1 Goday Museko, 2 “Isra7eele asay baro hargen oyketida asi woyko asatethafe goggiyabay de7iya asi woyko aha bochidi tunida asi oonaka banta gutaape kessana mela kiita. 3 Ta enta giddon de7iya gutaa tunisonna mela ha geeshshi gidonna asati macca gidin adde enta giddofe kessada goodda” yaagis. 4 Goday Muse kiitidaysada Isra7eele asay enta ubbaa gutaape kessidi gooddidosona.

5 Goday Museko, 6 “Neeni Isra7eele asaas haysa oda; adde gidin woyko macci gidin oonika Godaas ammanetona ixidi hara asi naaqiko he uray bala oothis. 7 I ba nagara paaxo; ba nagara acciya kumetha aca bolla xeetape laatamu kushe gujidi I naaqida uraas ciggo. 8 Shin he naaqetida uray hayqidaba gidiko, aca ekanaw mata dabboy iyaw dhayko, he acay Godaas gididi kahiniyas imeto. He aca bolla gujidi iya nagara atotethas qoho yarshos gidiya maraze dorsi immo. 9 Qassi Isra7eele asay Godaas immiya geeshsha imo ubbay he kahiniyas gido. 10 Issi issi asi immiya geeshsha imotay he uraaba, shin kahiniyas immiko he imotay kahiniyasa” yaagis.

11 Goday Museko, 12 “Isra7eele asaas yaagada oda; issi addiya machiya kare hemetada iyaw ammanetona ixiko, 13 hara addera aqiko, qassi hessa iya ba azinaape qosiko, iya laymatishin be7ida marki baynaba gidiko, 14 I azinay iyo tunasu gidi sidhiko, woyko iya tunonna de7ishin I ba machiw sidhiko, 15 he addey ba machiw kahiniyako efo. I gisho yarshanaw issi kilo giraame banga dhiille efo. He addey ba machiw sidhida gisho, I qohuwa qoncisiya katha yarsho gidiya gisho, dhiilliya bolla zayte tigopo; ixaane iya bolla wothofo.”

16 Kahiney he maccasiw Godaa sinthan esso. 17 Geeshsha haathi keren eko. Geeshsha Dunkaaniya wuygiyape biitta ekidi he haathan gujo. 18 He maccasiw Godaa sinthan esso; he maccase huuphiya billidi sidhida gisho yarshetiya qohuwa qoncisiya katha yarsho I kushen wotho; qassi kahiney ba kushen baadethi ehiya camo haatha keren oyko. 19 Hessafe guye, maccasiw yaagidi caaqiso; “Neeni hara addera aqabonaba gidiko, nenatethaa tunisaboonaba gidiko, baadethi ehiya haathay new gome gidopo. 20 Shin neeni ne azina aggada hara addera aqada tunidaba gidiko, 21 Goday ne yelo keetha gundisidi, ne uluwa gabbisidi ne asaa sinthan nena baadetidaba ootho. 22 Ha baadethi ehiya haathay ne uluwan gelidi ne uluwa gabbiso; ne yelo keethaa gundiso” yaagidi caaqiso.

Maccasiya, “Amin7i, hessi tana gako” yaago.

23 “Haysafe guye, kahiney he baadetha xaafo; he xaafidaysa keriyan de7iya haathan meecco. 24 Qangethi ehiya haatha maccasiw ushshanaape sinthe, 25 kahiney maccase kushepe yarsho dhiilliya ekidi, dentho yarsho oothidi Godaas yarsho. 26 Kahiney yarsho kathaafe zolle ekidi bala qoncisiya yarsho oothidi yarsho bessan xuuggo. Hessafe guye, maccasiw he haatha ushsho. 27 Iya ba azinaas ammanetona ixada tunidaba gidiko baadetha haathay I uluwan camo saho medho. I uloy gabbana; I yelo keethayka gundana; iya ba asaa giddon baadetidaaro gidana. 28 Iya tunaboonabanne xillo maccas gidiko, iya geeshshi gidana; na7a yelanaw danda7awusu.

29-30 “Issi asi ba machiw laymatasu gidi sidhiko woyko qaanatiko yarsho bessi ehidi iyo esso. Kahiney he wogaa ubbaa I bolla polo. 31 Azinay, qohoy baynaba gidana, shin macciya ba nagaraa gaason gakiya waaye ubbaa tookana” yaagis.