala si7eyisata. 19 Shin ha sa7a de7uwas hirgoy, duretetha dosoynne haraba amotteysi iya wozanan gelidi qaala cuulliya gisho ayfe ayfonna attis. 20 Shin aradda biittan zeretidaysati qaala si7idi ekeyisata. Enti issoy hastama, issoy usupun tamma issoy xeeta ayfis” yaagis.
Geeman De7iya Xompe
(Luqa 8:16-18)
21 Yesuusi gujidi, “Xompe ekidi, daachofe woyko algafe garsan wothiya asi de7ii? Dhoqa bessan wothenneyee?Maato 5:15; Luqa 11:33. 22 Hiza, qosetidabay ubbay qonce keyana; geemmidabay ubbay eretonna attenna.Maato 10:26; Luqa 12:2. 23 Si7iya haythi de7iya oonika si7o” yaagis.
24 Qassi entako, “Hinte si7iyaba akeekidi si7ite! Xoossaa qaala hinte si7eysa mela I hintew akeeka immana. Ubbaka hintew darsidi immana. 25 Issibay de7iya uraas guji imetana, baynaysafe hari attoshin, iyaw de7iya he guuthiyaka eketana” yaagis.Maato 13:12; 25:29; Luqa 19:26.
Dicciya Zeretha Leemiso
26 Yesuusi zaaridi, “Xoossaa kawotethay ba gaden zerethi zeriya asa mela. 27 He uray qamma dhiskees; wonta dendees. I ba huuphen waaniyako eronna de7ishin he zerethay doleesinne diccees. 28 Biittay kathi barka immees. Koyro dolidi diccees, kaallidi ayfanaw gambuxees, wursethan kumetha ayfe ayfees. 29 Shin kathay gakiya wode uray ellesidi baacara geli aggees” yaagis.Iyyu 3:13.
Ayfe Guutha Mithee Leemiso
(Maato 13:31-34; Luqa 13:18-19)
30 Yesuusi, “Nuuni Xoossaa kawotethaa ay daanees gaanee? Woyko aybira leemisanee? 31 Xoossaa kawotethay ayfe guutha mithi daanees. He mithaa ayfiya zeriya wode sa7an de7iya mitha ayfe ubbaafe guuxees. 32 Zerin dolidi atakilte ubbaafe gitatees; daro daashshi daayees. Kafoti iya tashiya bolla keexidi uttana gakanaw daayees” yaagis.
33 Yesuusi haysa mela daro leemison asay akeekanaw danda7eysa mela qaala odis. 34 Asaas leemisoy bayna odenna. Shin Yesuusi ba tamaareta xalaalara de7iya wode, entaw ubbaba birshidi odis.
Yesuusi Hobbiya Seeris
(Maato 8:23-27; Luqa 8:22-25)
35 He gallas sa7i omarsin, Yesuusi ba tamaaretako, “Abbaafe hefinthi pinnoos” yaagis. 36 Iya tamaareti daro asa yeggi aggidi, Yesuusi kase geli uttida wogoluwan gelidi Yesuusa bantara efidosona. Hara wogolotika yan de7oosona. 37 Wolqaama gotey dendidi, hobbey wogoluwa shocin, kumana gakanaw wogoluwa giddo haathi gelis. 38 He wode Yesuusi wogoluwan guye baggara borkotidi dhiskis. Iya tamaareti iya denthidi, “Astamaariyaw, nuuni dhayiya wode ne si77i gada xeellay?” yaagidosona.
39 Yaatin, I barkidi gotiya, “Si7i ga” gidi, abbaaka, “Wopu ga” gis. Goteyka si77i gin ubbabay wopu gis. 40 Yesuusi ba tamaaretako, “Ayis haysada babetii? Hintew ammanoy waanidi dhayidee?” yaagis.
41 Enti daro babidi banta giddon, “Haysi hari attoshin, goteynne abbay kiiteteysi oonee?” yaagidosona.