1 Goday Museko, 2 “Isra7eele asaa haysada gada kiita; adde gidin woyko macca bana Godaas dummayidi Naazirawe gidanaw qangiko, 3 woyne woyko hara mathoyiya ushshi uyopo. Caalabanne mathoyaba uyopo; woyne teera, tiyanne mela moopo. 4 I bana Godaas dummayida wode ubban, woyne ayfiya gidin poquwa gidin woyko kochaa gidin moopo.

5 “I bana Godaas dummayida wode ubban, ba huuphiya meedetofo woyko qanxetofo. I ba huuphe binaana adussidi dicho. I bana Godaas dummayida wodey poletana gakanaw geeshshi gidanaw koshshees. 6 I bana Godaas dummayida woden ubban ahako shiiqopo. 7 I bana dummayidaysa erisey iya huuphiya gidiya gisho, iya aaway woyko iya aayiya woyko iya ishay woyko iya michiya hayqiko enta aha bochidi bana tunisopo. 8 I bana Godaas dummayida wode ubban Godaas geeshshi.

9 “Asi iya matan qoponna hayqiko, Godaas geeshshi gidida ba huuphiya tunisiko laapun gallas gam7idi ba huuphiya meedeto. 10 Hospuntha gallasan nam7u holleta woyko nam7u kuraachota Geeshsha Dunkaaniya pengen de7iya kahiniyas eho. 11 Naazirawey aha bochidi tunida gisho nagarape iya geeshshanaw kahiney holletape issuwa nagara yarsho, hankuwa qassi xuussa yarsho oothidi yarsho. He gallas I ba huuphiya wogaada zaaridi Godaas geeshsho; 12 I bana zaaridi Godaas dummayo. Yaatidi issi laytha maraze naaqo yarsho oothidi yarsho. I Godaas dummayida huuphey tunida gisho, kase I bana Godaas dummayidi de7ida wodey taybetenna.

13 “Issi naazirawey ba qangetha wodiya ongida wode polana wogay haysa; Geeshsha Dunkaaniya penge bidi; 14 borey bayna issi laytha dorsa urge xuussa yarshos, issi laytha uzzo dorsi nagara yarshos, issi maraze issifetetha yarshos he bessaa eho. 15 Qassi katha yarshonne ushsha yarsho entara issife yarshanaw eho. He katha yarshoy irshoy geliboonna lo77o dhiille shamaho zaytera uuketida orde uythinne shamaho zayten tiyetida lee7o gaytan eho.

16 “Kahiney he ubbaa nagara yarshonne xuussa yarsho oothidi Godaas yarsho. 17 Kahiney maraziya gaytan de7iya uythaara Godaas issifetetha yarsho oothidi yarsho; kaallidi katha yarshuwanne ushsha yarshuwa yarsho. 18 Naazirawey Godaas dummayida ba huuphiya Geeshsha Dunkaaniya pengen meedetidi, binaana issifetetha yarshoy eexiya taman yeggo.

19 “Naazirawey ba huuphiya meedetidaape guye, kahiney doysetida maraziya gedaa ashuwa gaytan de7iya orde uythaafenne lee7o uythaafe ekidi, Naazirawiya kushen wotho. 20 Yaatidi kahiney he ubbaa yuusho yarsho oothidi, Godaas yarsho. He ubbay kahiniya gisho gidiya angaasuwaranne gedaara kahiniyas geeshsha yarsho gidees. Hessafe Godaas Naazirawey woyne ushsha uyo. 21 Hiza Godaas bana dummayida Naazirawey oothana mela imetida wogay haysa. Shin naazirawey yarshanaw koshshiya yarshotape aathidi immanaw qangidaba gidiko, ba qangetha gathanaw koshshees” yaagis.

22 Goday Museko, 23 “Aaroninne iya adde nayti Isra7eele asaa anjiya wode haysada yaagidi anjite yaaga;

27 “Enti Isra7eele asaa ta sunthan anjiya wode ta enta anjana” yaagis.