1 Nuuni dirsa gimbe oosuwa doomidaysa Sanbalaaxi si7ida wode yilo eexidi nuna leqis. 2 Ba laggetanne Samaare olanchota sinthan, “Ha pathonna Ayhudeti ay oothanaw qopoona? Dirsa gimbiya zaari gimbanaw koyoonayee? Yarsho yarshanaw koyoonayee? Enti issi gallasan oosuwa oothidi wursana daanii? Enti gimbees haniya shuchata xuugetidi dooretidaysa giddofe kessanaw danda7oona?” yaagis.

3 Iya matan eqida Amoone biitta asi gidida Xoobbey, “Enti waanida gimbe gimbanaw danda7oona? Enti gimbiya bolla workani keyako laaletana” yaagidi leqis.

4 Taani haysada yaagada woossas; “Nu Xoossaw, enti nuna waati leqisiyako, haysa be7a! Enti nuna cayiya cashshay entaw gido. Banta aquwa bonqetidi allaga biittan di7etida asi gido. 5 Enti gimbeyisata cashshan kawushida gisho, enta naaqoy geemmofo; enta nagaraa ne sinthafe quchofa” yaagas.

6 Nuuni gimbiya oosuwa qanxonna oothida. Asay oosuwa minni oothida gisho gimbiya oosoy ellesidi bagga gakis.

7 Sanbalaaxi, Xoobbey, Arabe asay, Amoone asaynne Ashdooda asay Yerusalaame gimbe oosoy lo77o oosetishe de7eysanne dooya bessati gordetidaysa si7ida wode daro yilotidosona. 8 Hessa gisho enti issife Yerusalaame yidi nuna olanawunne meto medhanaw maqetidosona. 9 Shin nuuni nu Xoossaa woossida; enta teqanaw qammanne gallas naageysata wothida.

10 He wode Yihuda asay, “Toohoy nuna daabursis; buroo dendanaw koshshiya dooretida daro shuchi de7ees; yaaniya gisho, nuuni gimbiya gimbanaw danda7oko” yaagidosona.

11 Nu morketi, “Enti nu oothiyaba eranaapenne be7anaape sinthe nu enta giddo gelidi enta wodhana; enta oosuwaka essana” yaagidosona.

12 Nu morketa heeran de7iya Ayhudeti tamma simmidi nu morketi nuna ubba baggara olanaw giigetoysa nuus odidosona.

13 Hessa gisho, nu asaape mashshe, tooranne donge oykida asaa enta soo asan asan giigisada oosoy wuriboona heeran gimbiyas guyera garsa baggan naagana mela oothas. 14 Asay daggamidaysa taani be7ida wode denda eqada, asaako, enta kaaletheysatakonne halaqatako, “Nu morketa yayyofite! Gitaanne yashshiya Xoossaa qopite. Hinte ishatas, hinte adde naytasinne macca naytas, hinte machetasinne hinte keethaas oletite” yaagas.

15 Nu morketi nuna qohanaw maqetidaysa nuuni eridaysa enti si7idosona. Qassi Xoossay enta maquwa hada kessidaysa akeekidosona. Hessafe guye, nu ubbay simmidi, gimbe oosuwa doomida. 16 He wodepe doomidi ta asaape baggay oosuwa oothiya wode, baggay xurure ma7idi, toora, gondallenne donge oykidi naagana mela oothas. Qassi halaqati Yihuda asa ubbaafe guyera eqidi minthethoosona; 17 gimbiya gimbeysatinne koshshiyaba tookeysati issi kushen ola miishe oykidi, issi kushen ooso oothosona. 18 Gimbiya oothiya issoy issoy mashshe ba xeessan dancidi de7ees. Moyze punneysi ubba wode taape shaaketidi erenna.

19 Kaaletheysatako, halaqatakonne asa ubbaako, “Gimbiya oosoy gitanne dalga gidiya gisho nuuni issoy issuwafe haakidi de7oos. 20 Hessa gisho, hinte moyze puno si7iya wode he bessaa taako haa shiiqite. Nu Xoossay nu gisho oletana” yaagas. 21 Hessa gisho, wonta gontey zo7o wadhiya wodepe doomidi omarsi xoolintoy keyana gakanaw baggay oothiya wode baggay toora oykidi naagees.

22 He wode taani asaako, “Qamma nuna naaganawunne gallas oosuwa oothanaw hinte ubbay hintena maaddeysatara Yerusalaamen aqite” yaagas. 23 Tana gidin, ta ishata gidin, ta asaa gidin, woyko tana naageysata gidin, nu ubbay nu ma7uwa kessonna aqoos; nu ola miishey nuupe shaaketenna.