1 Issi wode addetinne enta macheti banta koche gidida Ayhudeta bolla waassidosona. 2 Entafe issoti issoti, “Nuus, daro adde naytinne macca nayti de7iya gisho nu shempuwa ashshanaw nuus kathi koshshees” yaagidosona.

3 Harati qassi, “Nuna gakida iita koshaape dendoysan kathi demmana gidi, nu goshsha gadiya, nu woyne gadiyanne nu keethaa oythida” yaagidosona.

4 Qassi attidaysati, “Kawo giira giiranaw miishe dhayidi nu goshsha gadiyanne nu woyne bessaa oythidi miishe tal7ida. 5 Ayhude kochatara nuuni issi ashonne issi suuthi; nu nayti enta nayta mela. Shin nuuni nu yelida nayta aylletethas aathidi immanaw un7etida; nu macca naytape issoti issoti aylletethas bayzetidosona. Nu goshshanne nu woyne gadiya nuupe eketida gisho nu wolqa dhayida” yaagidosona.

6 Taani enta waasuwanne oysha si7ida wode daro yilotas. 7 Ta wozanan oothanaba qopidaape guye, kaaletheysatanne halaqata xeegada, “Hinte, hinte ishatas yelora tal7ishe un7etheeta” yaagada enta kaccas.

He metuwaba entara odetanaw deriya shiishada, 8 “Ayhude gidonaysatas bayzetida Ayhude koche gidida nu ishata wozanaw nuus danda7etidaba ubbaa oothida. Shin hinte isha gidida Ayhudeti banta koche gidida hintew, bantana bayzana mela ootheeta; nu enta zaari wozanaw koshshees” yaagas. Kaaletheysati zaaranaba dhayidi si77i gidoosona.

9 Taani kaallada, “Hinte oothiyabay woga gidenna; Ayhude gidonna nu morketi nuna qelqisonna mela hinte nu Xoossaas yayyanawunne suureba oothanaw bessennee? 10 Taani, ta ishatinne ta oosanchoti asaas miishenne kathi tal7ida; gidoshin, entafe yelo ekeysi atto. 11 Enta goshsha, woynenne shamaho zayte gadiyanne keethaa ubbaa entaw zaarite. Qassi miishepe, kathafe, woynepenne zaytepe hinte entafe ekida xeetape issi kushe yelo ekidaysa elle zaarite” yaagas.

12 Enti zaaridi, “Nuuni ekidaba ubbaa entaw guye zaarana; enti nuupe tal7idaysa zaaro gidi achoko; ne nuna kiitidaysada oothana” yaagidosona.

Taani kahineta taako xeegada kaaletheysati banta gida qaala polana mela caaqisanaada oothas. 13 Taani ta ma7uwa qaarada qoqofashe, “Hintefe oonika ba gida qaala polonna ixiko, Xoossay iya, iya keethaafenne iya aquwape haysada qoqofidi mela kushe asho” yaagas.

Shiiqida asa ubbay issi qaalan, “Amin7i” yaagidi Godaa galatidosona. Asa ubbay caaqidaysada oothidosona.

14 Arxekisisi kawotida laatamantho laythafe doomidi hastamanne nam7antho laythi gakanaw taani Yihuda biitta haaras. He tammanne nam7u laytha giddon tana gidin woyko ta ishati shuumas bessiya katha damooze ekibooko. 15 Shin taape kase shuumetidaysati asaas deexo tooho gididi, gallas gallas kathasinne woyne ushshas oytamu bira qanxisidosona. Hari attoshin shuumata aylleti asaa bolla godaa gididi un7ethidi gam7idosona. Shin taani Xoossas yayyida gisho, hessada oothabike. 16 Taw de7iya wolqa ubbaa Yerusalaame gimbe oosuwas immas; ta oosanchotika taara issife he oosuwa bolla gam7idosona; nu aybi biittaka shammibooko. 17 Nu heeran de7iya kawotethatape yida asay attishin, gallas gallas taara miya Ayhudetinne kaaletheysati xeetanne ishatama. 18 Gallas gallas issi boori, usupun modho dorsatanne daro kuttota shukidi asaas shiishosona; qassi tammu gallasape issi toho daro baatha woyne ushsha aggoosona. Shin asaa bolla de7iya deexo toohuwa ta eriya gisho biitta shuumas bessiya katha damooze oychabike.

19 Ta Xoossaw, ta ha asaas oothida keehatetha ubbaa qopada taw keeha.