50
Xoossay Tuma Daynna
Asaafa Mazmure
1 Wolqaama Goday, Xoossay odees;
dolohape wuloha gakanaw biitta ubbaa xeegees.
2 Medhon polo yegelsi gidida
Xiyoonepe Xoossay poo7ees.
3 Nu Xoossay yaana; si77i geenna;
eexiya tamay iya sinthana;
wolqaama gotey iya yuushuwana.
4 Xoossay ba asaa pirdiya wode,
salotanne sa7aa xeegees.
5 “Yarshon taara caaqida,
ta geeshshata taako shiishite” yaagis.
6 Xoossay pirdiya gisho,
saloti iya xillotethaa awaajosona.
Salaha
7 “Ta asaw, si7ite; ta hintew odayis;
Isra7eele asaw, ta ne bolla markatana;
taani Xoossay, ne Xoossaa.
8 Ne yarshuwa gishonne
ne xuussa yarshuwa gisho,
nena borike.
9 Ne daraape kormata,
ne girbiyafe kole ekanaw koyke.
10 Woran de7iya do7ati ubbay tabaa;
mukulu zumaa bolla de7iya mehetika taassa.
11 Taani dhoqa deriyan de7iya kafota ubbaa erayis;
denban de7iya medhetethati tayisata.
12 Tana koshaykoka nena oychike;
sa7inne sa7an kumidaba ubbay tabaa.
13 Taani kormata ashuwa maynayee?
woyko deeshata suuthaa uyanayee?
14 Xoossas galata yarsho imma;
Ubbaafe dhoqa Xoossaas ne qangetha gatha.
15 Meto gallas tana xeega;
ta nena ashshana; neka tana bonchana” yaagees.
16 Shin Xoossay iita asaa haysada yaagees;
“Ta higgiya ne nabbabanaw new ay maati de7ii?
Woyko ta caaquwa ne doonan qoncisanaw new ay maati de7ii?
17 Neeni ta timirtiya ixadasa;
ta qaala guye yeggadasa.
18 Kaysuwa be7ida wode neeni iyara dabbotadasa;
laymateyisata maabaran geladasa.
19 Ne doona iitabaa odetanaw billa yeddadasa;
Ne inxarsay wordo haasaya meezetis.
20 Uttada ne ishaa zigiradasa;
ne aaye na7aa bolla iitaba odetadasa.
21 Ne haysa ubbaa oothiya wode,
taani si77i gida gisho
tana ne mela gada qopadasa.
Shin ha77i ta nena hanqana;
ne nagaraa ne sinthan taybana.
22 Hinteno, Xoossaa dogeysato, haysa akeekite;
hessi hanonna ixiko ta hintena mentherethana;
he wode hintena ashshanay baawa.
23 Taw galata yarshey tana bonchees;
ba ogiya suurisida asas
taani Xoossaa atotetha bessaana” yaagees.