55
Ne Toohuwa Xoossa Bolla Yegga
Dawiti Zammaareta Halaqaas Diithan Yexida Akeeka Mazmure.
1 Abeeti Xoossaw, ta woosa si7a;
ta magannuwa qelli goopa.
2 Tana si7a; ta woosaas zaaro imma;
ta qofay tana waaysin, ta un7etas.
3 Ta morketa girsa si7ada dagammas;
iitata mandiya gaason kokoras.
Enti ta bolla meto ehoosona;
yilon dendidi tana morkoosona.
4 Ta wozanay dirgees;
hayqo hirgay tana wodhees.
5 Tana yashshinne kokorsi oykis;
iita dagami ta bolla wodhis.
6 Holleda taw qefey de7iyako,
paallada shempoy de7iya bessi gakanashin.
7 Taani haakada baanashin;
bazzon aqanashin.
Salaha
8 Taani gotepenne carkofe baqatada,
ta qosetiya bessi demmanashin.
9 Abeeti Godaw, katamaa giddon
ooshshinne gene be7ida gisho
iitata odaa laalla.
10 Iitati gallasinne qamma
katamaa gimbe dirsaa yuuyosona;
waayeynne metoy katamaa giddon de7ees.
11 Dhayoy iya giddon de7ees;
naaqoynne cimoy iya dabaabape shaaketenna.
12 Tana cayey ta morkiya gidenna;
iya gidiyako ta danda7anashin.
Ta bolla ceeqetey tana ixeysa gidenna;
iya gidiyako ta iyape qosetanashin.
13 Shin hessa oothey nena,
ta laggiya; ta dabbuwanne ta siiquwa.
14 Nu issoy issuwara ulo oda odetida;
Xoossa keethan dabaaban asaara issife simeretida.
15 Enta wozanan iitatethi de7iya gisho,
ta morketi qoponna hayqo;
enti paxa de7ishe duufo gelo.
16 Shin taani Xoossaa xeegana;
Goday tana ashshana.
17 Wonta, gallasinne omarsi waassana;
ta metuwa iyaw odana; I tana si7ana.
18 Daroti tana morkikoka,
I tana toorape ashshees.
19 Benipe ba araatan uttida Xoossay,
banta ogiya laammonna gishonne
iyaw yayyonna gisho tana si7idi enta kawushana.
Salaha
20 Ta laggey ba dabbota qohis;
entara caaqida caaquwa menthis.
21 Iya doonay oysape liiqo;
shin ba wozanan ola denthees.
Iya inxarsay zaytepe aadhida shugo;
shin qanxanaw giigida qara mashsha mela.
22 Ne toohuwa Xoossa bolla yegga;
I nena katisana.
Xoossay xilloti,
dagammana mela oothenna.
23 Shin Abeeti Xoossaw,
iita asata wolqaama ollan holana.
Suuthu gusseysatinne cimmeysati,
banta laythaafe baggaaka de7okona;
shin taani nenan ammanetana.