84
Xoossa Keethi Bishe Yexia Mazmure
Zammaareta halaqaas Qore nayti xaafida Suusul7en yexetiya mazmure
1 Ubbaafe Wolqaama Godaw,
ne de7iya bessay waani lo77i!
2 Taani Godaa keetha dabaaba laamotayis;
ta kumetha asatethay
de7o Xoossaas ufaysan yexees.
3 Ubbaafe Wolqaama Godaw,
ta kawaw, ta Xoossaw,
ne yarsho bessa matan
buube kafoy baw de7iya bessi demmasu;
holleyka ba nayta wothiya keethe keexasu.
4 Ne keethan de7eysatinne
merinaw nena sabbeysati anjetidaysata.
Salaha
5 Nena banta minotethi ootheysati,
banta wozanaa Xiyoone ogiya bolla,
wotheysati anjetidaysata.
6 Enti yeeho zangaarara aadhiya wode,
he bessay pultoy keyiya bessi gidis;
torche iray bukidi ollaa kunthees.
7 Enti wolqa bolla wolqa guji guji baana;
issoy issoy Xoossa sinthan Xiyoonen bentana.
8 Ubbaafe Wolqaama Godaw Xoossaw,
ta woosa neeni si7a;
Yayqooba Xoossaw hayza.
Salaha
9 Xoossaw, nu gondalliya be7a;
ne doorida kawa keeha ayfen xeella.
10 Taani hara bessan mukulu gallas daanape,
ne dabaaban issi gallas de7eysi taw lo77o.
Iitata dunkaaniyan daanape,
Xoossa keetha penge naagoy taw lo77o.
11 Godaa Xoossay nuus gondallenne poo7o;
nuus bonchonne keehatethi immees;
suuretethan hemeteyisata lo77oba diggenna.
12 Ubbaafe Wolqaama Godaw,
nenan ammaneteysati anjetidaysata.