2
Cincatetha Go77a
1 Ta na7aw, ta timirtiya ne ekiko;
ta kiitaa ne wozanan wothiko; 2 ne haythaa cincatethako zaariko;
ne wozanaa akeekako zaariko;
3 Eratethi xeegiko;
akeeka dhoqu oothada xeegiko;
4 Bira woyko geemmida miishe koyeysada,
neeni eratethi koyko,
5 He wode neeni Godaas yashshi guussi aybeko erana;
Xoossaa loythada erana.
6 Goday cincatethi immees;
iyape eratethinne akeeki bentees.
7 I suuretas maaddiya zore minjees;
borey baynaysatas gondalle gidees.
8 Suure pirda ogiya naagees;
iyaw ammaneteyisata ogiya minthees.
9 He wode neeni xillotethi, suure pirdaa,
suure ogenne lo77o oosoy aybeko akeekana.
10 Cincatethi ne wozana giddo gelana;
eratethi new ufaysi gidana.
11 Shaakidi eroy nena naagana;
akeeki nena kammana.
12 Cincatethi nena iita asata ogiyape naagana;
geella odape nena ashshana.
13 Enti nagara dhuman daanaw,
xillotetha ogiya aggidosona.
14 Iita ooson ufaytoosona;
geellatethan hashshu goosona.
15 Enta oosoy mirqethi;
enta de7oy geella.
16 Cincatethi layma maccasape,
qaalan cimmiya laggethofe nena ashshana.
17 Iya ba na7atetha azina aggaagasu;
Xoossa sinthan caaqida caaquwa dogasu.
18 I soo ogey hayqoko gathees;
iiko buussi moytilletako gathees.
19 Iiko biya oonika guye simmenna;
de7o oge demmenna.
20 Hessa aggada, lo77o asata leemisuwa kaalla;
xillo asata hemethaa naaga.
21 Suure asatinne borey baynaysati,
biittan adussa laythi daana.
22 Shin iitati biittafe shodetana;
ammanetonaysati dhayana.