83
Xoossaw Si77i Goopa
Asaafa Mazmure
1 Abeeti Xoossaw, si77i goopa;
Xoossaw sirphi goopa; muumopa.
2 Ne morketi ne bolla dendeysa,
nena ixeysati ne bolla makalleysa be7a.
3 Enti ne asaa bolla geeman duulatoosona;
neeni dosiya asaa bolla maqetoosona.
4 “Haayite, enta kawotethaa dhaysoos;
Isra7eele geetetiya sunthay merinaw hassayetonna mela oothoos” yaagosona.
5 Enti issi wozanan gididi maqetoosona;
ne bolla dendanaw caaqidosona.
6 Enti, Edoomenne Isma7eela asaa,
Moo7abenne Aggaari kochata;
7 Gebaalanne Amoone asaa,
Amaaleqa, Filisxeemenne Xiroosa asaa.
8 Asooreti entara gahetidosona;
Asooreti Looxe asaas wolqaama maado gididosona.
Salaha
9 Neeni, Midiyaame, Sisaaranne Yabina bolla
Qisoona shaafan oothidaysada enta bolla ootha.
10 Enti Endooran dhayidosona;
enta ahay denban wooqidi attis.
11 Enta halaqata Oreebanne Zebada ootha;
enta haareyisata Zabheelanne Silmanada dhaysa.
12 Enti, “Nuuni Xoossaa asaa laata
nuus buzo oothana” yaagidosona.
13 Ta Xoossaw, enta baanada laalla;
carkoy efiya suullada ootha.
14 Tami wora meysada,
tama lacoy deriya xuuggeysada,
15 ne uushuwan enta yedetha;
ne gotiyan enta dagantha.
16 Godaw, asay ne sunthaa koyana mela,
enta som7uwa yeella mayza.
17 Enti merinaw yeellato; hirgo;
kawuyidi dhayo.
18 Ne sunthay Godaa gidida ne xalaali,
Ubbaafe Dhoqa Xoossay,
sa7a ubbaa haareysa enti ero.