49
Meto Wodey Yashshenna
Qore Nayti Zammaareta Halaqaas Xaafida Mazmure.
1 Asa ubbay haysa si7ite;
biitta bolla de7eysato,
ubbay haysa hayzite.
2 Dhoqay ziqay,
durey manqoy si7ite.
3 Ta wozanaa qofay akeeka immees;
ta doonay cincatetha qaala odetees.
4 Ta haythaa leemisoko zaarana;
diithi diixashe, ta qan7ishiya birshana.
5 Meto gallasay yaa wodenne cimmiya morketi;
tana teqiya wode ta ayis babbayna?
6 Banta shaluwan ammaneteysatanne
banta duretethan ceeqetiya
ta morketa ayis babbayna?
7 Ay asika bana wozanaw,
woyko ba shempuwa gatiya
Xoossas qanxanaw danda7enna.
8 Asa shempo gatey daro al7o;
Ay gate qanxinka gidenna.
9 I hayqonnaadanne duufo gelonnaada,
woyko I hayqonnaada oothanaw gakenna.
10 Eeyatinne pathonna asati hayqeysada,
cincati banta shaluwa
haratas yeggidi beysa asa ubbay be7ees.
11 Enti banta biitta bantaba giikoka,
duufoy merinaw entaw keethe gidana.
12 Asi ay gitatikoka ba gitatethaara kanthenna;
I do7ada hayqees.
13 Bantarka banta huuphen ammaneteyisata qaadaynne
enti gidaba tuma giya eeyata wursethay haysa.
Salaha
14 Shukas giigetida dorsatada,
hayqoy enta duufo kaalethees.
Suureti enta duufuwa bollara hemetana;
enta asatethay duufon wooqana;
keethafe keyidi haakidi si7oolen attana.
15 Shin Xoossay ta shempuwa wozana;
I tana hayqo wolqafe ashshana.
Salaha
16 Asi duretiya wodenne
iya bonchoy dariya wode yayyofa.
17 I hayqiya wode aykoka ekidi beenna;
iya shaloy iyara issife duufo gelenna.
18 Asi paxa de7iya wode taw kumis giiko,
ubbabay iyaw injetida gisho galatetikoka,
19 simmidi poo7o be7onna,
ba mayzatan gahetees.
20 Eratethi bayna duretida asi
do7ada coo dhayana.