1 Sanbalaaxi, Xoobbey, Arabe biitta asi gidida Geesameynne hanko nu morketi nuuni gimbiya oothidi polidaysanne dooya bessi baynaysa si7idosona. Gidoshin, ta gimbe pengetas sanqa aathabike. 2 Sanbalaaxinne Geesamey, “Ono Demban de7iya gutatape issuwan yada nuura gaheta” yaagidi kiita yeddidosona. Hessi enti tana qohanaw maqida maqo.

3 Taani entaw, “Taw gita oosoy de7iya gisho hessa aggada hinte gida bessaa baanaw danda7ike. Taani yaa bin, oosoy ayis dhubetii?” yaagada zaaras. 4 He kiitaa zaari zaari oyddu toho kiittidosona; shin taani issi qommo zaaro entaw immas.

5 Ichashantho Sanbalaaxi ba aylletape issuwa dooya de7iya dabdaabe oythidi taako kiittis. Dabdaabey haysada yaagidi xaafetis; 6 “Neeninne ne koche gidida Ayhudeti makallanaw qopidaysanne hessa gaason gimbiya gimbeysa shooro biittan de7iya asa ubbay odeteysa Geesamey taw odis. Qassi neeni nena kawo kessanaw koyeysanne 7 neeni Yihuda kawo gideysa Yerusalaamen awaajana mela nabe wothidaysa taw odis. Ha woriya kawoy si7anaysi attenna. Hessa gisho, taara gahetada zorettanaw haaya” yaagees.

8 Taani, “Ha neeni giya oda ubbay tuma gidonnabaanne ne neepe medhidaba” yaagada zaaras.

9 Nu oothiya oosoy poletonna mela, “Enta kushey argaacana; oosoyka poletonna eqi attana” yaagidi nuna yashisanaw qopidosona.

Shin taani, “Xoossaw, ha77i ta kushiya minthetha” yaagada woossas.

10 Taani issi gallas soope keyonna mela gordi wothida Mahexabeela na7aa na7aa Dalaya na7aa Shamayako bas. I taako, “Qamma yidi enti nena wodhanaw danda7iya gisho neera taara Xoossa keethi gelidi, pengiya gordidi qosetana” yaagis.

11 Shin taani, “Ta mela asi yayyidi qosetii? Woyko tana daaniya asi ba shempuwa ashshanaw Xoossa keethi gelii? Ta hessa hanike” yaagas. 12 Ta qopa be7iya wode Shamayey Xoossay kiitida nabe gidonashin Xoobeynne Sanbalaaxi iya miishen shammidi yeddin ta bolla wordo tinbite odeysa akeekas. 13 I miishen shametida gaasoy tana yashisanaasa; ta hessa oothada nagaran gelana melanne tana borisiyabaa demmidi tana kawushanaassa.

14 Taani, “Ta Xoossaw, Xoobeynne Sanbalaaxi oothidaba ubbaa be7a. No7aado geetetiya macca nabiyanne hara wordo nabeti tana yashisanaw oothidaba ubba be7a” yaagada woossas.

15 Gimbe oosoy doometin ishatammanne nam7u gallasape guye Eluule geetetiya ageenan laatamanne ichashantho gallasan oosoy poletis. 16 Nu yuushuwan de7iya kawotethatan de7iya nu morketi hessa si7ida wode yayyidosonanne yeellatidosona. Ayis giiko, oosoy nu Xoossaa maaden poletidaysa akeekidosona.

17 He wode Yihuda shuumati Xoobbiyas dabdaabe xaafishe gam7idosona; ika entaw zaarishe gam7is. 18 Era na7ay Sakani, Xoobbiya bollo gidiya gishonne iya na7ay Yohaanani Baraka na7aa Masulaama na7iw ekida gisho, Ayhudetape daroti iyara caaqidi de7oosona. 19 He asati Xoobbey oothida lo77oba ubbaa ta sinthan nashidi haasayoosona; taani giyaba iyaw odoosona. Hessa gisho, Xoobbey ubba wode tana yashisanaw dabdaabe xaafo aggibeenna.