Leemiso Maxaafa
Gaatha Qofa
Leemiso Maxaafay haysenne Leemiso odan giigida, duussa woganne ammano timirte. Ha maxaafape daro baggay gallas gallas ase gakiya hanotata odees. Maxaafay koyro doomishe, “Xoossas yashatethi cincatethas koyro” (1:7) yaagis. Ha maxaafay tamaarsey, ammano wogan asi oothanaba xalaala gidonashin, asi ba gallasa duussan hananaw bessiya lo77o kanduwanne oothanaw bessiya lo77o ooso gujidi tamaarsees.
Leemiso maxaafatape baggay asa buzo de7oba odees; baggay issi soo asa duussaba odees; baggay oosobanne zal7eba odees. Leemiso maxaafay xoosse bonchiya asi “Cinca” gidi, Xoosse eronna asi “Eeya” gees. Leemiso maxaafay ashketethaba, cincatethaba, danda7aba qadhebaanne ammanetethaba daro timirte tamaarsees.
Maxaafa Ayfe Qofata
Leemisota go77a (1:1—9:18)
Solomone leemisota (10:1—24:34)
Dumma dumma leemisota (25:1—29:27)
Agura leemisota (30:1-33)
Limu7eela aaye timirte (31:1-31)
1
Leemiso Go77a
1 Haysati Isra7eele kawa Dawita na7aa Solomone leemisota. 2 Leemisoti asay cincatethi, seeranne era haasaya akeekanaw maaddoosona. 3 Enti cincatethi, xillotethi, suure pirdinne suure wozani daana mela tamaarsoosona. 4 Eeyatas akeeka immees; na7atethatas eratethinne kahaamatethi immees. 5 Cincati ha leemisota si7idi, era gujoosona; akeekanchoti lo77o zore ekoosona. 6 Hessan leemisotanne enta birshethaa, cincatetha odaanne enta qan7isheta akeekanaw danda7etees.
7 Godaas yashshi cincatethas doomethi; shin eeyati cincatethinne seera kadhoosona.
Cincatethi New Miishe Ootha
8 Ta na7aw, ne aawa zoriya si7a;
ne aaye timirtiya kadhopa.
9 Hessi ne huuphiyas boncho kallacha;
ne qoodhiyas gozda gidana.
10 Ta na7aw, nena nagaranchoti
cimmiko ero goopa.
11 Enti, “Nuura yedha;
ase wodhanaw hokidi naagoos;
xillota wodhanaw qosetoos.
12 Si7ooley mitteysada nuka enta paxa mittoos;
nu enta ollan yegetiya asada oothana.
13 Nuuni al7o miishe ubbaa demmana;
nu keethaa bonqe miishen kunthana.
14 Nuura laggeta;
nu demmidaba issife shaaketana” yaagana.
15 Ta na7aw, entara hemetofa;
enta ogiyara baanaw ne tohuwa denthofa.
16 Enti iitabaa oothanaw woxoosona;
asa suuthi gussanaw yaa haa goosona.
17 Kafoy xeellishin,
iya oykanaw gite yegethi maaddenna.
18 Shin enti banta suuthi gussanaw hokosona;
banta shempuwa wodhanaw qosetoosona.
19 Genen go77a demmiya asa wursethi hessa mela;
enti shiishida shaloy enta shempuwa ekees.
Cincatethi Xeegees
20 Cincatethi daggala bolla eqada xeegawusu;
dabaaban ba qaala dhoqu oothada sissawusu. 21 Cincatethi asi shiiqiya bessan eqada xeegawusu;
katamaa geliya pengen eqada haysada yaagawusu.
22 “Hinteno, akeeki pacidaysato,
hinte awude gakanaw eeya gididi daanee?
Qelqiseysato, awude gakanaw ufaytanee?
Eeyato, awude gakanaw eratethi ixanee?
23 Ta seera hinte si7idaba gidiyako,
taani ta eraa hinte bolla gussana;
ta qaalaka hintena tamaarsana.
24 Shin ta xeegida wode hinte koyonna ixida gisho;
taani kushe miccin oonika akeekibona gisho;
25 Ta zoriya hinte kadhida gisho;
ta seeraka ekiboonna gisho;
26 Hintena metoy gakiya wode ta miicana;
hinte dagaman kokoriya wode ta qelqisana. 27 Gadoy uushoda hinte bolla yaa wode,
metoy goteda hinte bolla eqiya wode,
un7inne waayey hinte bolla gakiya wode,
taani hintena qelqisana.
28 “He wode enti tana xeegana; shin ta koyke;
enti tana minthidi koyana; shin demmokona. 29 Enti eratethi ixida gisho;
Godaa yashshi dooriboonna gisho, 30 Ta zoriya ekiboonna gisho;
ta seera kadhida gisho; 31 Enti banta oosuwa ayfiya maana;
banta qofaa ayfiya kallana. 32 Akeeki pacidaysata cincatethafe haakeysi wodhees;
eeyata qelli guussi dhaysees. 33 Shin ta odiyaba si7iya ubbay saro daana;
meto hirgafeka shempana.”