74
Xoossaw Ne Gisho Mooteta
Asaafa Timirte
Akeekan xaafida ginxo.
1 Xoossaw neeni nuna ayis merinaw aggadii?
Ne qooruwan de7iya ne dorsata bolla
ne hanqoy ayis eexidee?
2 Neeni beni doorida asaa,
new buzo oothada wozida kochata hassaya;
neeni de7ida Xiyoone zuma qopa.
3 Laaletida ne keethaa yada xeella;
morketi yan de7iyaba ubbaa dhaysidosona.
4 Ne morketi ne keethan,
“Nu xoonida” yaagidi gereeridosona.
Xoono malaata gidida banta bandira essidosona.
5 Enti mithi qanxanaw wora giddon eqidi,
banta kalta denthida asata daanosona.
6 Enti kushe hiillan alleeqida oosota ubbaa,
banta kaltaaninne naariqan mentherethidosona.
7 Ne keetha taman xuuggidi dhaysidosona;
ne sunthay xeegetiya bessaa tunisidosona.
8 Banta wozanan, “Nu kumethi dhaysana” yaagidosona;
biittan de7iya asi Xoosse goyinniya bessata
taman xuuggidosona.
9 He wode malaati nuus imetenna;
nabeyka deenna.
Hessi awude gakanaw gam7aneko,
eriya asi nu giddon baawa.
10 Xoossaw, ne morketi awude gakanaw,
ne bolla qelqisanee?
Enti ne sunthaa merinaw cayanee?
11 Ne ushacha kushiya ayis shiisha ekay?
Ne ushacha kushiya ne afilaa giddofe
kessada enta dhaysa.
12 Gidoshin, abeeti Xoossaw,
neeni benipe ta kawa;
ne daro wode ashshadasa.
13 Ne gita wolqan abba shaakadasa;
iya giddon de7iya do7aa huupheta doncadasa.
14 Leewataane geetetiya dawiya huupheta doncada,
iya ashuwa bazzon de7iya medhetethatas
kathi oothada immiday nena.
15 Neeni pultota dooya yeddadasa;
ubba wode goggiya shaafata melisadasa.
16 Gallasay nebaa; qammayka nebaa;
awanne ageena enta bessan wothiday nena.
17 Biittas zawa wothiday,
balgonne bone medhiday nena.
18 Abeeti Godaw, ne morketi nena waati qelqisidaako,
eeya asati ne sunthaa waati cayidaako hassaya.
19 Ne holliya shempuwa do7aas aathada immofa;
metootanchota merinaw dogopa.
20 Nu biittan de7iya dhuma bessi ubbay
makallanchotan kumida gisho,
ne nuus caaqida caaquwa qopa.
21 Qohetidaysata yeellayopa;
manqotinne metootanchoti ne sunthaa galato.
22 Abeeti Xoossaw, denda; mooteta;
gallas kumethi eeyati nena qelqiseysa hassaya.
23 Ne morketi ne bolla waassiya waasuwanne
nena ixeysati ceeqetiya ceequwa akeeka.